الموضوع: مساعدة فى تركيب عدة صوت

المشاركة الأصلية كتبت بواسطة Bobos Khedr

ة ابسم الله الرحمن الرحيم

هحاول افيد حضرتك

انا ناوى اركب عدة فى سيراتو 2012 و عندى كذا استفسار
اولاً العدة مواصفتها كده
سماعتين سونى 420 وات
سماعتين كينوود 400 وات
جي ام سيمفونى 640 وات 4 تشانل
بازوكا سونى 1350 وات
ملحوظة انا جايب سماعات ضعيفة علشان متسحبش من الجى ام و يدى البازوكا افضل اداء

اولا مفيش حاجه اسمها سماعات ضعيفه عشان متسحبش من الجي ام لان السماعات ببتركب علي 2 شانل والبازوكا بتركب علي 2 شانل لوحدهم يعني جبت بازوكا 1000 او 1300 علي ال2 شانل مش هتاثر علي السماعات طبعا والعكس برده صحيح مع العلم انك تراعي فقط ال rms عشان تستفيد بقوه البازوكا كلها :) جيب سماعات براحتك انشاله كينود دبل بيز 600 حتي وطبعا كل سماعه بتاخد شانل في الجي ام سماعتين بتاخد 2 شانل والبازوكا بريدج بياخد 2 شانل لوحدهم عشان rms الشانل الواحد يتضاعف لما يبقا 2 شانل بريدج يا رب تفهم حاجه من الرغي ده كله
الاسئلة بقى

اولاً انا هركب على كاسيت العربية لان الميزانية متسمحش انى اغيره فياترى هحتاج زيرو باور ولا لأ و لو هحتاج السيمفونى كويس ولا لأ

الكاسيت مسئول عن نقاء الصوت في العده وده شئ اساسي و اهم شئ في عده الصوت طبعا لانك ده اللي بتبني عليه العده كمان حاجه انت مش واخد بالك منها الكاسيت الجديد بيبقا في مخارج rca للجي ام وتحكم للصب واوبشن عالي استحاله تلاقيه في كاسيت العربيه واكيد الكاسيت بتاع حضرتك مفيهوش الكلام ده وطبعا لما تفكر تركب العده دي هتحتاج مشترك ووجع قلب وف الاخر مش هتاخد نقاء البايونير وهتسمع زن في السماعات عشان المشتركات اللي هتركب
اشتري دماغك وجيب كاسيت بايونير حتي لو اقل كاسيت هيطلعلك صوت كويس وتكلفته بتبدء من 600 جنيه

ثانياً انا محتار بين البازوكا السونى 1350 و البايونير 1300 انا محتاج البازوكا تكون صوتها منتغم اكتر ماتكون بيز و خلاص علشان كده مكنتش حابب JBL لانها ناشفة اوى يعنى مدية بيز غشيم بس مش ديه تقريباً صوت انا ميال للسونى بسبب شكلها و حجكها و انا سمعتها عند واحد صاحبى و كانت ممتازة بس كذا واحد نصحنى بالبايونيير

بازوكا يعني بااااااااااااااايونير 1300 الشكل الجديد بيطلع 350 rms وشكل حضرتك بتحب نغمه البيز اللي متزهقش منها وانت بتسمعها سيبك من jbl بيز غشيم وخلاص وبردو في نااااااااس كتير مقتنعه ب jbl بس هي ازواق طبعا وكل ودن تفرق عن التانيه في اللي بيحب بوم بوم بوم وخلاص في اللي يحب البيزه رايقه وطويله كده وتتسمع من غير متزهق منها

ثالثاً انا هسيب سماعات العربية زي ماهيا لما احب افصل عدة الصوت لما يكون الاهل راكبين معايا "اه صح هيا العربية سماعتها كام وات و في سماعات فى التابلوه ولا لأ"

مش هعرف افيد حضرتك لاني مش عارف شكلها من جوه عشان اعرف في سماعات في التابلوه ولا لا وكمان واط السماعات مش هعرفه غير لما تقلب السماعه وتشوف مكتوب عليها كام
وهنا في نصيحه اعمل زرار للعده الجديده وسيب القديمه زي ماهي عشان لما اهلك يكونو معاك تفصل العده الجديده بالزرار والتانيه تكون شغاله من غير صداع ليهم :D

رابعاً الكابلات انا جياب الباكدج تمنها 50 جنيه فيها كل الكابلات ده كفاية ولا هحتاج حاجة تانية

تعبانه اوي طبعا ولا تاخد منها Rca كويس ولا تاخد سلك محمل
السلوك المطلوبه
سلك 6 ملي 7 متر تقريبا علي ده بيتوصل ديركت للبطاريه
سلك 6 ملي 1 متر بيتوصل في الشنطه في اقرب مسمار قريب من الجي ام وده الارضي
5 متر سلك 1 مللي كويس اوي ده بيتوصل للكاسيت في حاجه اسمها power antenna عشان تفصل الكاسيت يفصل الجي ام تفتح الكاسيت يفتح الجي وطبعا قولنا فوق هنوصل مفتاح في هناخد السلك ده للمفتاح ده وهناخد سلك من power antenna للزرار وبكده تقفل الزرار يفصل الجي ام تفتح الزرار يفتح الجي ام تقفل الكاسيت يفصل الزرار خالص ومش هيوصل ليه كهربا :D
rca مهم جدا في عده الصوت زي ما الكاسيت مسئول عن النقاء طبعا ال Rca ليها دور في كده افضل نوع اسمه auvio gold plated من راديو شاك وبعده نوع اسمه ادريان ده كويس وبيجي معاه اصلا سلك ريموت اللي قولنا هنوصله من الجي ام للزرار فا لو هتجيب ادريان يبقا متجبش سلك الريموت 5 متر سلك 1 مللي مش ليه لازمه كدا

خامساً الرف الى وره عندى بلاستيك تقريباً فهشيله و هعمل واحد خشب اقص فيه بس فى تحت الرف الخسب صاج هينفع اقطع فيه ولا لأ

اكيد هينفع تقص مش بيعيب العربيه ولازم تقص عشان السماعات البيضاوي تركب ورا
خلي بالك البورده بتاعت السماعات تبقي 18 مللي او ازيد ونوع الخشب mdf وتتكسي جلد من تحت وفوق وتحط عليها مكيت لون العربيه عشان متزنش في الصاج

سادساً و أخيراً العده ديه كده حلوة ولا لأ لأن ديه اول مره اركب عدة صوت

المشاركة الأصلية كتبت بواسطة Bobos Khedr

متشكر جداً على الرد الوافى بس عندى سؤالين
انا اعرف البايونير البازوكا الجديدة ولا القديمة ازاى
و ثانياً انا الى هيركبلى واحد قريبى مهندس صوتيات بس مركب للعيله كلها عدد صوت (عيلة بتحب المزيكا) :d لما بص على الكاسيت قالى عادى هينفع اركب عليه عدة الصوت و قالى هيطلع صوت حلو و طبعاً الكاسيت مفيهوش rca فقالى عادى هيتعمل كوبرى من الفيشة بتاعته للجى ام و هتركب فى الجى ام بفيشة مش بـrca و بخصوص السماعات هيكونوا اكتر للتربيل فهل 400 كويس ولا ضعيف

Pioneer TS-WX304T ده الموديل القديم 300 rms

Pioneer TS-WX305T ده الموديل الجديد 350 rms

ايوه يا باشا مهو الجي ام بيجي معاه فيشه بتركب فيه و الفيشه دي ببتوصل بسلوك السماعات اللي طالعه من الكاسيت 8 فرد تقريبا بس الموضوع ده مش في نفس نقاء ال rca وممكن يعمل معاك زنه في السماعات عموما مفيش مشكله انك تجرب قبل م تغرم نفسك وصل علي فيشه الجي ام واتوكل علي الله وشوف الصوت وان شاء الله يعجبك وميكنش فيه مشاكل

وبخصوص السماعات ال 400 كويسه مفيش مشاكل لانك كده هتاخد من السماعات صوت فقط ف هتقفل فلاتر البيز من الجي ام...
وتاخد من السماعات صوت بس ومن البازوكا بيز وكده عده بتبقي متناسقه ومهما تعلي هتسمع صوت كويس عشان البيز لوحده والصوت لوحده