المشاركة الأصلية كتبت بواسطة ashraf fawzy
من ناحية تيل الفرامل فده بيصفر مع القاعدة العريضة من ملاك العربية بعد 3000 كيلو, و بيخلص على حسب طبيعة الطرق اللى بتسوق عليها, يعنى لو بتسوق فى طرق داخلية و زحمة غالباً هاتحتاج تغيره على 10000 كيلو, هوا بيكون فيه يمشيك 2000 لـ 3000 بس التوكيل بينصحك بالتغيير فى صيانة الـ 10000 بدل ماترجع تانى.
ثبات العربية جيد جداً على الخطوط المستقيمة لغاية سرعة 160 (و ده بيختلف على حسب حمولة العربية, و مستوى ضغط الكاوتشات, و طبيعة الطريق و سرعة الهوا). لكن ثبات العربية فى المناورات - بنظام الزجزاج خصوصاً و فى الملفات عموماً - مش قد كدا, وده غالباً بسبب طول العربية و نظام التعليق الخلفى تورشم بيم مش مالتى لينك.
فى حاجات كتير لو هانتكلم عنها هانحتاج نألف كتاب, لكن عموماً السيارة جيدة جداً, بس لو صادفتك مشكلة فى العربية هاتصطدم بأكبر مشكلة فى العربية و هيا التوكيل بتاعها ... المستوى الفنى بصورة عامة ضعيف, هاتسمع دايماً تبريرات مستفزة منهم عشان يرموا المشكلة عليك.
لو نويت تشترى العربية, لازم تأمن عليها, عشان لو حصلت مشكلة فى العربية و إتسببت فى حادثة لا قدر الله, مش هاينفعك غير التأمين, إنسى إن التوكيل يعترف بخطأه.
حاجه أخيرة, كل ما أسأل واحد إيه أخبار العربية معاك بيكون رده "مقلب و شربناه" و اللى مش هايقولك كدا دلوقتى, ده لإنه الحمد لله لسه ماقابلش مشكلة معاها .... و ده مش لإن العربية فى حد ذاتها و بصورة عامة سيئة, لأ, لكن لإن أى عربية و أى منتج من المحتمل إن يظهر فيه عيب صناعة أو عيب عند الإستخدام فى بيئات العمل المختلفة, وزى ما قولتلك التوكيل مش هايسندك على الإطلاق.
يؤسفنى أقول إنى كنت برشح العربية - زى معظم ملاكها بس بتحفظ أكتر من ناس كتير - لغاية ما عملت حادثة بالعربية الإسبوع اللى فات نتيجة إن الفرامل حصل فيها مشكلة (هاعمل تقرير هنا مرفق بالصور بطبيعة و تفاصيل الحادثة و ملابستها و ردود التوكيل السلبية) , وبالرغم من إنى إشتكيت للتوكيل من فترة من موضوع الفرامل عندى و رحتلهم أكتر من مره, و بيرفضوا يكتبوا شكوتى فى شيت العمل و ماكنش فيه أى نوع من الإهتمام, لغاية ماحصل اللى حصل, و طبعاً بما إنى ماليش فى نظام التأمين فمافيش عندهم غير إنى لازم أتحمل المسؤلية كاملة.