https://fbcdn-sphotos-h-a.akamaihd.n...6f37290ff9f715
الله يسلمك, و الحمد لله إن المشكلة لما حصلت كانت على طريق جانبى و ماكنش فى عربيات معدية فى الوقت ده.
مش هاقدر اكتب هنا بالتفصيل تفاصيل كل حاجه, لكن كنبذة سريعة عسى انها تفيد حد ... من كام شهر لاحظت لما بكبس فرامل و يتصادف إن سرعتى تكون 20 كيلو بالظبط إن الفرامل بتفتح و تقفل (نظام الإيه بى إس) بقوة و العربية تترجرج و تمشى ما بين متر و نص لمترين لغاية ماتقف تماما (و ده على أسفلت ناشف معليهوش رمل او ميه او زيت). على خلاف اى سرعة تانية قريبة زى 22 أو 25 أو 30 كيلو, العربية بتكلبش و تقف مكانها زى الصخر من غير ماتسمع تخبيط التيل (طريقة عمل الإيه بى إس).
رحت التوكيل فى شهر أكتوبر 2014 (مركز أبو رواش و مركز غمرة بعد كدا) و بلغتهم بالمشكلة دى و عبرت عن قلقى إن ده ممكن يكون بداية لمشكلة أكبر قدام (هنا فى تفاصيل كتيرة قوى حصلت فى مركز أبورواش و مركز غمرة هابقى أكتبها إن شاء الله فى التقرير بتاعى عن الحادثة) , و طلع فنى و ساق العربية و خليته يجربها بنفسه و يشوف الفرق فى الفرملة على الـ 20 و على غير الـ 20 ... طبعاً كل مره يقولى ده نظام الإيه بى إس (أنا باشتكى من طريقة عمل الإيه بى إس و هما ردهم إن ده إيه بى إس!!) و بعد مارحتلهم 3 مرات (مع صيانة الـ 10000 و مع تركيب المثبت و مع تصليح صوت طقة قدام شمال فى المطبات و الحفر) فضلوا على نفس الرد إن ده نظام الإيه بى إس و إن فراملك سليمة و زى الفل و إن دى طريقة شغل فرامل العربية. و طبعاً كان فى كل مره رفض تام لكتابة شكوتى فى شيت العمل بتاع العربية بخصوص الفرامل و الرجرجة الغير مبررة.
فما كان منى إلا إنى عملت بوست على نايل موتورز و سألت بخصوص المشكلة دى عشان لما أروحلهم تانى, أو بمعنى أدق لما أروحلهم للمره الرابعة:
http://www.nilemotors.net/Nile/454918-301.html
من حوالى إسبوع و قبل ما أروح صيانة الـ 20000 كنت على سرعة 50 أو أقل بحاجه بسيطة و بهدى فرامل و انا ماشى خط مستقيم, العربية حدفت جامد بإتجاه الشمال.
ماكنش فى صوت فرقعة كاوتش و لا حاجه, وإتفديت الدخول فى السور اللى على شمالى بحوالى 3 أو 4 متر و لميت العربية ناحية اليمين وكبست فرامل عشان العربية تقف, لكن للإسف الفرامل مجمعتش و العربية فضلت ماشية حوالى 4 أو 5 متر (شارع جانبى صغير حارة واحدة رايح جاى مايشلش غير عربيتين) لغاية ماخبطت فى الصخور بتاعة المبانى اللى تحت الإنشاء اللى على اليمين و الكاوتشات بقت فى الهوا بتلف (ربنا ستر إنى مانزلتش لتحت ووقعت فى أرض المبانى).
دى ملابسات الأحداث اللى ادت للحادثة, أما ردود فعل التوكيل فأنا فى إنتظار ردهم عليا (كنت عندهم فى صلاح سالم يوم الأحد اللى فات و قابلت المهندس حسين مسؤل خدمة ما بعد البيع اللى وعدنى بالإتصال فى خلال يومين يكون درس إيه سبب المشكلة اللى أدت للحادثة, و للأسف لغاية دلوقتى ماسمعتش منه) , وأتمنى إنهم يتحملوا مسؤلية تقصيرهم (بدون تسويف و مماطلة) فى مراجعة نظام الفرامل عندى و اللى إتسببت فى الحادثة و اللى كان ممكن - لولا ستر ربنا - يتسبب فى حادثة كبيرة و جماعية لو كنت على طريق سريع. الحادثة بتاريخ 10 / فبراير / 2015 .
طبعاً أنا تفسيرى - و انا مش خبير عربيات, لكن ده إجتهاد بناءً على المعطيات و بحكم إنى كنت فى قلب الحدث - إن لما جيت اهدى, الفرامل قفلت (بصورة جزئية) على الفردة الشمال و مش على الفردة اليمين, و كان ممكن اطلع بدون أى خسائر لو الفرامل اشتغلت بعد كدا لما لميت العربية ناحية اليمين ورجعت بيها لنص الطريق, لكن للإسف ده محصلش, الفرامل ما أشتغلتش و اللى وقف العربية الصخور اللى على يمين الطريق.
زى ماقلت تفاصيل ذهابى للتوكيل أكتر من مره بخصوص الفرامل و تفاصيل ردود التوكيل على الحادث (فى مركز غمرة و مركز صلاح سالم) هاتكلم عنهم بالتفصيل أكتر لما تخلص المهلة اللى طلبها المهندس حسين مسؤل خدمة ما بعد البيع فى صلاح سالم عشان يفحصوا العربية و يعملوا المقايسة (العربية عندهم من يوم الثلاثاء الماضى 10 / 2 / 2015!!!).
الدروس الأولية اللى تستفاد منها هيا, لما تحس إن عندك اى مشكلة فى فرامل عربيتك (أيا كان ماركتها) تروح التوكيل, المشكلة ماتحلتش, عليك و على القسم تعمل محضر إثبات حالة و تطلع فورا على حماية المستهلك عشان تثبت حقك و تحفزهم إنهم يشتغلوا أكتر على حل مشكلتك.
حاجة اخيرة, انا قلت فوق هاختصر, و ده أقصى إختصار قدرت اعمله, انا بفكر اعمل فيديو اشرح فيه كل ملابسات و تداعيات الموقف, لإن الموضوع كبير و فيه تفاصيل و صور و فيديوهات و صدامات و شغل بلطجة من موظفين التوكيل فى مركز أبو رواش لما أشتكيت من موضوع الفرامل.