اخواني بالمنتدي
ممكن حد يساعدني منين اجيب العربية الهيونداي ix35 fully loaded 2015 باحسن سعر ؟؟
و تكون تسليم فوري و اعرف اختار اللون المناسب
و ممكن لو حد عنده أي ملاحظة سلبية عن العربية اكيدة يقولي عليها بردو
شكرا مقدما
عرض للطباعة
اخواني بالمنتدي
ممكن حد يساعدني منين اجيب العربية الهيونداي ix35 fully loaded 2015 باحسن سعر ؟؟
و تكون تسليم فوري و اعرف اختار اللون المناسب
و ممكن لو حد عنده أي ملاحظة سلبية عن العربية اكيدة يقولي عليها بردو
شكرا مقدما
أوتو سمير ريان عنده كل الفئات و الألوان تسليم فوري
و هتلاقي عنده السبورتاج و القاشقاي لو حابب تبص عليهم
+1 تمام
بالنسبة للعيوب الحمد لله مافيش عيوب قوية في العربية
- طبعا اولهم حجم العربية كان عايز موتور اقوي بس الموتور اللي فيها بيعمل الواجب كويس
- العفشة قوية بس مش ناشفه علشان تدي ثبات لعربية بالارتفاع ده
- عدم وجود جهاز انذار متطور يليق بيها
- عدم غلق المرايا و الزجاج و فتحة السقف مع اغلاق السيارة
- عدم وجود dvd حتى فى الفئة الاعلي
و لو افتكرت حاجة تانى حكتبها
بجد هي اختيار ممتاز للفئة دي و لو رجع بيا الزمان اختارها تاني
لو حبيت تسأل عن اي شيئ تفضل
ربنا يبارك لك فيها و تشوف فيها اوقات سعيدة
مبروك مقدما
الف شكر ليكوا.
بس سؤال تاني. انا راكب دلوقتي جيتا.
ناس كتير بتقولي حتحس بفرق. و اشتري x3 مستعمله احسن
بس بصراحه انا شايف الزيرو طعم تاني. و الناس كلها بتشكر في الهيونداي
- اية رأيك فى الاكسنت
- هل بتحب تمشى بسرعات كبيرة
الاكسنت مع المدام عندي. عربيه عمليه و معقوله.
بالنسبه للسرعه خلاص كبرنا عليها. اخري دلوقتي لو طريق نظيف ١٦٠ مثلا
يبقي الـix 35 مناسبة جدا لسيادتك طبعا البي ام عربية لا غبار عليها و ان لفيت اللفة دي من حوالي 5 شهور و ربنا وفقني للـix 35 و الحمد لله 4 شهور استعمال لم تخيب ظني ابداع جديد من هيونداي
مرة تانية اسأل و انا اجيب لو عندك اي استفسار
تحياتي
العربيه بس الله ما شاء الله جميله ..معايا بقالها سته شهور ..مافيهاش مشاكل الحمد لله ..بجرى بيها وباخد ملفات على 140 ..نظام الثبات رائع ..لكن طبعا خلى بالك لان اى عربيه عاليه مهما كان نوعها .ثباتها فى الغرز صعب ...مشكلتها زى ما قالوا ان المرايات والسنتر مابيقفلش مع اللوك وانا بقفلها وماشى ....وان السنتر مابيقفلش لوحدة بعد ما اركب العربيه ....وان مافيهاش تكييف ورا ..بس انا اكتشفت حاجه ومش عارف هيه اكتشاف ولا الناس عارفها ..ان تحت الكراسي الاماميه فيه زي انبوب به فتحات بيضخ التكييف للخلف ..وبحاول ابتكر واعمل حاجه اعليه بيها علشان يطلع ورا اكتر
تسلمولي علي ردودكم
أحتمال أكون انا واحد من اقدم الناس ال أشترت العربية (((ابريل2013- اول دفعة نزلت مصر)))يعنى استخدمتها حوالى سنتين و14 الف كيلو متر،،،،، ملخص الكلام افضل عربيها في فئتها الموجودة في مصر (((من وجهة نظرى))) .
الاسبورتاج الأقرب ليها ، الix35 بتزيد عليها في بعض الاوبشن وارخص منها ، ومسالة الشكل ازواق (من وجهة نظرى الix35 أفضل)، وعلى فكرة انا كنت حاجز الاسبورتاج ودافع المقدم قبل ما تنزل الix35 ولما نزلت سحبت المقدم واشتريت الix35.
ان شاء الله هتعجبك وربنا يباركلك فيها مقدماً،،،،،،،،،،،،،،،،،،، ،،
ودى تقرير كنت عملة بعد استخدام العربية لمدة 12 شهر أتمنى يفيدك.
http://www.nilemotors.net/Nile/42001...12-8000-a.html
تسلم يا باشا
الف مبروك و ربنا يديلك خيرها و يكفيك شرها
الف الف مبروك ,, عربية جميلة
شكرا لكم جميعا
اولا حتحس بفرق رهيب بين الجيتا وبين دى
ثانيا سبورتاج و 35 نفس السيارة مع اختلاف الشكل الخارجى والداخلى
الشكل طبعا الاسبورتاج
عمليا اى 35 افضل ايرو ديناميك افضل بكتر من الاسبورتاج
العزل الصوتى مش حالك بس طبعا مع الايرو دينامك لل 35 كويس ولكن فى الاسبورتاج تعبان جدا جدا
الثبات لحد 130 معقول
الفرامل للاسف سيئة بمعنى ان انت مينفعش تبقى ماشى 120 وتقول انا عاوز اقف فتقف يعنى فرامل براحة وامشى بهدووووء
الغرز لا انصحك ابدا
الامان للاسف مفيش غير ايرباج للسائق بس وتقريبا الفل بيكون فيها 2 بس عشان البرنس اللى قاعد جمبك كمان
فى الحوادث للاسف بتتقلب بسهولة جدا ودى مشكلة فظيعة وخصوصا لو الخبطة من اى طرف امامى
طبعا فرشها وامكانيتها وكماليتها لا مقارنة بالالمانى اطلاقا
التعليق سيارة مدينة بحتة او سيارة مدقات بإمكانيات متواضعة وتقفيل جيد الى حد ما (يعنى ما تتوقعش انك تمشى فى المدقات كتير وتلاقى الفرش بعد فترة محتاج تربيط واصوات بقى وحركات
طبعا انصحك ابحث كتير فى الموضوع قبل ما تفكر تشتريها
صديق عزيز قالى كلمة الانسان بيضور على شئ يكتسبة مش شئ يفقده
وللاسف دى حتخليك تفقد كتيرررر من المميزات اللى معاك
انا عمال اجرب العربيتين كويس. و قوه ال x3 بصراحه حتي انها مستعمله بتبهرني
الحقيقة يا أستاذ عمر انا طول عمرى متعود احترام اراء الاخرين ، حتى لو اختلفت معهم.
لاكن كلام حضرتك على ال ix35 مينفعش يقبل جملة او تفصيلا ، لانة من وجهة نظرى ولو سامحتنى حضرتك لايعكس الا شيىء واحد فقط !!!!!
هو ان حضرتك عمرك ما جربت العربية قبل كدة او حتى ركبتها ، او حتى اعتمت فى رأيك على واحد جربها او حتى شفها من بعيد.
لان حضرتك بتتكلم على مواصفات وفنيات وكفاءة أداء لا تنتمى للعربية من قريب او بعيد باى صلة.
استاذى عمر انا بقول الكلام دى لانى مجرب العربية من ابريل 2013، وكان معايا قبلها تويوتا واوبل وابيزا وبولو يعنى موش بعيد عن الالمانى فحكمى برضة مبنى على تجربة حقيقة موش سماعى.
حضرتك بتوصف عربية تانية خالص خالص خالص ، يا ريت قبل ما تقول رايك والممكن ياثر على قرار شخص تانى (وعلشان تكون امين في نصيحتك ) تحاول تجرب العربية او حتى تتفرج عليها وهى واقفة اعتقد رأيك هيختلف 360 درجة على اقل تقدير.
ارجو انك تتقبل اعتذاري ولاكن كلام حضرتك سامحني (استفذني)..... اشكرك على حسن قبول الاختلاف في الرأي.
للاسف يا صديقى كلامى مش غلط بس يمكن طبيعة البيئة اللى انا عايش فيها محتلفة شوية وان الجري بالعربية دا شئ طبيعى جدا فأنا كل اللى وضحتة انها عربية لازم لها ظروف معينة فى القيادة
اما موضوع انك تدخل الالمانى فى الموضوع مينفعش خالص خالص
اما الحوادث فأنا شفت لها حادثتين ابشع من بعض
واحدة كل اللى فيها ماتو
والتانية طلع السائق سليم بعد ما تقلبت بة
عموما هى عربية مدينة عاوزة سواقة محترمة وهادية وعاوزة واخد عاقل يسوقها
السواق اللي اتقلب بيها و خرج سايم اسمه ايه ؟؟ :)
تحياتي اولا
-ما هي السيارة المعصومة من الحوادث؟
-مين اللي قال انها افضل من الالماني
-و ما هو الفرق الرهيب اللي سيادتك تفضلت و اتكلمت عليه
-و فرامل اية اللي سيئة اكيد سيادتك مش تقصد الـix35
-اعتقد الغرز مع عربية بالارتفاع ده تهور اساسا (لو تلاحظ انا سألت الراجل في اول الموضوع اذا كان بيجري)
- لو فيها 20 ايرباج يبقى اية لزومهم او مش رابط حزام الامان (محدش بيربط الحزام)
-و في الحوداث حفظنا الله و اياكم اى عربية تتخبط من الامام معرضة تتقلب و بالذات العربيات العاليا اشمعني الـix35 اللي حضرتك ذكرتها
-فرشها و امكانياتها و كامليتها ما لهم مش فاهم ا-خالد صاحب الموضوع حيجيب اعلى فئة
- مش فاهم حضرتك حبت موضوع الفرش و الحركات و الخبط وعربية مدينة دي منين مش قادر افهم بصراحة
-وبردو مش فاهم ا/خالد واخد القرار و عليه ذكرت له عيوب السيارة بحيادية في اول الموضوع ولم اذكر له مميزات علشان يكتشفها و يفرح بيها لوحده
بصراحة سيدي اراك متحامل على السيارة بما لا تستحق
و اخيرا ا/خالد بنفسة قال انا كبرت وبطلت جري (زي تماما)
و سيادتك ا/ عمرو عايش في بيئه مختلفة و بتحب تجري و تتشاقة و لسه شباب
وتقبل مروري و احترامي
تحياتي للجميع
ا/ سيد تحية كريمة لشخصك الجميل
انت رائد الـIX35 و كنت من ضمن اهم الاسباب اني اشترها باركها الله لك
و بعد استعمال 4 اشهر وحوالي 4500كم أحب اشكرك جدا جدا جدا
تحياتي :openflower3::openflower3::openflower3::openflower 3::openflower3::openflower3:
ربنا يبركلكوا في عربياتكوا.
و عامه و الله العربيه قبل اي شئ هي راحه نفسيه و مزاج يختلف مع كل واحد.
نصيحة من راكب للعربيتين الجيتا بتاعتى والهيونداى بتاعه اخويا اياك ثم اياك ثم اياك ثم اياك تنزل من الجيتا وتركب هيونداى هتحس بفرق كبير بين العربيتين ودا من حيث
1 التقفيل
العربية من جوة بتزيق وبتطلع اصوات من الصالون ومن وجهة نظرى الشخصية حرام فيها المبلغ دا
2 الخامات
المستخدم فيها اغلبة بلاستيك ردئ
3 الكماليات
كماليتها عادية لان الى معانا تاني فئة موديل 2013 الى كانت ب 215 او 220 مش متذكر
4 الثبات وعوامل الامان
فى الهيونداى 2 ايرباج والجيتا 10 ايرباج ودى طبعا لصالح الجيتا
قوة صاج الجيتا فى مقابل الورق الى بيقولو علية صاج فى الهيونداى
الثبات الرائع الذى تتميز بة الجيتا عن الهيونداى
قوة تحمل الجيتا فى بلدنا الجميلة ودا عن تجربة لان مفيش عربية استحملتنى زيها والحمد لله
من اكتر حاجة بتضايقنى فى ix35 انها خفيفة جدا بالذات فى الطلعة الاولى بالعربية
قطع غيارها غالية وصيانتها غالية عند غبور الحرامى وماتستاهلش انىا ادفع فى صيانة 20000 كم 900 جنية
مميزات ix35
الوسع الداخلى للسيارة
التكيف الرهيب طبعا
اولا اختلاف الراى لا يفسد للود قضيه . انتو هتتخانقوا ليه !!!!
انا برضه محتار حيره كبيره جدا انا لو اشتريت ix35 هشترى الفئة التانيه و طبعا من غير ليدات فشكلها مش عاجبنى و الصراحة مستخسر ادفع حوالى 230,000 فعربيه ولا فيها فتحة سقف ولا ليدات و الخامات مش كويسه اوى .
فاقول لنفسى البيجو 3008 احسن لكن برضه ليها عيوب وهى انها عربيه حساسه و لازم تلتزم بالصيانات و لو ملتزمتش بالصيانات هتبدا العربيه تعمل اصوات غريبه .
قلت نشوف السوبارو xv لقيت ناس بتقول الcvt مش ممتع فى السواقه
يعنى من الاخر كده انا اقتنعت ان مفيش ولا عربيه من اللى انا ذكرتهم تستاهل سعرها و طبعا القاشقاى الجديده موتورها عايز بنزين ٩٥ يعنى من الاخر كلهم عربيات فافى و مش مقتنع بولا واحده منهم
انا بدات افكر فى جيب شيروكى kk مستعمله و لو على الضريبه و البنزين انا ممكن استحملهم فى مقابل انى هبقى راكب عربيه وحش و ماتور جبار و عربيه تفوت فى الحديد و كمان شكلها يفرح كده و ضخمه بحوالى 220,000 .
لكن انت لو معاك 250,000 انصحك اوعى تصرفهم فى العربيات دى هات بى ام x1 مستعمله علشان الصراحه الx3 شكلها مش حلو .
ولو قلقان من حكاية ثبات الجيب سيبك من الكلام ده . يعنى لو الجيب مش ثابته يبقى مين اللى ثابت
و ده مجرد راى
رايى الشخصى
رايى الشخصى
رايى الشخصىىىىىىىى
شكرا لكم جميعا. و الله احترت اكتر :)
اذا انت مش مستعجل ومحتاج عربية فى حجم 35 ممكن تنتظر
هوندا حتنزل hrv مرة تانية فى بداية الربيع وممكن تدخل الموقع الرسمى تتفرج عليها
أستاذ خالد ،،،،، انسى ان في اثنين هيتفقوا على حاجة !!!
وكل ما هتسمع اراء اكتر هتحتار اكتر
علشان كدة القرار في الاخر خاص بيك انت ، واى قرار لازم يكون فية نسبة مجازفة، واى كانت نتيجة اختيارك في الاخر دى عربية ، وممكن تعجبك او لا وموش نهاية الكون.
كل واحد بيتكلم عن تجربتة الشخصية ، الراكب الجيتا شايفها احسن عربية في العالم وانك لو نزلت من المانى لكورى هتروح النار وهيكون محرم عليك دخول الجنة....
والراكب الهيونداى شايفها ممتازة وهايلة وكل يوم بيصلى ركعتين شكر لربنا انة اكرمة بشراها.
في النهاية استخر ربنا وان شاء الله هيكرمك للافضل ، ال هى طبعاً الهيونداى(ix35).
يا جماعة ما ينفعش في عام 2015 واحنا لسة بنتكلم على السيارات الكوري انها درجة تانية ، الموضوع دى عدى وفات خلاص ، العالم دلوقتى بيتكلم على السيارات الصينى، يعنى مرحلة الكوري عدت زى ما قبلها عدت مرحلة الياباني.
:36_1_31:
اساذ سيد كلام حضرتك يحترم وعلى العين والرأس بس فكرة 2015 وان الكورى واليابانى والاوروبى والكلام دا معتش بيفرق اقولا لا الكلام دا بيفرق وبالذات فى عوامل الامان انا معاك ان الهيونداى عاملة شغل حلو محدش ينكر واشكال جميلة واوبشن حلو على العين وعلى الراس بس لما توصل لنقطة عوامل الامان والثبات لحد هنا وستوب لان النقطة دى بتفرق من عربية لعربية انا عارف ان الحافظ هو الله سبحانة وتعالى ولكن الله سبحانة وتعالى قال خد بالاسباب حضرتك منحاز للعربية دا حقك ومن حقك تشفها احسن عربية لان المبلغ الى انت دفعتة بردو مش قليل فا ربنا يباركلك فيها ويكفيك شرها ويحفظهالك من كل شر بالنسبة للعربية الى عندنا موديل 2013 استلام شهر 5 كدا العربية عندنا داخلة فى سنتين اسمحلى اقولك ان العربية ظهر عليها البهدلة فى الصاج ورغم ان اخويا من النوع الى بيحافظ على الحاجة بتاعتة والله على ما اقول شهيد بس شوارعنا الجميلة والناس الاجمل الى فى شوارعنا الجميلة خلت العربية ما شاء الله حكة فى جنب خبطة فى جنب وظهر على العربية البهدلة.
حضرتك هتقولى دا عيب سواقة هقولك انا معاك بس فى نقطة ان ضعف صاج العربية يخليها ما تتحملش ارف بلدنا
فرامل العربية ما شاء الله حلوة يعنى العربية معانا ماشية 25000 كم وفرامها كويسة جدا ودى نقطة لصالحها بس عيب توكيلها ان كل 10000كم بيقولك غير التيل اهو نصب من وكيل نصاب حرامى
بالنسبة لنقطة ان الجيتا احسن عربية فى العالم : انا بقولك لا مش احسن عربية فى العالم بس على الاقل من العربيات الكويسة جدا فى فئتها بسبب الثبات الممتاز والاكثر من رائع والفخامة والراحة والكماليات الى فيها ووسائل الامان الى مش موجودة فى هيونداى فى الفئات المتوسطة ومابتنزلش غير فى عربية زى السوناتا عشان تركبها تدفعلك مش اقل من 400 الف جنية
من عيوب الجيتا : انخفاض ارتفاعها على الارض وغلاء بعض اسعار قطع غيارها والتكيف فى الصيف مش قوى زى اليابانى والكورى
بالنسبة لنقطة جنه ونار مش هقدر ارد عليك فيها لان حاجة فى علم الغيب بس فى نقطة عشان ماتقولش انى متحامل على الكورى وبدافع عن الالمانى كأنهم شركات اهلى .
فى البيت عندنا عربيات اخواتى كلهم كورى هيونداى وكيا
اختى معاها كيا ريو وانا الى شاريها ومختارها ليها ولما بسوقها بكون مستمتع بسواقتها جدا عن الهيونداى بتاعة اخويا وعندنا فى العيلة 2 سيراتو 2011 و 2012 الشكل القديم.
ولى صديق واكتر من اخ انا اختارة لية كيا سيراتو 2014 عربية للمدينة وتكون كبيرة وعربية جميلة جدا
كنت هبيع الجيتا واجيب سيراتو 2014 فولى لودد بس لما الريو اتخبطت منى رجعت فى كلامى لان العربيات دى صاجها ورق لان دخل فيا ميكروباص من الشنطة من ورا بوظهالى . والميكروباص ماحصل لية شيئ
بالنسبة للجيتا دخلت فيا عربية نص نقل محملة كل الى حصل عندى ان الاكصدام فى جزء دخل جوة وكان عاوز يتظبط وبوية الاكصدام فرقعت لانى كنت راشش اكصدام قبل كدا.
بالنسبة للعربية النص نقل حصل فيها كالاتى : الاكصدام وقع الريادتير خرج من مكانة والمروحة اتكسرت والشبكة على ما افتكر اتكسر منها جزء ودا الى افتكرة
تعالى نحسب تكلفة تصليح الريو كلفتنى كام والجيتا كلفتنى كام
الريو : صرفت كالاتى
عاكس اكصدام 250 جنية
سمكرة ودهان للاكصدام حوالى 450 مع سمكرة الشنطة على البارد
تغير حساس ركن خلفى باظ من الخبطة فى التوكيل لانة مش موجود كلفنى 900 جنية
بالنسبة للجيتا صرفت 100 او 150 سمكرة لان من شدة الخبطة العربية اتحركت للامام والرفرف الامامى يمين اتخبط وكلة كان على البارد
عرفت يا استاذ سيد بتفرق فى اية : هو كلة نصيب بس بردو فى حاجات صغيرة فى ركوبة العربيات بتفرق بس لما الاقى الكورى مصاريف تشغيلة مقاربة لليابانى والالمانى يبئة اركب اليابانى والالمانى افضل طبعا
فى نقطة كمان انت مش واخد بالك منها ان الى فى الشغلانة من 100 سنة غير الى فيها من 50 غير الى فيها من 20 يعنى بردو الخبرة فيها فرق
عشان ماتقولش انى متحامل على الكورى والصينى من العربيات الى بحترمها جدا البرليانس frv cross لان العربية دى صاجها انشف واقوى وامتن من صاج عربيتك وعربية اخويا
فكرة انتقاد عربية مش عشان كورى ويابانى والمانى والكلام دا لا عشان تجربة جربتها وعرفت مميزاتها وعرفت عيوبها وعشان انت لما تكون راكب عربية فيها اية ومميزاتها اية وعيوبها اية ولما تنزل منها هتتنازل عن اية مقابل اية
واسف على الاطالة
اخ خالد ممكن تفكر فى المازدا 3 لو عاوز تنزل من الجيتا وتركب حاجة فى مستواها كا سيدان بس عيبها انها مع غبور
أسمحلى ارفع ليك القبعة................
بارك الله فيك وفى تعقيبك الممتاز..................
بداية ، انا على فكرة مكنتش بقول الكلام بالشكل الجد الحضرتك فهمتة ، بقدر ما كان قصدى نفك شوية لانى حسيت الموضوع داخل في الغميق شوية.
وحضرتك في كلامك اكدت ال انا قولتة وهو (التجربة الشخصية لكل واحد) ، انا والحمد لله معايا الix35 من ابريل 2013 وتجربتى معاها بفضل الله تخلينى اشجع اى واحد على شراها، لو سألني.
لانى مشفتش منها حاجة وحشة ، وانا عامل 15000كم حتى الان بس مغيرتش غير الزيت والفلتر في الصيانة الدورية معرفش موضوع الفرامل (يمكن حسب الاستخدام).
وعلى فكرة انا كان معايا من 7 سنين تقريباً اوبل واحد صاحبى كان جايبة لى من المانيا ،،،، وبعتها بعد اقل من سنة وخسرت فيها بسبب مشاكل كانت فيها وقطع الغيار والصيانة ومنصور (ما ادراك ما منصور)..... هل معنى كدة ان الاوبل عربية سيئة وانصح اى واحد انة ما يشتريهاش ، دى كانت حالة فردية وتجربة شخصية موش شرط هتكون في كل العربيات الاوبل.
لاكن برضة يا صديقى العزيز الكوري وصل لمراحل من التقنية والجودة والأمان ، المينفعش معاها نعتبرة درجة تانية بعد الاوربى ..... ودى بشهادة اوربا نفسها البتصنع الاوربى !
في الاخر تقدر تعتبر ان رضا كل واحد عن عربيتة دى شيء من القناعة بما رزقة الله ، وربنا يدومها نعمة، والعربيات كلها حلوة وكل سنة وانتوا طيبين ،،،،،
شكرا يا جماعه علي ردودكم. و ربنا يوفق كل واحد في عربيته.
و بالنسبه ليا انا غالبا عشان لازم محتاج عربيه عائليه و عاليه فقررت اني احصر اختياراتي بين
x3 موديل ٢٠١٠
او شيروكي ٢٠١٢
و حستخير ربنا كويس. و دعواتكم.
ربنا يوفقكم لما فيه الخير و يكرمكم بما يريح بالكم
و يكرمك يا رب و تجيب بدل العربيه ٢٠