المشاركة الأصلية كتبت بواسطة م/أحمد عبد الفتاح
اللى اقصده انها مش حاتستحمل معاك مشاوير نتيجة التقادم بتاعها وقلة عدد الناس اللى بتشتغل فيها وتفهم فيها وكمان قلة قطع الغيار فى مصر - لو حاتجددها مظبوظ زى ماقلتلك قبل كده حتبقى عاوزة مبلغ كبير ووقت كبير وصنايعية فاهمين فيها وفاهمين فى الات الجر والعفشة بتوعها . لكن لو حاتشدها شده عادية وتظبيط حاتبقى استخدامها كسيارة غيه ومش عاوزة بهدلة علشان متقعش منك وتبهدلك فى المشاوير البعيدة - علشان تسافر بيها سيوة حاتبقى عاوز عربية تفوت فى الحديد متانة وتحمل وسرعة لأنك ماشى فى صحرا ومعرض فى اى وقت للخطر فى الاحوال اللى احنا فيها دلوقتى - حيبقى مافيش قدامك غير حلين :
**** انك تجيبها وتشدها صح :
١- حتفك الصندوق وحتفك الكابينة وتخلعهم وقبل كده حاتفك الضفيرة والكونترولات او صناديق الفيوزات والتحكم والتابلوة والفرش. تودى الكابينة والصندوق للسمكرى والفرش والتابلوة للسروجى
٢- حتبقى العربية شاسية والات جر وموتور - تفك الكردان الامامى والخلفى وتغير الصلايب وتقيس الكردانين على مخرطة علشان لو فيهم رفه حاتغيرهم.
٣- حاتفك الموتور بالجيربوكس ولو كويس حاتسيبه على جنب ولو فيه مشاكل يبقى تغيره بموتور جامبو زى المهندس احمد ماقالك .
٤- حاتفك العجل بالجنوط وحاتشوف حالة الجنوط وتشوف فيها رفه ولا لأ على الجهاز اللى عند بتوع الكاوتش ولو فيهم مشاكل حاتغيرهم . وطبعاً حاتجيب كاوتش محترم بتاع اسفلت وصحرا all terrain زى مثلاً ماركة bfgoodrich وماركة michelin latitude cross مقاس p265-70-r15.
٥- حاتقعد الشاسية بعد فك العجل والجنوط على حوامل- وتفك عمود وصلايب الدركسيون والتياش وتبدأ تدور على الصلايب والتياش والبيضات بتوع اى عربية تانية ( اعتقد الشيروكى القديم حاينفع)
٦- حتبدأ تفك العفشة الامامية بالكورونة والاكسات والطنابير وكذلك العفشة الخلفية وتفصصهم بقى صلايب امامية ومقصات وبنوز وسوست وورق ومساعدين وطنابير وبلى ومجموعة فرامل وتيل وكل المستلزمات - وتكشف على الكوارين والاكسات وتشوف هل فيه رايش فى الزيت بتاع الكوارين يعنى حاينفعوا ولا حايتغيروا - سبق وذكرتلك لازم تكون المعلومات الاصلية للعربية متوفرة علشان نعرف نسبة التخفيض علشان لو حاتغيرهم يبقى بنفس المواصفة.( أحيانا بيبقى مكتوب على الكورونة نسبة التخفيض).
٧- تفك التانك وتختبره وتشوف حالته مخروم ولا فيه بارومة والعوامة والطلمبة والخراطيم تتغير كلها - ولو بايظ حاتفصل تانك جديد ولو سليم يبقى يتروق غسيل ودهان ويستحسن كده كده تفصل او تشترى تانك تانى علشان المشاوير الطويلة بتاعة سيوة.
٨- تفك الجاكمان وتشوف محتاج تغيير ( اعتقد يتغير احسن)
٩- حتفك كل المواسير والخراطيم بتوع الفرامل والبنزين وكابل فرامل اليد وبعدين ترمل الشاسية ويترش ايبوكسى وبطانة ولون اسود او توديه عند حد يعالجه فى حوض .
١٠- حاترجع المواسير والخراطيم الجديدة والتانكات زى ماكانت بكلبسات ومسامير جديدة
١١- حاتجمع كل اللى اتفك تانى بعد التجديد ومتنساش تغيركاوتش الصندوق والكابينةومساميرهم.
١٢- لو الموتور كويس يبقى تغيير الجوانات بتاعة الكارتير والكاربراتير والفرن والحر .
١٣- تغيير زيوت الفرامل والمساتر وتغييرالسيرفو وزيت الفتيس وزيوت الكورونات الامامية والخلفية والوسطى (فتييس الغرز).
**** الحل التانى تشوف عربية دبابة عالزيرو او استعمال خفيف وتريح دماغك.
الكلام ده طبعاً علشان حجم الموضوع كله يبقى مفتوح قدامك والقرار ليك .
وتحت امرك فى اى استفسار واحنا معاك متابعين.