ماروتى آه... ماروتى لأ ؟؟؟
السلام عليكم
أخوكم محتار جداً و محتاج نصيحتكم
الحمد لله معايا لادا 2105 ثمانينات على قد حالها
بس نفسى أغير و مش عارف أجيب إيه و عاجبانى الماروتى, يمكن لإنها على قد المبلغ المتاح كأعلى موديل, أى حاجة تانية هأفضل فى القديم.
أنا عملت مقارنة بينها و بين اللادا فى اللى ليها و اللى عليها
مشتركين فى حاجات كتير بإستثناء...
1- اللادا للتحمل و التحميل و ... تمام, عضم ناشف و أى ميكروباص يخاف يرمى عليك فى الطريق بخلاف الماروتى اللى كله بيرمى عليها. هل ده صحيح؟
2- وزن الماروتى خفيف, على قدر علمى حوالى 400 كم, فى حين اللادا أكتر من طن, و ده فى الثبات عالطريق معرفش إيه أخباره, خاصة أن كله بيقول بلاش تزود عن 100 كم/س مع الماروتى بالذات (و مع كل العربيات طبعاً بس دى بالأخص).
3- الأسرة صغيرة و معظم أنتقالاتى لواحدى, بس ميمنعش ييجى وقت و أركب 2 بالغين وراء هل مش هتستحمل و تفضل تحك فى المطبات و لا عادى؟
4- هل الشنطة بتاعتها بتتفتح من الخارج و لا ليها شداد من جوه زى العربيات الحديثة؟ لأنى أتعرضت للسرقة 3 مرات ورا بعض.
كل ما أسأل حد يبصلى بنظرة دونية و يمدّ بوزه كما لو كنت بأتكلم على موتوسيكل صينى, و يقولى يا أبنى دى ميدالية و علبة كبريت و توكتوك و عربية لعبه .....
معلش ساعدونى فى أجابة الـ 4 نقط اللى فوق دول علشان أحسم أمرى و ربنا يوفقنا لما فيه الخير.