بعد اذن حضراتكم انا عندى استفسار (عن الميجان 2005) هو احنا بنغير زيت الفتيس ولا بنزوده ولا ايه الصح ؟؟
لو بيتغير او بيتزود ايه هو النوع المناسب ؟؟؟ وبيتعمل عند اى ميكانيكى ؟؟؟
وامتى نعرف ان الزيت محتاج يتغير ؟؟؟
عرض للطباعة
بعد اذن حضراتكم انا عندى استفسار (عن الميجان 2005) هو احنا بنغير زيت الفتيس ولا بنزوده ولا ايه الصح ؟؟
لو بيتغير او بيتزود ايه هو النوع المناسب ؟؟؟ وبيتعمل عند اى ميكانيكى ؟؟؟
وامتى نعرف ان الزيت محتاج يتغير ؟؟؟
بتعرف إن الزيت محتاج يتيغير لما تلاقي في هبد مع النقلات أو تأخير أو نتش جامد ومفيش رسائل بتظهر عندك ع الشاشة إن في مشكلة في الحساسات. يعني مفيش Check gearbox إلخ
وممكن تعرف عملي بإنك تفك الطبة اللي تحت وتنزل شوية زيت تشوف لونهم عامل ايه: المفروض يكون أحمر.
النوع المناسب: توتال D3 SYN - فالفولاين Dex/Merc - ليكوي مولي توب تيك 1200
العربية بتاخد تقريبا 3.5 لتر أو أزيد حاجة بسيطة ومفيش مقاس للزيت..يعني ممكن تعاير الزيت اللي هينزل من عندك لو هو زيت الفبريكة.
ممكن أي ميكانيكي يعمل الحكاية دي عادي بس تحت إشرافك عشان ميعكش :D
لو معندكش خبرة ومش عارف أماكن الطبات..ممكن تغيره عند فرينش موتورز عشان التوكيل مش بيرضى يغير الزيت. :Copy of majd(4):
طبقا للكلام التوكيل ما بيتغيرش الا لما يكون فيه مشكلة
زيت موبيل atf 320 اللتر ب 60 جنية بتحط حوالي 5 لتر بس مش متاكد من الكمية انا عاوز اتاكد
هي الحوارات كتير
التوكيل بيقول لو اتغير من غير ما يكون فيه مشكلة , و يتفتح من الآخر , بيبوظ الفتيس
شوية بحث كده هانكتشف ان الفتيس فيه 6 لتر زيت و الناس اللي بتغير بتروح مغيرة منهم 3 لتر بس , دول اللي بيطولوهم
هل ده سبب ان الفتيس بيبوظ فعلا لما يتغير الزيت ؟ وارد جدا بس الله اعلم هو فعلا السبب ولا لأ
خصوصا لو عرفنا ان الزيت اللي فيه من الفابريكة زيت تخليقي و ان اغلب الناس بتغير بزيت معدني عشان ارخص طبعا
ايه الحل ؟ فيه ناس بتقول يتفتح الفتيس يتغير الزيت بالكامل و الفلتر
و فيه ناس , و الحل ده جاي من قسم شيفروليه بخصوص الكروز , كانوا اكتنشفوا طبة معينة بيتفضى منها ال3 لتر زيت اللي مش متطالين , بس في الحالة دي لازم يتغير الزيت مرتين ورا بعض على طول
كل كلامهم غلط وأنا ناقشت واحد فيهم معرفش يرد عليا..وممكن تقرأ الموضوع ده هيفسرلك حاجات كتير في موضوع الزيت بشكل عام.
Do You Really Need to Change the Transmission Fluid? - KickingTires
ممكن متغيرش الزيت لو مفيش مشكلة في الفتيس..إنما أقولك في مشكلة (مش سببها الكهرباء) وتقولي متغيروش يبقى كده انت بتدمر الفتيس فعليا
لو طلعت شوية زيت لقيت لونهم أسود..كده أسيب الزيت في الفتيس ازاي؟؟؟ طبعا مكنش عندهم رد مقنع. وفي الآخر فعلا لما نزلت الزيت لقيت لونه أسود فاحم وبعد تغيير الزيت اتحلت مشكلة العربية وماشي عليها بتاع 40 ألف كيلو أهو وبرنا يسترها معانا.
بالنسبة لنوع الزيت، كل الأنواع اللي انا ذكرتها في الموضوع زيوت تخليقية مش معدنية والمواصفة بتاعتها طبق الأصل لمواصفة زيت Elf Renaultmatic D3 اللي بتنزل بيه العربية
قصدك على التوكيل مش كده ؟
انا عن نفسي مش مقتنع بكلامهم خالص , بس ماقدرش اقترح على الناس حاجة ماحدش جربها و نجحت , الا على الاقل لما اقول انها ما اتجربتش , انا عن نفسي عربيتي عاملة 93 الف و ما غيرتش زيت فتيس ابدا و انا طبعا مش متطمن لكده خالص
ما تقدرش تسرد لنا تجربتك بالتفصيل طيب ؟
غيرت كام لتر ؟
فتحت الفتيس و غيرت الفلتر كمان ولا لأ ؟
ايه احساسك بالعربية قبل و بعد ؟
هو الموضوع حصل تقريبا على 70.000 كيلو.. العربية فجأة بقت تهبد في الغيار لما تيجي تهدي أو لما تقف وتيجي تطلع تاني تلاقيها نتشت الغيار الأول بغباء (نفس المشكلة اللي اتكلموا عليها الزملاء في موضوع طويل جدا هنا في المنتدى) كلمت كذا ميكانيكي معرفة قالي الزيت عايز يتغير..طيب يا جماعة شنابر الديل والسولونويد..قالك لأ دي مشكلة زيت.
طلعت ع التوكيل.. عايز أغير الزيت قالك لأ الزيت مش بيتغير..ليه يا جماعة، قالك هو رينو قالت كده لو الفتيس في مشكلة هنعمله عمرة هتتكلف من 5 إلى 7 آلاف جنيه (نفس الكلام اللي بيقولوه لكل حد يجيبلهم سيرة الفتيس عشان يريحو دماغهم) فأنا قولتله في فتيس بيتعمله عمرة على 70 ألف؟؟ وقعدت بقى في مناقشات إن الكلام ده بيخضع لظروف التشغيل، إفرض أنا قرصت على العربية أو العربية سخنت زي ما حصل معايا، أكيد الزيت هيبوظ..طبعا البعيد ولا هنا، اتصلت عملت شكوى فيه وبغتهم انه مكلفش نفسه حتى يجرب العربية أو يكشف عليها، وكالعادة اتصال ملوش معنى من الجماعة بتوع الشكاوى، وتعالى اقعد مع فلان وعلان..قلتلهم شكرا وأنا مش جايلكم التوكيل تاني أصلا..وفعلا كل الصيانات بعملها دلوقتي عند فرينش، على الأقل مفيش رزالة الانتظار والحجز بتاع التوكيل.
روحت عند الميكانيكي اللي بصلحها عنده، قالي هات زيت وتعالى..طلعت على بنزينة توتال على الدائري وجبت 4 كيلو..نزلنا الزيت وحطيناهم (الزيت القديم كان نازل طين فعلا!) بدون أي معايرة خالص. العربية تمشي زي الفل ولا أي هبد حصل بعد كده (طبعا النتشة اللي بتحصل أحيانا بين الأول والتاني دي اختفت بس بنسبة بسيطة أوي).
تاني مرة غيرته في فرينش موتورز وقالوا نفس الكلام اللي قاله التوكيل: فأنا قولتله بص الكلام ده كله فارغ، هتغير الزيت ولا أمشي، قالي خلاص هنغيره :D طب الزيت اللى هتستخدمه ايه: قالي توتال تخليقي..متأكد إنه تخليقي مش معدني؟ قالي أيوة. غيرته فعلا، والعربية تمام مفيش اختلاف.
عرفت بعد كده إن في طريقة لمعايرة الزيت كنت شرحتها أنا قبل كده في موضوع الأخ Super Star H ودي قرأتها في كتالوج عربية ستروين C4 (اللي هي فيها نفس الفتيس أصلا).
وعرفت بعد كده برضه إن الزيت الأبيض بتاع بيجو/ستروين ميفرقش حاجة عن الأحمر إلا إنه لزوجته أخف لكن مفيش فرق كبير، مشكلته إنه مش بيقعد كتير في المكنة وبيحتاج يتغير كل 30 ألف كيلو.
بس هي دي قصة حياتي مع الزيت :satelite:
الله ينور :)
معلش بقى طلب غلس شوية
ممكن تكوبي المشاركة دي , و كمان المشاركة التانية اللي بتقول عليها في موضوع الأخ Super Star H و تنزلهم في موضوع جديد خالص لافادة الزملا ؟ :)
Valvoline Maxlife ATF
Liquimoly TopTec ATF 1200
Liquimoly TopTec ATF 1100
Motul Multi ATF
Motul ATF 4
Xado ATF III/IV/V
استاذ رضوان , ايه اخبار الفتيس ؟ :)
طب عايز ابقى اعرف منك بقى مين الصنايعي اللي غيرت عنده الزيت اول مرة , و عايز اعرف غيره ازاي بالظبط
و عايز اعرف فرينش غيروه ازاي بالظبط :)
الصنايعي اللى غيره أول مرة.. نزل فك الطبتين اللى تحت وبعدين فتح الطبة اللي فوق وزود 4 كيلو زيت توتال عادي..والعربية مشيت تمام، بس قالي يستحين تغير الزيت تاني قريب عشان أكيد هيفضل زيت لسه في الفتيس.
وعليه قولت أروح لفرينش بقى..قالي هياخد 3 ساعات فقولتله ليه كل ده، قالي عشان بنعايره عند درجات حرارة معينة!! بعد بحث بقى على النت لقيت الطريقة اللي شرحتها في موضوع سابق في دليل صيانة بتاع سيتروين c4.. وهي حسب منا فاكر انك تفك الطبتين وتنزل الزيت كله وبعدين تحط 1 لتر زيت وتقفل الطبتين وتشغيل العربية وتحرك الفتيس على الغيارات كلها (تقريبا عشان الزيت يسخن)..وبعدين تريح طبة من اللي تحت حاجة بسيطة وتضيف الزيت من فوق لغاية ما ينقط من تحت، كده تقفل الطبة اللي تحت واللي فوق ويبقى الزيت مستواه مظبوط.
الله ينور
كده بقى له معاك 3 شهور صح ؟ ظهر حاجة ؟
عايز اعرف كمان , منين عرفت انه زيت مش شنابر ؟
و عربيتك وقتها كانت عاملة كام الف كيلو ؟
مظهرش أي حاجة..بالعكس أنا آخر حاجة بفكر فيها دلوقتي الفتيس! ولعلمك النتشة بين الاول والتاني مبتحصلش إلا في أول تشغيل العربية بس. بعد ما توصل للأربع شرطات، بتحصل نااادرا بأمانة.
عربيتي كانت عاملة 70.000 ومكنتش مقتنع بحوار الشنابر ده خالص وكنت متأكد انه الزيت مش عارف ليه :) وطبعا الميكانيكي قالي أسلم حل نغير الزيت الأول ونشوف هيحصل ايه. ومش عايز أقولك بقى لما روحت التوكيل وقالوا العربية عايزة عمرة فتيس!!!!! :angry27:
في ميكانيكي عادي خالص مش بتاع رينو قالي يا باشا الناس دي عالم هبلة، وبعدين مش كده الفتيس باظ وعايز عمرة؟ خلاص هاتو بقى نغير الزيت ونخلص عليه! :duh: :bubble:
الاخرانية دي وجهة نظر و الله ههههههههههههههههههههههههه هه
بالنسبة لحوار ان الفتيس بينتش قبل ما تسخن , هو ايه نوع الزيت اللي حطيته تاني معلش ؟ :)
بالنسبة لحتة 70 الف كيلو , فده مطابق للي سمعته , سمعت ان على ما العربية بتعدي 80 الف مثلا بيكون الرايش ملا الزيت و بتكون الفارغة نفسها اتاكلت عشان كده التغيير بيبوظ الدنيا لو كانت الفارغة اتاكلت
لا الفتيس مش بينتش، أنا قصدي النتشة بين الأول والتاني ودي موجودة في كل الميجان وأعتقد كل الفرنساوي كمان..النتشة دي كانت موجودة علطول قبل ما الزيت يتغير..بعد ما الزيت اتغير مبقتش تظهر غير مرة أو مرتين الصبح بدري أول ما تمشي بالعربية يعني.
في ملحوظة تانية: العربية قبل تغيير الزيت كانت صعبة أوي في المشي لو الدنيا زحمة أو حر..بعد تغيير الزيت بقت العكس بقى، تحس إن أدائها أحسن في الحر!!! الميجان دي دنيا لوحدها ههههههههه
بالنسبة للرايش، الحمد لله المرة الأولى لتغيير الزيت مكنش في رايش ولا حاجة..واللي اعرفه إن عدم تغيير الزيت على فترات قريبة هو اللي بيعمل الرايش ده! :duh:
ليه بقى؟ سعادتك ماشي على الزيت ودايس وخواص اللزوجة بتاعته انتهت، التروس بتحتك ببعضها وتتاكل ويبدأ تكون الرايش ده. إنما لو الزيت بتاعك سليم عمر ما هيبقى في رايش في الفتيس خالص.
همممم , مع اللي عامل 70 الف كيلو ممكن , انما اللي عمل 100 الف اظن فات الاوان و الله اعلم
انا عايز اعرف اسم الصنايعي اللي غيرت عنده اول مرة , يا ريت تعرفني هو مين , و لو على الخاص
طب ممكن تقولنا على الصنايعي اللى غيرلك زيت الفتيس ؟؟ او تبعتهولى على الخاص