الموضوع: موضوع خطير جدا وغريب ..أرجو المساعدة

المشاركة الأصلية كتبت بواسطة خالد دياب

يعني ايه مازدا فاسده ؟؟؟؟ برجاء التوضيح

ده كلام القهاوى اللى بيقولوه فى السوق المصرى العظيم، شغل فتى يعنى
كل ما تكلم الناس عن المازدا يقول لك المثل العظيم ده :-)
العربية ممتازة و هى افضل اليابانى حاليا رأسا برأس مع السيفيك و الأيمبريزا كل له مزايا تفوق فى نقاط معينة، المازدا الأجمل و الأشيك و صالون رائع واسع و عفشة ممتازة، الهوندا الأفضل فى المحرك و الإعتمادية، و الأيمبريزا بنظام القيادة all-wheel-drive

من وجهة نظري
المازدا عربية ممتازة نفس العيلة مع الفورد و الفولفو زي عيلة فولكس وسيات واسكودا و اودي.
العربية مش ناعمة زي العربيات الياباني هيا رياضية اكتر فالي متعود على ركوب اليابني مش بيقتنع بيها روكبها شبه الالماني ...فابيأثر على سعرها
الصالون و الشنطة ديقين لحد كبير جدا .فاتفقد الشريحة العائليه بيأثر على سعرها.
العربية مختلفة تماما عن الموديل السابق قطع الغيار مش كتير و غالية زيها زي الفوكاس و الفولفو اس 40.قطع غيار غالية و مش متوفرة على طول ودي اكتر حاجة تقتل سعر عربية في السوق المصري والدليل ان البوما و اية 4 مساكين سعر عشان رخص قطع الغيار .
الوكيل مهتم بالهيونداي اكتر يكاد يكون بيحارب العربية .
معظم الي بيجيب العربية شباب فصعب تلاقي عربية حالة ممتازة غالبا بتبقى متهانة بس عشان هيا عربية ممتازة بتستحمل .
اقرب الياباني للاسكودا حتكون المازدا فعلا مش حتس اوي بقطع الغيار الاثنين قريبن لبعض بس الوفرة و مراكز الصيانة لصالح الاسكودا بكتيير
الوسع حيفرق اوي لصالح الاسكودا.

المشاركة الأصلية كتبت بواسطة kaboky_2010

لا مهو لو قطع غيار المازدا زى الفانتازيا مش هجيب مازدا انا عايز اهرب من الفانتازيا عشان قطع الغيار وفرق السعر محتاجة لظروف خاصة ماليه عندى انا بفكر بردوا فى a4 والبوما يا جماعة بجد محتاج المساعدة وآراء الناس العنتيله فى المازدا

بص يا سيدى انا هحكيلك قصه شرائى للعربيه انا كان معايا لانوس 2 حبيت اغير لانى بصراحه مليت منها وحبيت اركب يابانى او المانى اتوماتيك المهم بدات ادور على حاجه مناسبه وبالصدفه شفت مازدا 3 مع واحد صاحبى بصراحه اتوهمت بيها عربيه ما شاء الله مش هزايد على كلام الزملاء اللى قالوا رايهم فيها ف البوستات اللى فاتت بس كالعاده كل ما اسال حد يقولى نفس الكلام الحمضان بتاع الشعب المصرى خليك ف لانسر او تويوتا كرولا بيتاباعو بسرعه ومنتشرين بينى وبينك ما كنتش مقتنع بكلامهم لان العربيات دى امه لا اله الا الله ركبتها وبقت تقليديه اوى بس قلت يا واد شوف برضه مش هتخسر حاجه لقيت كرولا 2002 فبريكه بس محتاجه تترش بيتكلم ف 90 الف ولانسر 2007 فبريكه حالتها معقوله بس كانت ماشيه 170 الف عايز فيها برضه 90 الف والاتنين محتاجين شغل وتظبيط وقرف شفت لانسر تانيه 2009 بيتكلم ف 110 الف هههههه ناس غلابه اوى بصراحه قرفت يعنى عربيات تقليديه ما فيهاش اوبشن شكلها الداخلى والخارجى من وجهه نظرى ضعيف وبيطابو ارقام خياليه المهم ف الاخر ربنا كرمنى بمازدا 3 2008 خليجى فبريقه بالكامل مع واحد مدير بنك العربيه بجد شدتنى لنضافتها ولمحافظته عليها اشترتها ب 90 الف برضه بس شتاااااان بينها وبين االانسر هتحس انك راكب حاجه محترمه ومميزه وصيانتها وقطع غيارها فرق بسيط جدا بينها وبين الانسر ف الاسعار وعلى فكره انت راكب اسكودا لو ركبت لانسر هتكره نفسك نصيحه دور على مازدا نضيفه مش هتندم

كل ما العربية انتشارها يقل، كل ما سعر إعادة بيعها يقل.. دي قاعدة ثابتة.. جرب تشتري بي إم دبليو أو مرسيدس موديل سنتين فاتوا.. أقل حاجة حتتكلم فيها 100 ألف جنيه ناقص عن سعرها الأصلي.. فكر في أي عربية انتشارها قليل، سواء غالية أو رخيصة، حتلاقي إن سعر إعادة بيعها بينزل الأرض... السوبارو الإمبريزا بتتباع مستعملة بكام؟ أغلى من المازدا المستعملة؟ أكيد لأ.
المازدا مش استثناء خالص عن القاعدة دي.. المازدا أقل انتشارا من الكورولا واللانسر والأوكتافيا، وبالتالي حتخسر فيها أكتر منهم لما تيجي تبيعها.. لو عايز تناقش بأة هي ليه أقل انتشارا فدي قصة تانية، لكن الردود اللي فوق ممكن تكون ادتك فكرة عن السبب.

المشاركة الأصلية كتبت بواسطة batman372

صديق لى اشترى مو ٢٠٠٨ الهاى لاين مستعمله حاله ممتازه عامله حوالى ٤٠ الف كم ... عربيه ممتازه فى كل شئ
لكنه باعها بعد سنتين لان المشكله الاساسيه التى كان دائم الشكوى منها هى عدم توافر بعض قطع الغيار ...
تحياتى ...

عدم توافرها فالتوكيل ولا فالسوق؟؟؟

تحياتى