وجهة نظرى وقد تحتمل الصواب أو الخطأ :
- الـعربيات الـ ٤x٤ فى مصر ليها طبيعة ومتطلبات مختلفة شوية عن البلاد التانية بمعنى ان معظم اللى عاوز يركب العربيات دى فى مصر بيفكر فى حاجة عالية عن الارض علشان متحكش من تحت - وعاوز حاجه تستحمل المطبات بتاعتنا وفى نفس الوقت عاوزها تبقى مريحة للى راكب جواها ودى صعبة طبعاً لأن العفشة القوية عمرها ماحاتبقى مريحة - وعاوزها موفرة فى البنزين ودى كمان صعبة لأن العربيات دى مواتيرها لازم تكون كبيرة علشان تستحمل وزنها الكبير وكمان الغرز فى الصحرا وتقدر تدى قوة وعزم يخليها تجتاز الصحرا بدون مشاكل - وعاوز قطع غيارها رخيصة ودى برضه صعبة لأن عفشة العربيات دى عدد القطع والمكونات بتاعتها كتيرة وبالتالى حاتتكلف علشان هى قطع كتيرة وكمان علشان حجم القطعة ووزنها أكبر من عفشة العربيات السيدان - وعاوز توكيلات محترمة وهنا بيستوى الكل سواء السيدان أو الدفع الرباعى .
- ولكن فى المقابل حاتوفر كام إصلاح فى الشكمان من الخبط فى المطبات - حاتوفر كام تمن مراية اتكسرت - حاتوفر كام مساعد ولا مقص ولا جلبة اتكسروا من مطب غلس - إيه يعديك من البرك بتاعة المجارى والمية ؟ - وشوية حاجات تانية
- الإعتمادية فى كل عربيات الدفع الرباعى عالية علشان مكونات العربية سواء بودى او عفشة أو مواتير كلها معمول حساب إنها تبقى مصممة للخدمة الشاقة والتراب والغرس والبهدلة - ولكن علشان تفضل الإعتمادية عالية لازم تعامل العربية كعربية عادية مش بلدوزر بمعنى إنها محتاجة صيانات زى العربيات السيدان من بوجيهات وزيوت وتيل وفلاتر وسيور عادى زى اى عربية فلازم تكون إيدك فيها باستمرار علشان تحافظ عليها.
- بالنسبة لعربيات الدفع الرباعى أنا حاتكلم عن مصر برضه "لايعلى على التويوتا اللاندكروزر كعربية دفع رباعى " - القديم منها متبهدل وصعب تلاقى حاجه مظبوطة وده مش عيب من العربية ده عيب مستخدمين وملاك لهذه السيارات نتيجة اهمالهم فى صيانات العربية وشغل الصنايعية التعبانة فى هذه السيارات ( غير كورونا بواحدة بتاعة نص نقل دبابة - حط عمود كرنك للموتور صينى - إلغى الفرامل ورا وطب المواسير - قيفلها عمود كردان بتاع دبابة ولا جامبو - إلحم الموتور فى الشاسية علشان مش لاقيين قواعد - إلغى الكردان الامامى بتاع الغرز علشان متقل العربية - حطلها قطمة دركسيون بتاعة أى عربية وقيفلها صلايب واقطع والحم براحتك - وكتير ممن العك ده لغاية مالعربية تبقى عشة فراخ ) دى امثلة واقعية وبتحصل هنا فى مصر كتير قوى - ده طبعاً غير اللعب بتاع الانصاص الاستيراد اللى جاية من برة واشترى شاسية قديم وركب كابينة ركاب استيراد والحم ياريس .
- يستوى بعد كده أى ماركة تانية يابانى امريكانى المانى بس تتفوق فى النقطة دى العربيات الجيب بإنتشارها اللى خلى أسعارها أقل من اى عربية تانية بنفس الامكانيات لأنها بتتصنع فى مصر من زمان والعيوب بتاعة التقفيل بقت قليلة جداً وبتتحل بسرعة وكمان قطع غيارها متوفرة بكثرة وبأسعار كويسة بالنسبة لباقى العربيات من الماركات التانية حتلاقى ليها الجديد والاستعمال واللى مش لاقيه حاتجيبه من عالنت بأسعار رخيصة غير اى ماركة تانية لأنها منتشرة بغباء فى انحاء العالم - ده بالإضافة لتوافر قطع الغيار المصنوعة فى شركات تانية مخصوصة للجيب علشان تحسن ادائها زى الكوارين والمساعدين وقطع غيار لرفع العربية وتعريض الكاوتش وتكبير مقاسة واكصدامات حديد وديفندرات واوناش غرز (بس كله بتمنه ولكن موجود بكثرة) - كمان انتشارها خلى السوق مليان ورش بتشتغل فيها فمبقاش فيه قلق ولا جرى ورا التوكيل - كمان ملاك العربيات الجيب ليهم نشاطات جامدة عالنت وفى مواقع التواصل الاجتماعى زى ماتقول عزوة بمعنى ان التوكيلات بتعملهم الف حساب لو حصل اى دقة نقص مع حد فى اى توكيل حيلاقى بعدها بـ ٢٤ ساعة بالكتير التوكيل بيكلم صاحب المشكلة علشان يحلها بعد ماتسيح ليهم عالنت .
- يبقى نلخص اللى فات :
* التويوتا اللاندكروزر رقم ١ فى عربيات الدفع الرباعى بس تركبها عالزيرو حاتكون غالية جداً او تركبها استعمال بس تكون نضيفة ونمرة واحد ودى كمان حاتكون غالية .
* كل العربيات التانية متساوية فى الاعتمادية ولكن كفة الجيب أرجح بكتير علشان اللى انا شرحته فوق وده نتيجة انتشارها وتصنيعها فى مصر.
* مافيش عربية دفع رباعى مريحة تماماً زى السيدان .
* مافيش عربية دفع رباعى موفرة فى البنزين .
* إعتمادية الدفع الرباعى أعلى من السيدان .
* العربية الدفع الرباعى حاتوفر كتير فى مصاريف العفشة والشكمان والفوانيس والمرايات اللى بتتكسر.
الملحوطة الأخيرة إن كل العربيات الزيرو بدون استثناء من حوالى ٣ أو ٤ سنين بقت زى الزفت على مستوى العالم .
أتمنى أكون لخصتلك القصة وتحت أمرك فى أى سؤال تانى