سؤال للساده اصحاب الرانجلر والجيب عموما ... هل تستحق الرانجلر الثمن المبالغ فيه ... بفكر ف العربيه بس هزنق نفسي جامد جدا عشانها .. فهل تستحق التضحيه ...ولا لا ؟؟
عرض للطباعة
سؤال للساده اصحاب الرانجلر والجيب عموما ... هل تستحق الرانجلر الثمن المبالغ فيه ... بفكر ف العربيه بس هزنق نفسي جامد جدا عشانها .. فهل تستحق التضحيه ...ولا لا ؟؟
لا متزنقش نفسك عشان عربيه مهما حصل بصراحه....هي حته حديده لا راحت ولا جت مهما كانت الاغراءات..اللي تركبه وانتا مستريح نفسيا وماديا مهما كان افضل عن تجربه...وربنا يديك بعدها وتجيب اللي انتا عايزه وانتا جاهزله.عشان الزنقه تتعب الواحد نفسيا ويمكن تخليه ميستمتعش بحاجه مهما كانت
طيب ايه رايكم جراند شيروكي ٢٠٠٨ عامله ١١٨ الف ولا باجيرو ٢٠٠٨ عامله ٩٠ الف
الجراند إستهلاكها أعلى فى البنزين عن الباجيرو
الباجيرو انعم من الجراند ومريحة عنها
قطع غيار الجراند متوفرة جديد ومستعمل
مراكز الصيانة للجراند اكتر وحتى بعض الورش العادية بتشتغل في الجراند عادى
الباجيرو فيها مشكلتين معروفين هما : شرخ فى مجمع العادم الشمال - إستهلاك زيت كبير لما تقرص عليها علشان فيها مشكلة فى السيل بتاع الصبابات
أنصحك بالجراند واستحمل البنزين :)
العفو وتحت امرك فى اى استفسار- هى القصة اننا هنا كلنا بنحاول نساعد بعض
الـ ١١٨٠٠٠ كم فى العربيات الكبيرة اللى زى الجيب والتويوتا والباجيرو دى بصفة عامة ولا حاجه ولو هى موديل ٢٠٠٨ يعنى بقالها ٧ سنين يبقى فى السنة بتعمل اقل من ١٧ الف كم وده معدل معقول جداً واقل من العادى .
بس أهم حاجه تكون كانت بتعمل صياناتها مظبوط - العربيات دى روحها الصيانات فى مواعيدها زى الزيت والفلتر بتوع الموتور والبوجيهات ودول بالذات مش اى زيت ولا اى فلتر ولا اى بوجيهات لازم الاصلى والزيت انا جربت موبيل ١ الـ ١٠٠٠٠ كم وجربت الشل الترا هيلكس ١٠٠٠٠ كم والحقيقة الشل احسن من الموبيل بكتير ومريح العربية ومقلل الصوت بتاع الموتور واستهلاك البنزين اقل شوية صغيرين . وفلتر الهوا كمان بيفرق كتير يعنى يستحسن تغيره مع الزيت كل ١٠٠٠٠ كم .
السلام عليكم ورحمة الله
ممكن موضوع عن شيروكى 2003 من حيث العيوب والمميزات وارائكم الشخصيه في حاله ان ده اول مره هركب عربيه اصلا
السلام عليكم جميعا كل من شارك بهذا الموضوع المفيد
او اكتفى حتى الان بالمتابعة مثلى..،،
ورمضانكم مبارك ومقبولين ان شاء الله
واشكر كريم الخلق/ المهندس. احمد عبد الفتاح صاحب المعلومة الوافية والاسلوب الرشيق.،
على ما بذله من وقت وجهد لمساعدة رواد المنتدى
وكذلك كل من ساهم بمعلومة مفيدة او تجربة ذاتية..،،
وفى انتظار المزيد ،، وتقبلوا مرورى وتحياتى.
موضوع رائع
معلومات مفيدة جيدا
جزاكم الله كل خير
استفسار لو سمحت
ناوي ان شاء الله اجيب رانجلر 2010
هل الموديل ده ف مشاكل هل في نصايح معينه
هل العداد الكبير يعيب العربيه
مع مرور الوقت والكيلوات ع العربيه مشاكلها بتزيد
شكرا مقدما
الرانجلر ٢٠١٠ و ٢٠١١ كانوا موتورهم ٣٨٠٠ سي سي - حوالى ٢١٠ حصان - من اول سنة ٢٠١٢ نزلت بموتور جديد اسمه بنتاستار ٣٦٠٠ سي سي - ٢٨٥ حصان .
- ٢٠١٠ استهلاكها فى البنزين اعلى شوية من ٢٠١٢
- الكيلومتراج القليل حايكون احسن طبعا يعنى تكون مثلا مش معدية ال ١٠٠ الف كم - مش علشان ان الموتور تعب ولاحاجه ده علشان تتأكد انها كانت بتستخدم استخدام عادى مش متبهدلة يعنى لكن الموتور يعيش معاك زى مانت عاوز طالما بتحافظ على صياناتها .
- هى بس من جوه حتلاقى ان ٢٠١٢ اشيك ودركسيونها الجديد شكله احلى .
- بالنسبة للاعتمادية سواء ٢٠١٠ او ٢٠١٢ نفس المستوى عربيات بتستحمل وإن كانت العربيات الجديدة من اول ٢٠١٢ حساسة شوية فى موضوع الموتور .
- اهم حاجه فى اى عربية جيب من اى طراز انها تكون سليمة مش ملعوب فيها من الميكانيكية كتير وتكشف عليها كويس فى الهيئة العربية او التوكيلات المشهورة زى ابو غالى . اهم حاجه تاخد بالك منها قبل الكشف ان رقم الشاسية هو نفس رقم الموتور ( اخر ٤ ارقام ) وده بيبان فى الرخصة بتاعتها وتانى حاجه ان مايكونش فيه اى لمبة عطل منورة فى التابلوة غير لمبة الحزام بس - وكمان ماتكونش متبهدلة فرشها من جوه والفرش او البلاستيكات متكسرة او مقطوعة - وكمان من بره مايكونش السقف فيه لحام او شرخ - والموتور مايكونش معرق زيت ولا فيه اى اسلاك معمولة بلدى وتوصيلات زى توصيلات الافراح - تبص قدام البابين الاماميين مايكونش فيه بارومة - دى الحاجات المبدئية اللى تاخد بالك منها قبل ماتقرر تروح تكشف عليها فى التوكيل ولا تصرف نظر وتشوف غيرها - لو نجحت فى الكشف المبدئى بتاعك تروح تكشف عليها فى التوكيل وهما حايعرفوا تاريخ حياتها هل الكيلومتر مظبوط ولا ملعوب فيه - حالة العفشة - هل اتخبطت قبل كده ولا اترشت دوكو - حالة الموتور والفتايس والكوارين ......
- لو لقيت فيها ملحوظة لمبة تشيك انجن منورة مثلا محدش يقولك بسيطة وحنطفيلك اللمبة والكلام الفاضى ده - العربية غالية وماتحطش فلوس فيها الا وهى ١٠٠٪ - واى سؤال تانى تحت امرك
الف شكر
انت قلت اللي عاوزه و زياده
اصل الجديد غالي وانا ميزانيتي تجيب 2010
والعربيه داخله دماغي من زمان
الف شكر
معلش يا م/ احمد
هسالك كام سوال تاني معلش
ليه اقارن رقم الشاسيه بالموتور
انا لاقيت 2011 احسن من جوا بكتير ياتري سعرها ف المترسط كام انا لاقيت ف رينج 235 وحوالي من 80 ل 100 الف كيلو عداد ياتري السعر دا تمام
وهل كشف التوكيل بيطلع كل حاجه
والتسجيل ف الشهر العقار هيتكلف كام لو امكن
من غير معلش - اسأل زى مانت عاوز عادى
الجيب عامة اللى بيميزها ان اخر ٤ ارقام فى الشاسية هما نفس اخر ٤ ارقام فى الموتور لو لقيت العربية كده يبقى ماغيرتش الموتور بتاعها وكمان دى بتبقى دليل انها مش عربية مشغولة لان مافيش موتورين ولاشاسيهين بنفس الرقم .
٢٠١١ فيه اعتقد منها لوطين نزلوا - لوط نزل من حيث الدواخل زى ٢٠١٠ بالظبط وفيه لوط تانى نزل دواخله ودركسيونه زى ٢٠١٢ بس ٢٠١١ نفس الموتور بتاع ٢٠١٠
الاسعار تشوفها على دوبيزل بتديلك السوق ماشى ازاى - اعتقد السعر اللى انت قلته معقول خصوصا وان الزيرو دلوقتى سمعت انه عدى ال ٤٠٠ الف
احسن كشف طبعا بتاع الهيئة العربية للتصنيع والتوكيل .
رسوم التسجيل فى الشهر العقارى يستحسن تروح تسأل فى الشهر العقارى بنفسك لان كل سنة بينزل ليهم جدول بالرسوم واعتقد ان الرسوم حاتكون فى حدود ال ٨٠٠٠ جنيه او اكتر شوية
طيب سعر الكشف ف التوكيل حوالف الف جنيه
مين اللي بيتحمل التكاليف انا ولا هوا
طب لو انا اللي هدفع وع افتراض لاقيت مشاكل ف العربيه بيبقي ساعتها ايه العمل
حضرتك اللى بتتحمل تكاليف الكشف ( المشترى ) - والتوكيل بيقدم خدمة الكشف فى مقابل مادى ومالهوش دعوة بالعربية تطلع كويسة او فيها مشاكل يبقى ربنا انقذك بالمبلغ اللى دفعته ال ١٠٠٠ جنيه - وفى الغالب اللى عربيته فيها مشاكل مش بيوافق بسهولة على الكشف فى التوكيل
موضوع شيق ومفيد
صحيح فيه خلط بين سيارات شركة جيب و غيرها من السيارات الثانية للدفع الرباعي. لكن مش مشكلة
لو نتكلم عن الجيب. انا كان عندي جراند شيروكي 1995. قمة الراحة والمتعة في السياقة لكن عيوبها الحرارة ثم الحرارة ثم الحرارة. ما تستحمل جو الخليج. بدلت لها مراوح كثيرة وأكثر من نوع راديتر ولكن للأسف تختفي فترة وترجع مرة ثانية. اشتريتها رخيصة مستعملة وبعتها بعد 3 سنوات بدون خسارة تذكر. وصرفها للبنزين عالي صحيح لكن في مقابل حلاوة سياقتها.
بعدها بستين طويلة امتلكت جراند شيروكي 2015. والحمد الله سيارة ممتازة في جميع النواحي نسألكم الدعاء بالبركة
وعندي في العائلة جيب كومباس. سيارة حلوة لاستخدام السيدات خصوصا.
أما بالنسبة للدفع الرباعي من غير شركة جيب. جربت الكثير والكثير. والخلاصة النهائية ان أفضل دفع رباعي لكل الاستخدامات اليومية هو ال نيسان باترول. وعيبه هو استهلاك البنزين العالي وصعوبة ركنه والتعامل في الزحمة نظرا لكبر حجمه.
أما بالنسبة لسيارات نص النقل. جربت ال نيسان والتيوتا هايلوكس والايسوزو ديماكس. وأفضلها التيوتا مع فارق السعر الكبير. وحاليا عندي شيفروليه سيلفيرادو. من أفضل المركبات في فئتها بس عيبها أنها ناشفة شويه. ولو ان هذا بسبب حمولتها العالية.
طب بالنسبة لاهل الخبرة ف مصر انهي افضل 4x4 ياباني ولا امريكي ك عمر افتراضي لقطع الغيار و رخص قطع الغيار او حسن التوكيل وو انهي نوع ف الاتنين افضل و ياتري ممكن نقول النيسان اكستريل انسب عربية لمصر؟؟؟
موضوع معقد و ملعبك شوية ....
من الاخر .... الفلوس فى الغالب هى الى بتحكم .... ييجى قبلها المزاج العام ... للشخص و للمجتمع
بمعنى .... الجغرافيا قالت .... اللاند كروزر افضل ... و قطع غيارها اغلى من الامريكى !!!!
فى الخليج .... الناس بتحب اللاند كروزر .... و بيركبوا العربيات الامريكانى برضوا ... بس اللاندكروزر حاجة تانية
مثيلتها ... اليوكن .... بتتباع بنفس السعر تقريبا لموديلات التسعينات ... و اقل فى السعر لموديلات الالفينات .. و اقل منها للموديلات الحديثة
اليابانى وزنه اخف من الامريكى ... فينفع فى الرمال و الغرز اكتر ... الامريكى حجمه اكبر و عفشته انشف ... ينفع للجبال و الصخور اكتر ... الموتور اكبر فى الامريكى ... اكبر لدرجة مش حتحتاجها .. استهلاك البنزين اكتر فى الامريكى ... بس مش اكتر اوى يعنى ... مواتير الديزل الامريكى القديمة حكاية كبيرة ... و مش حيعملوا زيها تانى .... مواتير الديزل اليابانى ... تحفة .. و معمرة .. بس مش زى مواتير الديترويت و الكمنز ... و اتمنى التعقيب من المهندسين بتوع الديزل :praying:
اللاندكروزر .. فى رايى الشخصى ... افضل السيارات اليابانية ... اليوكن افضل الامريكى
بقية اليابانى مش منتشر كتير فى مصر ... زى النيسان باترول و الارمادا .. و حتى الباجيرو .. و قطع غياره فى التوكيل غالية جداااااا
و الامريكى المنتشر فى مصر الرانجلر و الشيروكى و الجراند
زميلنا العزيز المهندس احمد عبد الفتاح اكتر واحد يقدر يفيدك عن الامريكى
الاكستريل عربية كويسة جدا و عملية ... و زميلنا المهندس احمد فهمى معاه اكستريل و هو اكتر واحد ممكن يفيدك
وجهة نظرى وقد تحتمل الصواب أو الخطأ :
- الـعربيات الـ ٤x٤ فى مصر ليها طبيعة ومتطلبات مختلفة شوية عن البلاد التانية بمعنى ان معظم اللى عاوز يركب العربيات دى فى مصر بيفكر فى حاجة عالية عن الارض علشان متحكش من تحت - وعاوز حاجه تستحمل المطبات بتاعتنا وفى نفس الوقت عاوزها تبقى مريحة للى راكب جواها ودى صعبة طبعاً لأن العفشة القوية عمرها ماحاتبقى مريحة - وعاوزها موفرة فى البنزين ودى كمان صعبة لأن العربيات دى مواتيرها لازم تكون كبيرة علشان تستحمل وزنها الكبير وكمان الغرز فى الصحرا وتقدر تدى قوة وعزم يخليها تجتاز الصحرا بدون مشاكل - وعاوز قطع غيارها رخيصة ودى برضه صعبة لأن عفشة العربيات دى عدد القطع والمكونات بتاعتها كتيرة وبالتالى حاتتكلف علشان هى قطع كتيرة وكمان علشان حجم القطعة ووزنها أكبر من عفشة العربيات السيدان - وعاوز توكيلات محترمة وهنا بيستوى الكل سواء السيدان أو الدفع الرباعى .
- ولكن فى المقابل حاتوفر كام إصلاح فى الشكمان من الخبط فى المطبات - حاتوفر كام تمن مراية اتكسرت - حاتوفر كام مساعد ولا مقص ولا جلبة اتكسروا من مطب غلس - إيه يعديك من البرك بتاعة المجارى والمية ؟ - وشوية حاجات تانية
- الإعتمادية فى كل عربيات الدفع الرباعى عالية علشان مكونات العربية سواء بودى او عفشة أو مواتير كلها معمول حساب إنها تبقى مصممة للخدمة الشاقة والتراب والغرس والبهدلة - ولكن علشان تفضل الإعتمادية عالية لازم تعامل العربية كعربية عادية مش بلدوزر بمعنى إنها محتاجة صيانات زى العربيات السيدان من بوجيهات وزيوت وتيل وفلاتر وسيور عادى زى اى عربية فلازم تكون إيدك فيها باستمرار علشان تحافظ عليها.
- بالنسبة لعربيات الدفع الرباعى أنا حاتكلم عن مصر برضه "لايعلى على التويوتا اللاندكروزر كعربية دفع رباعى " - القديم منها متبهدل وصعب تلاقى حاجه مظبوطة وده مش عيب من العربية ده عيب مستخدمين وملاك لهذه السيارات نتيجة اهمالهم فى صيانات العربية وشغل الصنايعية التعبانة فى هذه السيارات ( غير كورونا بواحدة بتاعة نص نقل دبابة - حط عمود كرنك للموتور صينى - إلغى الفرامل ورا وطب المواسير - قيفلها عمود كردان بتاع دبابة ولا جامبو - إلحم الموتور فى الشاسية علشان مش لاقيين قواعد - إلغى الكردان الامامى بتاع الغرز علشان متقل العربية - حطلها قطمة دركسيون بتاعة أى عربية وقيفلها صلايب واقطع والحم براحتك - وكتير ممن العك ده لغاية مالعربية تبقى عشة فراخ ) دى امثلة واقعية وبتحصل هنا فى مصر كتير قوى - ده طبعاً غير اللعب بتاع الانصاص الاستيراد اللى جاية من برة واشترى شاسية قديم وركب كابينة ركاب استيراد والحم ياريس .
- يستوى بعد كده أى ماركة تانية يابانى امريكانى المانى بس تتفوق فى النقطة دى العربيات الجيب بإنتشارها اللى خلى أسعارها أقل من اى عربية تانية بنفس الامكانيات لأنها بتتصنع فى مصر من زمان والعيوب بتاعة التقفيل بقت قليلة جداً وبتتحل بسرعة وكمان قطع غيارها متوفرة بكثرة وبأسعار كويسة بالنسبة لباقى العربيات من الماركات التانية حتلاقى ليها الجديد والاستعمال واللى مش لاقيه حاتجيبه من عالنت بأسعار رخيصة غير اى ماركة تانية لأنها منتشرة بغباء فى انحاء العالم - ده بالإضافة لتوافر قطع الغيار المصنوعة فى شركات تانية مخصوصة للجيب علشان تحسن ادائها زى الكوارين والمساعدين وقطع غيار لرفع العربية وتعريض الكاوتش وتكبير مقاسة واكصدامات حديد وديفندرات واوناش غرز (بس كله بتمنه ولكن موجود بكثرة) - كمان انتشارها خلى السوق مليان ورش بتشتغل فيها فمبقاش فيه قلق ولا جرى ورا التوكيل - كمان ملاك العربيات الجيب ليهم نشاطات جامدة عالنت وفى مواقع التواصل الاجتماعى زى ماتقول عزوة بمعنى ان التوكيلات بتعملهم الف حساب لو حصل اى دقة نقص مع حد فى اى توكيل حيلاقى بعدها بـ ٢٤ ساعة بالكتير التوكيل بيكلم صاحب المشكلة علشان يحلها بعد ماتسيح ليهم عالنت .
- يبقى نلخص اللى فات :
* التويوتا اللاندكروزر رقم ١ فى عربيات الدفع الرباعى بس تركبها عالزيرو حاتكون غالية جداً او تركبها استعمال بس تكون نضيفة ونمرة واحد ودى كمان حاتكون غالية .
* كل العربيات التانية متساوية فى الاعتمادية ولكن كفة الجيب أرجح بكتير علشان اللى انا شرحته فوق وده نتيجة انتشارها وتصنيعها فى مصر.
* مافيش عربية دفع رباعى مريحة تماماً زى السيدان .
* مافيش عربية دفع رباعى موفرة فى البنزين .
* إعتمادية الدفع الرباعى أعلى من السيدان .
* العربية الدفع الرباعى حاتوفر كتير فى مصاريف العفشة والشكمان والفوانيس والمرايات اللى بتتكسر.
الملحوطة الأخيرة إن كل العربيات الزيرو بدون استثناء من حوالى ٣ أو ٤ سنين بقت زى الزفت على مستوى العالم .
أتمنى أكون لخصتلك القصة وتحت أمرك فى أى سؤال تانى
ربنا يباركلك يا باشمهندس احمد ...... كلام جميل جدا ...
انا واحد من الناس الى كان عندى ( و لا يزال ) عقدة اسمها لاندكروزر ... و خاصة التعلبة ( فئة ال 70 ) و فئة ال 80 و فئة ال 100
بس العقدة دى بتخف بالتدريج لما بشوف اسعار قطع الغيار الاصلية
ايه رأى حضرتك فى مواتير الديزل ؟ سواء الخاصة بالتويوتا ... او الخاصة بالكمنز و ديترويت ديزل ؟؟
مواتير الديزل بالنسبة للمقاسات زى التويوتا اللاندكروزر والنص نقل الهايلكس القديم فيها احسن من الجديد لان السولار التعبان مش بيأثر فيه قوى وتأثيرة مش فورى وتقدر تمشى عادى وممكن تسلك او يادوب فلتر والحال يمشى ولو الدنيا متدمرة حاتنضف الفوانى او تغيرها وسعرها مش غالى - المواتير الجديدة الديزل بتاعة التويوتا حساسة قوى للسولار لو مش كويس وتأثيره بيبان فى ساعتها تلاقى العربية يادوب بتمشى ومكتومة ومابتسحبش واول حاجه فى سكتك سلونويد الجاز اللى بيقولوا عليه بيك السلانسية ده ياتفكه يتنضف او فى الغالب بيتغير ولو فضلت على كده يبقى لاژم تفك الرشاشات وتنضيفها وظبطها او تغييرها بالكامل وكل ده لو ربنا ستر والموضوع ماوصلش الطلمبة لانها غالية جدا جدا - بالنسبة للمواتير لما تيجى تعمرها بتخش فى مأساه لأن قطع غيار العمرات معظمها مضروب وبتبوظ الموتور تانى بعد فترة قليلة جدا - الكامنز والديترويت ايقونات وان كان الكامنز ماسك نفسه فى العربيات المقاس الصغير والنقل التقيل وفيه ميزة ان صعب تلاقى ليه قطع غيار مضروبة - الدويتس كمان فى المقاسات الكبيرة مالهوش حل - بس دلوقتى المكتسح هو الكامنز والكات والام تى يو ( مرسيدس) - الديترويت وقع من فترة قريبة ومعرفش اذا كان قام تانى ولا لا وده بعد مااتحدوا مع ام تى يو (مرسيدس) لفترة صغيرة وعملوا مكن ديزل اسمه ddd وكان من افشل المكن الديزل واتفك الاتحاد ده بعد فترة وجيزة ولازالت ام تى يو فى القمة ومعرفش دلوقتى ايه ظروف ديترويت ديزل . وفيه بالنسبة للامريكانى الجنرال موتورز وده برضه من المكن المحترم وشغال فى العربيات الامريكانى الصغيرة والنقل التقيل حلاوة . بس عموما المكن بتاع النقل التقيل دلوقتى نتيجة الباور والعزم العاليين بقى بيظهر له مشاكل كتيرة ولازم تعامله بحرص شديد وصيانات مكلفة ومصروف دورى عالى .
الجيب فى دمى
سيارة وحش ليها هيبة وسط العربيات التانية
تحسسك بالتميز والضخامة
والجيب سيارة ملفتة للنظر
اللى يركب جيب اكيد مغامر وبيحب المغامرة والطرق الوعرة
يعنى من الاخر الجيب عربية بيتعملها حساب فى كل مكان
اتفق مع حضرتك فى جوهر ما تعنيه .... انمااختلف مع حضرتك فى صياغة الجمل :Y_hi_3[1]:
الجيب مش وحش عندما تقارنها بالعربيات النقل مثلا .... او بالميكروباص او بالجامبو ... و الله يرضى عليك خلى بالك من العربيات السيدان الاقل حجما .... صحيح اغلب الناس بتسوق بطريقة غريبة حبتين ... بس انت المفروض تكون اخلاقك اعلى منهم ... علشان انت راكب عربية اعلى منهم ( عن الارض )
متحطش فى دماغك موضوع التميز و الفخامة دى ..... علشان انت كدة حتتكبر و تتغر ... و وقعة الشاطر بالف يا معلم ... انت ممكن تحس بالتميز انك لما تلاقى عربية محتاجة مساعدة تعرف تساعد الناس التانية ببساطة
بالمناسبة ... اغلب قائدى السيارات العالية عن الارض محترمين جدا ..... بس فيه شوية بيسوقوا برعونة شديدة .. و ده يخليك تكره كل السايقين العربيات دى
الطرق الوعرة ؟؟!!!! لو قصدك على المطبات و الحفر الى فى شوارع المحروسة .... اغلب قائدى العربيات العالية بيخافوا عليها زى العربيات السيدان
و خلى بالك .... مشاكلها بتكون على ادها .... يعنى لما تعطل .. مفيش حد حييجى جنبك علشان يساعدك ... و مينفعش توديها لاى حد يجرب فيها .. و الصنايعى الى بيستغل فيها بياخد مصنعية مرة و نصف او مرتين
ربنا يسترها علينا كلنا
الواحد قال بعد زيادة سعر البنزين الجيب شيروكي ٩٨-٢٠٠١
سعرها هيقل شويه لاقيت الاسعار في زياده!!!!
ماحدش يعرف واحد معاه شيروكي وعايز يبيعها بسعر رخيص يكون تعبان من البنزين
وايه رأيكم في الاكس ترايل؟
وجزاكم الله خيرا
زيادة الاسعار .... اسلوب حياة
على حسب علمى البسيط ... الشيروكى دى من مويل 93 تقريبا لغاية 96 ... و من 97 الى 2001 الشكل اتغير شوية ... العربية اخدت دورانات بومبيه فى القوايم الخلفية و فى الشبكة الامامية ....
مش عارف ليه .!!!! بس الميكانيكية مش بيحبوا موديل 2001 ... بيقولوا بيعمل مشاكل كتير ... المشكلة الى شفتها كانت فى كونتاكت العربية
فى نقطة بيع و شراء السيارات .... نقطة مهمة ... محدش غلبان .... تقريبا الى بيبيع عارف سعر السوق كام .. و ايه الى تاعبوا فى عربيته .. علشان كدة ممكن يبيع ارخص شوية
متفرحش بعربية سعرها ارخص من السوق كتير
التقاصيل الفنية ... يكلمك عنها المهندس احمد عبد الفتاح .. اخصائى جيب و شروكى و كونترول :shine[1]:
الف شكر لحضرتك
بس الشكل لغايه ٩٧ حاجه
ومن ٩٨ الى ٢٠٠١ اتغير الشكل حاجات بسيطه
هو انت لما سالت كان قصدك ليه تركب دفع رباعي ولا جيب ! اصل لقيت الموضوع خرج بره نطاق الجيب خالص بقا في تيوتا و نيسان ف الحوار ~
المهم انا بعشق حاجه اسمها شيروكي ~ تسعينات ~ عربيه بمعني كلمه عربيه ف اي حاجه معاك عربيه مجرد ما بتقولها روحي مبتشوفهاش ~ يعني معاك ف اي حاجه صحيح مكلفه شوية من نحية البنزين ~ بس كفايه انك مجرد ما رجلك بتنزل ع الكفةة بتلاقي العربيه بتاكل ف الارض ~ صحيح قطع الغيار غاليه لانها معمره جدا جدا يعني بتجيب الحاجه وتنساها بمعني كلمه تنساها ~ يعني مش كل شهرين ولا حاجه هتروح تغيرلك كوبلن عشان طقطقه ولا اي من الكلام ده كفايه جدا انك هتنسي حاجه اسمها مساعد ضرب دي ~ هتنسي شئ اسمو مرايات اتكسرت عربيه عالية عن الارض وعضمها ناشف جدا يعني تضمن انك مش هتركنها وتروح مشوار ترجع تلاقيها مخبوطه وانت زعلان بالعكس ممكن تتخبط وانت ماتخدش بالك بس صاحبنا التاني هيزعل زعله حلوة ~ من الاخر انت معاك عربيه ف اي حاجه هتلاقيها جبال صحره اسفلت اي حاجه هتسد معاك عكس السيدان وبالزات الحديث اركب مثلا جيب شيروكي 99 واركب مثلا اي سيدان حديثه اشتغلت سنه واحده بس هتلاقي ان السيدان بقت عشه فراخ ماشيه تشخلل الشيروكي مش هتلاقي الكلام ده