الموضوع: رينو لوجان وسانديرو .. استفسار هام

السلام عليكم ورحمة الله وبركاته

في اول مشاركة ليا في المنتدي عندي استفسارات لخبراء السيارات عموما ولمالكي الرينو
طبعا رد كل واحد شرف ليا وتاج علي راسي من فوق بس اتمني اسمع ردود ملاكي السياره 2015 واللي معاهم لفتره طويله نسيبا علشان اعرف اخرها ايه
انا دلوقتي المفروض اني بفكر وبقارن ما بين اللوجان والسانديرو والستيب واي .. بصراحة السعر مغري بالنسبه ليا والعربية سمعتها حلوه الي حد ما.
استفساراتي

1. اول حاجه واهم حاجه عايز اسأل علي الموتور وسيبك بقي من المواصفات اللي مكتوبه في مواقع عرض العربيه .. عامله ايه في السحب والعزم, اخبارها ايه علي المطالع وهل هي ثابته علي الطريق مع العلم اني بسافر كتير
موتورها 1.6 اربعه سلندر جميل بس ال 8 فالف دي تكنولوجيا قديمه اوي بصراحة وتأثر علي اداء الموتور ده اكيد وعلي صوته كمان. فا انتوا شايفين عزمها عامل ايه والباور هورس فالاخر تديله كام

2. الستيب واي والسانديرو تقريبا نفس موتور اللوجان بس العربيتين دول اعلي علي الارض واتقل في الوزن من اللوجان فا انا متوقع ان اداء الموتور فيهم اضعف ... يا ريت تقييم ملاك العربيه

3. سامع كلام كتير عن ثبات العربية وللاسف متناقض ناس كتير تقول مش ثابته وناس تقول قويه جدا وثابته جدا. انا بسافر كتير وبجيب فوق ال 140 فا ايه النظام؟

4. مش هتكلم علي العربيه من الداخل لان بصراحة لا غبار عليها ماعدا اماكن التخزين وهي لا تمثل لي ادني مشكله .. فالاول والاخر انا شاب ولوحدي علي باب الله... بس سوقها بعد كده ايه نظامه

5. معنديش ادني مشكله من ان الدبرياج مش زيت مادام سلس فالتعامل بس مشكلتي دايما مع الفرامل. ايه نظام الفرامل واستجابتها وانا هنا بتكلم علي فئه الاي بي اس

6. مراكز صيانتها ايه نظامها والتعامل معاهم ممل وفيه قله قيمه ولا ايه نظامه

7. يا تري كهربة العربيه معقده ولازمها توكيل بس ولا ممكن اي حد بره التوكيل يتعامل عادي

يا سلام بقي لو الناس تقوللي رأيها فالشكل كمان وايهم اجمل علي الطريق من التلاته لوجان او سانديرو او ستيب واي
يا ريت واتمني الناس برضو في الردود يكون تقيمها بجانب عربيه تانيه تقيله زي مثلا لانسر او حتي يا سيدي مرسيدس علشان الواحد يعرف وضع العربيه الحقيقي ايه علي الطريق.
فالاول والاخر تقييم العربيه بيتفاوت من شخص لاخر علي حسب استعماله لكن عمره ما يتفاوت لما تقيمه بالنسبه لنوع تاني .. مكانها ثابت .. وفالاول وفالاخر انا حابب اعرف تقييم فني وتقني عن السيارة وادائها الحقيقي علي الطريق علشان برضو الواحد ميبقاش متوقع من العربيه اكتر او اقل من امكانياتها
شكرا لطول بالكوا ومعلش يا جماعة انا جاي موسوس اصلي كان معايا نيسان صني الشكل الجديد ومش عايز اجيب عربيه الاقي سحبها وعزمها اقل والبس برضو فمشاكل تفكرني بمشاكل النيسان ... عايز انسي

متابع