طلب من اهل الخبره الكرام

**Islam Amer** · 08-11-2008 12:43 AM

السلام عليكم :
انا الحقيقه ناوي اشتري اوبل استرا موديل 2008 نوع Essnatia
وياريت حابب حد يكون معاه نفس الموديل او موديل الانجوي ويكلمني ياتري عامله معاه اه وهل فيها مشاكل ولا مشاكلها بسيطه لاني بجد قلقان منها لاني سمعت ان مشاكل لو في الصيانه بتكون غاليه نار فحابب حد ينور طريقي واه اخبار الايزي ترونك بتعاها وفرامل ABS لاني سمعت من مشاركات الاعضاء ان بتحصل معاهم مشاكل فيها وكمان الكمبيوتر بتاع العربيه

وجزاكم الله خيراااا

**KHALED AYMAN** · 08-11-2008 01:00 AM

انا بصراحه سوقتها لمسافه قصيره بس انا معايا السيدان 2006 موضوع ال abs ه مش فى الجديده و محدش اشتكى منه الشكاوى من الفتيس بيقولو انه بينتش (وجهات نظر)جرب العربيه و احكم بنفسك لو عايز تجربها روح منصور الى على الصحراوى فى اسكندريه (فرع العامريه) ادخل للمندوب اسمه احمد نبيل و اساله على العربيه و قوله انك عايز تجربها و هو هيخليك تجربها جوا الشركه زى ما عمل معايا .
و ربنا يوفقك و تشتريها عشان تبقى اوبلاوى زينا (ولا انت اوبلاوى قديم)

**Mustafa_Farouk** · 08-11-2008 10:55 AM

السلام عليكم،
اوبل استرا عربية حلوة جداً
،فراملها كويسة،بصراحة أنا لو معايا ١٤٠ ألف جنيه، مش حشتري استرا بالرغم من اعجابي باوبل. elessinta مفيش فيها أي أوبشنز، عربية فاضية وسعرها غالي عليها. يعني مفيش جنوط، فوج لايت، وحاجات تانية، بجد لو عايز تجيب حاجة صغيرة. ممكن سكودا فابيا، رومستر وماليانين أوبشنز، ممكن ميجان هاتش باك، نيسان تيدا هاتش بك جامدة جداً لكن بالفلوس دي عمري ما أروح اشتريها وهي فاضية إلا إذا كنت إنت عجباك جداً وممكن تنفض لي زيادات في العربية، أنا كان معايا كورسا وكنت عايز شوية زيادات زي اللي موجودة في فئة انجوي اللي معايا.
بالنسبة ال الفتيس بتاع الاسترا، أنا عجبني جداً، كل الموضوع شويت تعود عليه، مش أكتر،هو بس بتحس بالنقلة في بعض الاوقات، وممكن تجرب من أي حد أو إسأل في التوكيل لو في تست دريف، على فكرة أنا مش بكرهك فيها بس دي وجهة نظري.
العربية ثابثة جداً، بس أنا مش بعدي عن ١٢٠، يعني مرة جبت ١٨٠ بس متكررتشي، الفرامل ما شاء الله كويسة،
احنا حنتقابل النهاردة في مدينة نصر لو حابب تجي تبص على عربيتي، أهلاً وسهلاً بيك.

**karsooon** · 13-11-2008 01:03 AM

السلام عليكم
باشا
انا معايا استرا انجوي2008 بس انا شايف انه حرام عليك تدفع 140 الف جنيه في عربيه فاضيه - الا اذا كانت الكماليات مش فارقه معاك - خاصة ان الرقم ده ممكن تجيب بيه عربيه حلوه برضه زي الميجان مثلا عشان كده ياريت لو تقدر تزود شويه (حوالي 15 الف جنيه)وتجيب استرا انجوي لاني مريت بنفس التجربه بتاعتك قبل ما اشتري وكنت بدور برضه في نفس رينج الـ140 الف بس لما فكرت شويه حسيت ان الفرق ده رغم انه مش كبير بس هكسب بيه اوبشنز كتير ممكن تخليني افضل مقتنع بالعربيه فتره اطول

وبعدين موضوع الفتيس الايزي ترونيك ده ميزه مش عيب انا كنت متضايق منه جدا في الاول بس بعد فتره بتحس انه رائع.
اما بالنسبه لموضوع الفرامل والكمبيوترانا محسيتش انهم فيهم مشاكل خالص بالذات ان العربيه لسه جديده عامله حوالي 7000 كم والمشكله الوحيده اللي حصلت في العربيه ان فيها تزييقه في العفشه بس انا عرفت ان المشكله دي ما حصلتش مع حد من ملاك العربيه قبل كده عشان كده مش عاوز اعممها على العربيه.
وبشكل عام العربيه ممتازه عاليه عن الارض وواسعه حتى شنطتها واسعه بالنسبه لعربيه هاتشباك, صاجها قوي وده شئ مهم جدا وكمان موضوه الـ key less entry ده تحفه بكل المقاييس بس للاسف مش موجود غير في الانجوي.

عامة ربنا يكرمك ولو ماعرفتش تزود الـ 15 الف دول ممكن تفكر فعلا في الميجان هاتشباك زي ما قالك الاخ مصطفى عربيه ممتازه فعلا.

بقولك ايه يا استاذ مصطفى هو انت عربيتك 2007 ولا 2008 ولو 2007 ممكن تقولي ايه الفروق الرئيسيه بينهم؟

**Mustafa_Farouk** · 13-11-2008 10:00 AM

المشاركة الأصلية كتبت بواسطة karsooon

السلام عليكم

بقولك ايه يا استاذ مصطفى هو انت عربيتك 2007 ولا 2008 ولو 2007 ممكن تقولي ايه الفروق الرئيسيه بينهم؟

السلام عليكم،

مليش فيه لازم تيجي المقابلة اللي جاية عشان تشوف بنفسك.

ولا خلاص حقولك بس لازم تيجي برضو.

الفروق، ٢٠٠٧ اللي معايا جنوط 16, تارة جلد فيها خياطة، لون التابلوه رمادي غامق، عندك حتلاقيه رمادي فاتح، الفوانيس الأمامية ارضيتها لونها اسود، الاشاره الخلفي لونها أبيض، الكراسي الاماميه مختلفة شوية،
أنا بحس إن ٢٠٠٨ ألوانها أحلى من 2007, بحس انها براقة وبتلمع، بحس كدة في اللون الأسود عشان دة لون عربيتي، بيعجبني شكل الشبكة بتاعة ٢٠٠٨ أكتر.

إنت لون عربتك إيه ؟؟ + إيه اللي مضايق منو في عربتك ؟؟ أو في حاجة مضايق منها ؟؟

**Islam Amer** · 13-11-2008 03:48 PM

جزاكم الله خيراا
علي المعلومات الجميله وانا الحقيقه فكرت ذي ما الاستاذ karsooon
وضح من ناحيه الفرق 15 الف وانا الحقيقه معايا المبلغ بتاع الانجوي بس في ناس كلمتني وقالت لي متتسرعش في الشراء دلوقتي لحد متنزل الاسعار شويه مع العلم ان في التوكيل كلموني مرتين وقالو لي انت مجتش تشتري العربيه ليه !!!! فانا حسيت ان ممكن يكون في جر رجل قبل نزول الاسعار وانا الحقيقه اولت استني شويه وانا الكسبان لو في نزول شويه في الاسعار
وبشكر الاخ العزيز مصطفي علي دعوته ليه وانا ان شاء الله ناوي اشوف حضرتك في اقرب وقت بس ظروف الشغل

**karsooon** · 15-11-2008 03:29 AM

وانا كمان ماليش فيه ومش جاي المقابله
للاسف ياباشا انا اليومين دول في السودان بس نازل مصر ان شاء الله الشهر الجاي عشان كده مش هعرف اجي فياريت لو تقولي المقابله بتتعمل كل اد ايه وفين عشان اتشرف بمعرفتكوا.
بالنسبه للون عربيتي هو Dark Silver اللي هو ما بين الفضي والرمادي اما بالنسبه للي مضايقني في العربيه زي ما قولتلك التزييقه اللي في العفشه بس للاسف مالحقتش اروح التوكيل عشان اعرف السبب عشان ظروف السفر بس ناوي ان شاء الله اما ارجع اشوف الموضوع ده وفيه حاجه تانيه بس حصلت مره واحده معايا جيت ادور العربيه مادارتش وفضلت احاول فيها لمدة نص ساعه مفيش لغاية ما لقطت لوحدها تقريبا البلوتوث كان معلق والحمد لله الموضوع ده ماحصلش تاني.
المهم ضروري تقولي المقابله بتبقى امتى وفين وانا عامة قاعد شهر 12 كله في مصر ان شاء الله.