الكاوتش الأمامى إنتهى بعد 20 الف كم ... كيا سيراتو الجديده
في مفاجأه غريبه ماكنتش متوقعها ، بعد إستعمال 20 الف كم في سنتين
إكتشفت بالصدفه ان الكاوتش الأمامى في عربيتى منتهى تماما ولا كأنى مشيت عليه 60 الف وأكتر !!! للأسف نسيت أصوره قبل ما أغيره
الكاوتش اللى نازل فيها Nexen وإسم الموديل CP643a ، مش من الحاجات المعروفه أوى في Nexen وإكتشفت برضه إن مش كل السيراتو بتنزل بيه فيه منهم بينزل ب Kumho و Hankook يمكن عشان عربيتى كانت من أول الإنتاج جايز بعد كدا إتغير
المهم انا أصلا إكتشفت الحكايه دى وانا في التوكيل عشان كنت باصلح الازاز اللى ورا شمال ماكنش شغال ، فالمهندس اللى بيستلم منى بيبص كدا عالكاوتش لقاه كدا فبيقولى انت الكاوتش اللى قدام عندك خلاص اتاكل خالص ولازم يتغير انت بتمشى كتير ؟ قولتله لا دانا لسه ماكملتش ال 20 الف أصلا ، طبعا شوفت المنظر اتصدمت وانا ماكنش في دماغى اشيك عليه بعد الفتره الصغيره دى
فعرض عليا أغيرهم عندهم بالمره وهما عندهم الكاوتش وسعره معقول مقارنة ببره ، قولت ماشى عشان يبقى كله نفس النقشه مع انى قفلت من الموديل دا
بعد ما مشيت ورجعتلهم بعد الضهر كانوا خلصوها خلاص المفاجأه التانيه غيرهم ب Nexen بس موديل تانى :hitwall3: إسمه N8000 ، طبعا كنت خلاص دفعت والكاوتش ركب ومشيوا بيه كانوا بيجربوا العربيه فخلاص أمر واقع مش هاعرف أرجعه
كنت حابب ان كله يبقى نفس النقشه بس بصراحه ال N8000 أصلا يعتبر أفضل حاجه في ال Nexen ونقشته شبه ال Kumho Ecsta ومواصفات الفرده أحسن من اللى كانت راكبه ZR17 وتراكشن AA وطبعا Made in Korea
اللى عربيته نازله ب Nexen ونفس الموديل اللى كان عندى يشيك عليه وربنا يستر عالجميع
الحمد لله