كاوتشة كوبلن امامي شمال كرولا 2008 رجاءا حد يرد

**Eslam Helal** · 11-03-2015 05:46 PM

يا جماعه انا معايا تيوتا كرولا 2008 خليجي تاني فئه فيها طبعا الجنوط السبور الاصليه بتاعتها ف علطول الجنط اللي قدام بيتوسخ اوي ويبان عليه سواد كدا مهما نظفته بيتوسخ تاني وباين فيه انه متبهدل من جوه ف جاتلي فكره كدا مجنونه شوية وقفت العربيه ف البيت عندي جوه ورفعتها ع الكوريك وفكيت اول كاوتش الامامي شمال وقعدت انظف فيه من جوه بسلك مواعين وصابون سائل بقا زي الفل وبعدين قلت اما ابص عالعربيه من تحت ببص لقيت المقص الشمال غرقان زيت قعدت ادور على مصدر الزيت دا لقيته جاي من كاوتشه سوداء مقطوعه تقريبا كاوتشه الكوبلن اللي ناحيه جوه ف السؤال دلوقتي انا رحت التوكيل قالولي في راس عاوزه تتغير ف الكوبلن الراس دي تمنها 2500 جنيه يا اما الاضمن اغير كوبلن كامل ب 5700 جنيه مع ان انا مش بسمع صوت اي طقطقه ف العربيه مهما لفيت الدريكسيون او مهما مشيت بالعربيه مع العلم ان الكوتشه دي هي اللي مقطوعه وموقعه زيت سمعت انها تقريبا بتتغير لوحدها او كدا ولا الكوتشه دي جواها حاجه بايظه ف موقعه زيت عشان كدا انا لسه مكتشف تسريب الزيت دا اول امبارح وملحقتش توقع زيت كتير

**Eslam Helal** · 12-03-2015 08:44 PM

يا جماعه محدش موجود :( :/

**Mecha** · 12-03-2015 09:02 PM

غير اويل سيل الفتيس اللي بينقط

**amr_naser** · 17-03-2015 08:18 AM

شوف يا باشا اشترى اويل سيل فتيس شمال طبعا تفرق اذا كان الفتيس اوتو ولا عادى واشترى كمان كاوتش كوبلن خارجى وداخلى وروح لعفشجى محترم يفك الكوبلن ويغير الاويل سيل وكاوتشات الكوبلن ويحط شحم وبالمرة حيكشف على الكوبلن لو فية مشاكل ولا لا وركبهم يا باشا
واكيد حتحتاج تزود او تغير زيت الفتيس لانه حيكون ناقص
انصحك تجيب القطع اصلية خصوصا الاويل سيل

**Eslam Helal** · 18-03-2015 12:09 AM

طب لو سمحت اجيب القطع اصليه منين انا كنت ناوي اغير ف التوكيل قالي محتاجه كوبلن ب 5700 جنيه وهو اصلا راس واحده بس اللي تحت الجلده دي اللي بايظه والمهندس بيقول الكوبلن كامل بيتغير مش الراس
لو سمحت ممكن الاقي فين الاجزاء دي لوحدها اصليه

**hardmind_doc** · 18-03-2015 04:02 AM

شوف ميكانيكى يبصلك عليها الاول
ولو عايز تجيب قطع غيار من بره التوكيل هتلاقى عند العالمية فى الحرفيين وشارع دمشق
والشرقاوى فى جسر السويس والبرجسى فى شارع مراد

**akmm** · 18-03-2015 03:35 PM

طالما الكاوتشه مقطوعه بتاعه الكوبلن ومفيش لسه صوت طقطقه في الملفات ممكن علاجها بس سريعا بتغيير الكاوتشه وملىء الكوبلن بالشحم .... والشحم هنا عاده بيكون مع الكاوتشه اللى نوعيتها جيده .