رأيكم ضرورى بخصوص تنشيع المياه من الكوعة وظبط الثرموستات

السلام عليكم ورحمة الله وبركاته

ازيكم شباب عاملين ايه يا رب تكونوا بكل خير

بعد ما عملنا الموضوع ودوخنا السبع دوخات بسبب الثرموستات

روحت لبتاع قطع الغيار واكتشف ان عصام وان الميكانيكى التانى

كانو بيركبوا الجوان غلط

وبالتالى كانو بيشيلوه وبالتالى الترموستات أداءها فيه مشكله

الجوان المفروض يركب تحت الترموستات ناحية الشجرة وليس فوق الترموستات ناحية الكوعة

علشان متهربش مياه حوالين الترموستات والمياه توصل للريدياتير بدرى

السؤال

عندى مشكلة وهى ان فيه بردوا تنشيع مياه من حوالين المسمار الأسفل وكمان اللى زاد ان من مخارج بعض الخراطيم اللى ماسكه فى الشجرة فى تنقيط

ومش كده وبس فى يومين كان الندى الصبح فيهم عالى فكان فى تنقيط مياه من جدار الموتور من ورا سير الكتينة تنقيط لدرجة انه عمل بقعة على الأرض .. فشكيت فى طرمبة المياه ولكن مبيحصلش كده خالص بعد الساعة 7 الصبح حتى ولو راكن العربية ودلوقتى مبقتش تعمل كده

طبعا المياه بتنقص

طبعا الشجرة بالكوعة صينى وعندى كوعة أصلية

طبعا الترومستات أنا لمست فوايدها جدا ومش حابب اشيلها

السؤال الآن

أعمل إيه

أشترك شجرة بكوعة استيراد ؟

أفكها بنفسى وأركب الجوان واقفل بسيليكون ؟

اروح لميكانيكى يعملى الكلام ده ؟

ولا أعمل ايه ؟

غير الشجة كلها وهتها استيراد وياريت تشيل ثرموستات الكوعة عشان الصيف جي ومتضمنش هتبوظ امتة

ايوه هو ليه بقى ترموستات الكوعة بيتشال
الإجابة للمتخصصين وكمان المجربين وكمان الفتايين

اقتباس:

---

المشاركة الأصلية كتبت بواسطة amdd

ايوه هو ليه بقى ترموستات الكوعة بيتشال
الإجابة للمتخصصين وكمان المجربين وكمان الفتايين

---

عشان الميكانيكية فى مصر بيفتوا لانهم مش على علم دول بالتجربة

بحجة ان مصر حر وان الترموستات معمولة عشان الدول الساقعة

والرد بسيط

1- الترموستات معمولة عشان تثبت درجة حرارة الموتور عند درجة معينة لينتج أفضل أداء ليه ويحافظ على مكوناته

2- مصر فى الشتا على الأقل مبقتش حر بتوصل فى أماكن فى مصر لدرجات منخفضة جدا

3- ثرموستات الكوعة مفيدة للتكييف لأنها بتحبس المياه السخنة جوه الموتور وده بيخلى السربنتينه بتاعة التكييف متتأثرش بحرارة الريدياتير المرتفعة دائماً

4- فوائد أخرى

والحجة التانية انها بتعلق وممكن تضيع الموتور

والرد بسيط

عندهم حق ولكن مع الصيانة الدورية ومراعاة العربية ووضع المياه الحمرا المعتمده .. مش هيحصل مشاكل ان شاء الله

قلتلك قبل كده روح لميكانيكى فولكس يعملك الموضوع ده بفبركته عندك الزعيم او سيد عبده
انا عشان مش شايف الكوعه الى جبتها مش قادر افيدك هل هينفع تتعالج بالسيلكون وتمشى ولا لا

تروح لحد بيفهم او تعملها بنفسك سيان .... المهم تعمل الصح
انت عارف رأيي في موضوع ثرموستات الكوعه = جزء اساسي من المحرك ولا يجب خلعه نهائي إلا لظروف طارئة او بتخلص علي موتور عربيتك
انا مغير ثرموستات كوعه مرتين في عربيتي و بشتري الصيني اللي في السوق و الحمد لله شغال زي الفل دون مشاكل

انا و انت ساكنين في مناطق مفتوحة و طرق سريعه و نزول درجة حرارة ليلا و صباحا عن المعتاد فلازم و لابد من وجود ثرموستات الكوعه

روحت لميكانيكى عندنا

وخليتوا يعمل اللى قلتله عليه وكانوا بيعارضونى ويقولوا الجوان ده مش بتاعها والعربيه دى مش بتاعتك وانت مش انت وانت جعان

الحمد لله الأداء افضل ولكن مع الجرى بتنزل عند الشرطة الأولى بردوا

والمياه التنشيع خلص

لكن انا بفضل الله اللى قفلت ولغيت التكييف السخن بنفسى

صدقونى الصنايعية دى اجبرونى انى اتعلم !!

كده اعتقد ان دورة التبريد فيها حاجه مخليها متثبتش

بص رأيي الشخصي ..وبعد تجربتي مع ثرموسات الكوع ..الثرموستات دي مفيهاش هزار ..زي ما شيلها في ضياع للموتور ..برضه قفشتها فيه ضياع للموتور ..رأي تروح لمركز متخصص سيات ..أو لو ينفع تروح التوكيل روح ..هتدفع زيادة شويه ..بس هتلاقي اللي صرفته كله وبرضه مخدش اللي إنت عاوزه يساوي أو أقل شويه من اللي هتدفعه في التوكيل أو في مركز متخصص وهتاخد اللي إنت عاوزه ...

بالنسبه بقى للناس اللي بتقول شيل الثرموستات صيف وركبه شتا ..الثرموستات ملوش أي علاقه لا بالصيف ولا بالشتا ..الثرمسوتات ليه وظيفه واحده ثابته صيف أو شتا ..وظيفته إنه يثبت حرارة الموتور عند درجة حرارة معينة ..لا يقل عنها ..وفي الغالب درجة الحرارة دي بتكون 80 أو 85 درجه ..يعني الثرموستات بتكون مفتوحه فتح كامل ومعديه المياه كلها من المحرك للريداتير عند درجة حرارة 85 مئوية ..يعني قبل ما المروحه تشتغل تقريبا بخمس درجات أو عشر درجات ..يعني العربيه في الصيف أو الشتا بمجرد وصول المياه لدرجة الحرارة دي داخل المحرك الثرموستات بيكون فتح بكامل فتحه ..لإن الثرموستات ده طبعا بيفتح تدريجيا بالتناسب مع درجة حرارة المياه ..إيه بقى دخل الصيف والشتا في الموضوع ..والله في عز الحر ..المياه داخل المحرك وصلت ل 85 درجه مئوية ..الثرموستات هيكون فاتح فتح كامل ..في عز التلج المياه داخل المحرك وصلت لدرجة الحراره دي ..الثرموستات هيكون فاتح فتح كامل ..كون إن الثرموستات تفضل قافله مده طويلة شوية في الشتا عشان المياه توصل لدرجة الحرارة دي ..فهي برضه هفتفتح فتح كامل بعد الوصول لدرجة الحرارة اللي هي 85 ..وفي الصيف العكس الثرموستات هتوصل للفتح الكامل بدري شويه لإن المياه هتوصل لدرجة الحراره دي بدري شوية ..

السؤال بقى ..إيه علاقة الصيف والشتا بالثرموستات ..نفسي حد يفهمني

ممكن حد يفيدنا نشتريها منين اصلي علشان هى لسه بايظة اﻻسبوع اللى فات لإبيزا 2000 ، و الميكانيكي فكها و رماها وقالي كبر دماغك منهاو أنا مش مقتنع بكلامة الصراحة

اقتباس:

---

المشاركة الأصلية كتبت بواسطة el-hamamsy

ممكن حد يفيدنا نشتريها منين اصلي علشان هى لسه بايظة اﻻسبوع اللى فات لإبيزا 2000 ، و الميكانيكي فكها و رماها وقالي كبر دماغك منهاو أنا مش مقتنع بكلامة الصراحة

---

رأيى تشتريها استيراد وريح دماغك
أحسن مليون مرة من أى واحده جديده

- تغير الشجرة كاملة بواحدة جديدة حتى ولو صيني (مؤقتا) لحد ما تلاقي واحدة اصلية
- مافيش حاجه اسمها سليكون في دورة مية (كلام فاضي) - السليكون في بعض اجزاء المحرك و الوظيفة عدم تسريب زيوت او شحوم
- مافيش حاجه اسمها ثرموستات تتشال خالص ( كلام فاضي بردوا) - و اظن اخوانا هنا استفاضوا التوضيح في الموضوع ده .
انصح عند عمل الصيانات يكون الفني واحد واهم بيعمل ايه و له خبرة طويلة في النوعية دي من السيارات .
- دورة المية لازم تكون محكمة تماما ولا يوجد بها اي تهريب للأتي:
1- عدم تأكل مسارات المياه في النصف الحلوي من المحرك (وش المحرك) و كذلك النصف السفلي منه (شورت بلوك) عند التقاء نقاط التوصيل بينهم (مهمه جدا الجزئية السابقة)
2- الحفاظ على ميكانيزم الثرموستات الاصلية . لان الثرموستات الاصلية عمرها اطول ، احافظ عليها بان دورة المية في صيانة دائمة و عيني عليها .
3- عدم ارتفاع درجة الحراراة و الحفاظ على درجة حرارة السيارة ثابت .
4- اول ما احس ان المية بتنقص في القربة على طول جركن مية خضرا و اطلع مشوار علشان اعرف فين التهريب بسرعة و اتفادى مشاكل الحرارة و التهريب المتعب .


تحياتي