الموضوع: إستڜارة فئ مشكلة الفتيس ضرووووووري

المشاركة الأصلية كتبت بواسطة م/أحمد عبد الفتاح

أول حاجه تشوف بس الموتور حصل فيه حاجه ولا لأ وتبدأ بالحاجات السهلة لأن كل الميكانيكية حايقولوك غير الموتور او اعمله عمره وممكن ان شاء الله تكون حاجه بسيطة :
- فيه بلف تهوية للكارتير ممكن يكون باظ - اسمه pcv وساعات بيقولوا عليه ccv ده ممكن يدخل زيت عالموتور وانت وبختك الزيت حيبان فى كل البوجيهات ولا بوجيه واحد - علشان تعرف انه سليم ولا لأ هو عبارة عن كوعة بلاستيك داخلة على الموتور من فوق جنب غطا الزيت وطالع منها خراطيم منهم خرطوم رفيع رايح على علبة فلتر سحب الهوا حتشوف الخرطوم الرفيع ده جايب زيت ولا لأ وفلتر الهوا شارب زيت ولا لأ ( ممكن يكون مكانه مختلف حسب نوع الموتور بتاعك بس علشان توصله تشوف الخرطوم الصغير اللى داخل على علبة فلتر الهوا هو ده خرطوم الـ pcv وتمشى وراه لغاية ماتوصل للبلف وحتفتح الاول علبة الفلتر وتشوف الخرطوم ده مغرق الدنيا زيت ولا نضيف؟) - لوجايب زيت حاتنضف الـ pcv او تغيره.
- قيس زيت الموتور ناقص ولا زايد ولا مطحن ولا ايه ظروفه ؟
- غير الزيت والفلتر بتوع الفتيس بس بزيت بتاعها مش اى زيت ( عمر الزيت ماحينزل كله من الفتيس فاللى حاتعمله تغير الزيت والفلتر بتوع الفتيس وبعدين تمشى ١٠٠ كم وبعدين تغيره تانى وتتابعه لو لونه اغمق واتوسخ غيره تالت بس طبعاً لو حسيت بتحسن فى الفتيس من اول تغييره)- كمان اهم حاجه تشوف الزيت اللى نزل منه فيه رايش ولا مافيهوش.
- غير زيت الكورونة الوسطى ( transfer case) اللى هى طالع منها عمود الكردان الأمامى وعمود الكردان الخلفى.
وابقى طمننا وخير ان شاء الله

السلام عليكم
إسمحولي أشكركم للإهتمام اللي كان من طرفكم بالموضوع
ملخص الموضوع إني بحاول احدد مين السبب الرئيسي في المشكلة
صاحب العربية القديم بيقول انا فعلا غيرت فتيس ولكن عملت للفتيس الإستيراد اللي راكب دلوقت سيرفيس كامل قبل ما يمشي عليه يعني غير الحساسات الثلاثة الداخليين واختبرهم تمام التمام وغير فلتر وزيت. يعني حسب معرفتي ما فضلش في الفتيس غير الهيكل الخارجي والكلاتشات هما اللي ما تغيروش. وبيقول انه جرب الافتيس مدة شهر تقريبا بمسافة ١٠٠٠كم وكان بيمشي يوميا عليه مايوازي ٣٠كم يوميا اوقات في داخل القاهرة في الزحمة واوقات على الدائري وجري على كيفك من غير ماتهر معاه مشكلة.
طيب انا من وقت ما اشتريت العربية كان كل شيء سليم تقريبا بمعنى اني مش واخد على العربية مش مطبع
لما اخدها قريبي"أخويا" وسخنت منه ووديتها عند ناس كبيرة في الجيب من غير ذكر اسماء قالي الحق الموتور بعد خمسة والبوجية الخامس غرقان زيت لما طلعه قدامي مع العلم انا غيرت الوجيهات بعدها بكم يوم وكل شوية ببص على البوجيه ده معادش فيه نقطة زيت لكن تهيس الفتيس هو اللي فضل بلعكس ده زاد لحد إن العربية مش رادية تتحرك دلوقت واكثر من واحد بتاع فتيس قالو ان الفتيس محروق من الاساس
نقطة اخيرة علڜان اعمل التست بتاع تغير الزيت والفلتر هخش في تكلفة توازي نص ثمن عمرة او فتيس تاني استيراد والعربية مش قادر اساسا الفتيس ده يحركها وريحة الزيت محروق ولونه اسود

المشاركة الأصلية كتبت بواسطة م/أحمد عبد الفتاح

الحمدلله ان الموتور مجابش زيت تانى على البوجيهات - بس لازم تغير زيت الموتور والفلتر بتاع الموتور- بالنسبة لموضوع الفتيس هل حضرتك شوفت مقاس زيت الفتيس اول ما اشتريتها وكان مقاسه مظبوط؟ هل كان لونه احمر شفاف قبل السخونة بتاعة العربية؟؟؟؟ لو كان كده يبقى العيب مش عند صاحبها الاولانى.
لو كنت ماخدتش بالك ان الزيت ناقص ولا مخدتش بالك انه محروق قبل ماتشتريها يبقى الزيت كان ناقص من الاصل والمشى بالعربية كده بيخلى اقراص الاحتكاك تتاكل بس على فترة مش مثلاً بعد ١٠٠ كم . ممكن يكون فيه تسريب زيت فتيس او الزيت مش بتاع الفتيس ده .
الخلاصة ان موضوع السخونة اللى حصل ده طالما مأثرش على الموتور ولا جاب جوان وش سلندر ولا الزيت بتاع الموتور طحن ولا عندك ميس فاير فى اى اسطوانة يبقى مأثرش على الفتيس قوى يعنى الفتيس كان تعبان من الاول واقراص الاحتاكاك كانت متاكله ويادوب ممشية العربية لغاية مخلصت دلوقتى - ده رأيى المتواضع ويحتمل الصواب أو الخطأ .
ولو الموضوع ده فيه قعدة رجالة كنت حاقول الحل حاجه من اتنين :
- ترجع العربية وتتنازل عن جزء من اللى دفعته فيها .
- أو تغير الفتيس والمالك الاولانى يدفع نص تمنه ونص مصنعية التغيير.
وبرضه لازم تحطها على كمبيوتر سكان علشان تعرف تحدد المشكلة ولو الفتيس عاوز يتغير حايديلك اكواد p0730 - p0731 p0732 - p0733 - p0734 يبقى حصل انزلاق فى الفتيس ويستحسن تغيره بلاش موضوع عمرة الفتيس ده مش بيعيش كتير .

فعلا أنا مش قادر أشكرك على مدى تفاعلك وإهتمامك بالرد وبحث الموضوع وجميع من شارك برأيه في الموضوع ومتأسف إني شغلتكم بالمشكلة بس فعلا ريحتوني وأفدتوني