وش أوكتافيا _مساعده مستعجله الله يباركلكم

**HossamEldeen** · 15-03-2015 01:12 AM

سلام عليكم ياجماعه

أنا بقالى فتره كبيره بتاع 4 شهور بدور على عربيه واستقريت على فليشيا وش أوكتافيا
كانت وقعت قدامى عربيه استعمال طبيب بمعنى الكلمه بس للأسف ملحقتش اخلص فيها وراحت لصاحب نصيبها

المهم دلوقتى قدامى واحده وش أوكتافيا 2000
الكماليات :
1- زجاج كهربا أمامى
2- سنتر لوك بس عاوز يتظبط

بس فيها مشكله فى المارشدير مش بيجى بسهوله تقيل قوى ولازم تتعافى عله علشان يجيب معاك
ووديتها لميكانيكى يبصلى عليها

قاللى عاوزه
1- تغير مساعديين أمامى وخلفى
2- تغير طقم دبرياج
3- تيل فرامل
4- فردتين كاوتش
الكلام ده يتكلف حوالى 2500 جنيه
( ده غير اللى ممكن يكون مستخبى )

وصاحبها عاوز يخلص على 29000

ايه رأيكم ياأصحاب الخبره أتكل على الله وأخلص فيها بكره ان شاء الله :) ؟؟؟

**HossamEldeen** · 15-03-2015 08:46 AM

فين المساعده يارجاله ؟؟؟!!!

**ehab mobarak** · 15-03-2015 02:59 PM

دور علي حاجة احسن ماتتغرش في السعر شكل العربية واقعة

**HossamEldeen** · 15-03-2015 03:25 PM

المشاركة الأصلية كتبت بواسطة ehab mobarak

دور علي حاجة احسن ماتتغرش في السعر شكل العربية واقعة

يعنى لو قلنا مثلا حطيت 3000 ووقفت عليا ب 32000 كويس ولا كتير
خصوصا انا زهقت من كتر التدوير وقدامى واحده رينو رينبو كامله موديل 2000
بنفس سعر الفليشيا ب 29000 بس دى مش محتاجه غير رش وش نضافه بره فبرضه هتقف عليا ب 31 او 32

وبالنسبالى الاتنين شبه بعض خصوصا ان تكييف الرينبو ضعيف شويه

**ahmed elhariry** · 15-03-2015 08:26 PM

وش الاوكتافيا انا شايف بالسعر ده قليل لو متاكد انها مفهاش حاجه غير الي انت قلته تبقي لقطه بس اطمن علي الموتور وحاله الصاج ....

**HossamEldeen** · 15-03-2015 09:15 PM

المشاركة الأصلية كتبت بواسطة ahmed elhariry

وش الاوكتافيا انا شايف بالسعر ده قليل لو متاكد انها مفهاش حاجه غير الي انت قلته تبقي لقطه بس اطمن علي الموتور وحاله الصاج ....

عندك فكره ممكن اتأكد من الموتور ازاى ؟؟

**adiaa222** · 16-03-2015 07:42 AM

فعلا سعرها غريب شوية. لو متاكد انها نظيفة اشتريها .
موتور - العربية مبتسخنش - لو تعرف تجربها وتجيب بيها 120 كيلو يبقى كويس

**HossamEldeen** · 17-03-2015 11:04 AM

المشاركة الأصلية كتبت بواسطة adiaa222

فعلا سعرها غريب شوية. لو متاكد انها نظيفة اشتريها .
موتور - العربية مبتسخنش - لو تعرف تجربها وتجيب بيها 120 كيلو يبقى كويس

وايه رأيك فى مشكلة المارشدير ؟ ممكن يكون زيت الجير بوكس عاوز يتزود ؟

**adiaa222** · 17-03-2015 12:05 PM

المشاركة الأصلية كتبت بواسطة hossameldeen

وايه رأيك فى مشكلة المارشدير ؟ ممكن يكون زيت الجير بوكس عاوز يتزود ؟

وممكن يكون فى مشكلة فى الفتيس نفسه
بس الفكرة كالتالى وخليك معايا : انا كنت بفكر فعلا ابيع عربيتى الشهرين الجايين ولكن لعدم توفر المال لشراء الزيرو حاليا . ان شاء الله هبيع العربية اول السنة الجديدة لاننى مقدرش استغنى عنها . وبالتالى اى حد يجى يشترى عربيتى مش ممكن اجى اقولة ان تيل الفرامل وطقم الدبرياج عايز يتغير او المساعدين عايزين يتغيرو !!!!!! طب ازاى انا ماشى بيها كدة اصلا !!!!!!!!!!!!! معنى كدة ياما انا مبصرفش على العربية وبالتالى ماخفى كان اعظم. او زهقت من الصرف على ها لان مشاكلها كتير ...... والله اعلى واعلم

**smoke_vfx** · 17-03-2015 07:52 PM

بص يا صديقى انا اشتريت عربيتى بسعر بتاعتك وكنت واخدها على اساس انى هاصرف عليها 2000 جنيه بالكتير وبسبب اهمال صاحبها انا اتدبست فى مصاريف كتير منها تغيير فتيس وعمرة موتور وعاوز اقولك ان كل اللى شافو العربيه قبل ماشتريها قالو العربيه تمام وفعلا الموتور ماكنش باين عليه اى حاجه المهم وبجانب ده غيرت مقصات ومساعدين واربع فرد كاوتش الحمد لله العربيه بقت تمام ومرتااح جدا معاها بس خلى بالك هاتزهق منها لو ماعندكش صبر وكمان ايه يجبرك على وجع القلب ده اصبر واختار حاجه تكون مش محتاجه لشغل ده كله لان هاتلاقى كتير اوى مستخبى ومش هايظهر غير مع الاستخدام الفليشيا وش اوكتافيا لو حالتها كويسه مش هاتقل عن 35000 يبقى منين هو عارضها بالسعر ده