الموضوع: تجربة جديدة مع عز العرب

المشاركة الأصلية كتبت بواسطة eng f3lix

بداية احب اقول رغم كرهي لعز العرب بس ساعات الواحد لازم يديله حقه بردو

معلش الموضوع طويل شوية بس ممكن يكون مفيد لاي حد هيقع في المشكلة دي

البداية كانت استلامي للجين2 اسود شهر 11 اللي فات .. مع اول وهلة وعلي سرعة 100 تقريباً لقيت رعشة في الطارة والعربية التي قولت مش هستني صيانة ال 1000 وروحت عملتها برة في محل عند محطة كوبري القبة .. الراجل خلص طلعت اجرب لقيت الرعشة زي ماهيا طبعاً رجعتله تاني جرب العجل تاني لقاه مظبوط والجهاز بيدي اصفار المهم نزل تحت العربية قالي ده كوبلن داخلي شكله فيه مشكلة قولتله العربية عاملة 100 كيلو قالي جايز عيب صناعة قولتله شكراً ومشيت ... بعدها بااسبوع قولت اروح بريدجستون عمارات العبور الراجل ظبط العجل ومشيت قولت اجرب تاني طلعت الرعشة زي ماهيا

المهم عملت صيانة ال 1000 في عصام صفا وحكيتله علي الموضوع ده قالي روح التوكيل اتعامل معاهم .. وكمان كانت العربية مايلة ناحية الشمال قدام

روحت عز العرب اشتكي من الحدفة وموضوع الميل وكمان الرعشة .. دخلو العربية عالترصيص قالي تمام ومفيش حاجة نطلع نجرب نلاقي العربية بترعش .. تدخل العربية عالزوايا وتطلع وبردو بتحدف .. اغير الكاوتشات بردو الاقيها بتحدف قولتله خلينا في موضوع الرعشة دي قال هدخلها تاني ونشوف يمكن في رصاص وقع .. المهم العربية دخلت عالترصيص وخرجت وطلعت اجرب انا والمهندس مصطفي لقيت العربية بقت تمام قولت مفيش مشاكل المهم رجعنا تاني عالتوكيل وخرجت انا بالعربية وانا مروح لقيتها بردو لسة بترعش .. كلمت المهندس مصطفي احكيلو اللي حصل قالي معلش فضي نفسك وتعالالي تاني ونشوف

بعد اسبوع تقريباً حجزت وروحت تاني العربية دخلت عالترصيص زي كل مرة بنطلع نجرب نلاقي رعشة بردو

المهم دخلت بنفسي اشوف وهو بيرصص يمكن يكون بيشتغلني لقيت الجنوط مش طبيعي تحس انه بقاله فترة مش ممكن يكون جنط جديد .. المشكلة دي لقيتها في 2 جنط

كتب تقرير نهائي ان العربية محتاجة جنوط

روحت للاستاذ حمادة بتاع الضمان قالي هخاطب ماليزيا بخصوص الجنوط وهل في امكانية تتغير في الضمان ولالا

المهم قعدت فترة مستني الرد طبعاً مفيش اي رد وبالصدفة النهاردة الصبح المهندس جمال خطاب كلمني قالي تعالي دلوقتي عشان الوفد الماليزي موجود ولازم يشوفو العربية عالطبيعة ويجربوها عشان يقتنعوا بالعيب لانه مش مقنع تماماً

المهم روحت النهاردة والعربية عاملة 3800 كيلو دخلت العربية عالترصيص تاني عشان تترصص وطلعوا جربوا العربية لقي الرعشة بتبتدي من 140 مش من 100 زي مااشتكيت

المهم من هنا لهنا قالي ده طبيعي عشان ظروف الطريق ومعرفش ايه طبعاً استغربت ان واحد من الشركة نفسها بيقولي كدة .. لقيت المهندس مصطفي اعترض علي الموضوع قال احنا كل يوم بنجرب عربيات مفيش حاجة اسمها طبيعي .. المهم جاب عربية برسونا زيرو ركب ال2 جنوط بتوعها مكان اللي فيهم المشكلة وطلعنا نجرب العربية الاقي مفيهاش حاجة وبعد مارجعنا الاستاذ حمادة كلمه تاني وحكاله الظروف واخيراً وافقوا بتغيير 2 جنط في الضمان بس للاسف مش موجودين وهستناهم هما والسوستة الشمال عشان موضوع الميل

وفي النهاية احب اشكر المهندس مصطفي جمعة والمهندس جمال خطاب والاستاذ حمادة عشان فعلاً قاموا بدورهم واستحملوني كتير

وبالرغم من المواقف السابقة ليا مع الواجا بس فعلاً عز العرب يعتبر من التوكيلات اللي بردو بتريح العميل في النهاية بدون شكوي في حماية المستهلك وخلافه .. عكس توكيلات تانية كانت معروفة انها محترمة بالاسم بس لكن افعالهم متدلش علي الاحترام ده

مبروك ....
انا دايما بقول كنا فين وبقينا فين مع التوكيل

اتحسن وبقى عنده مرونة عن الاول وعدل كتير من اسعار قطع الغيار

ألف مبروك وكويس انها اتحلت