محبط ومكتئب بشدة- محتاج مساعدة لايجاد عمل

**Keula** · 18-03-2015 07:52 PM

زى ما العنوان بيقول محبط ومكتئب بشدة وكم اشعر بالندم لضياع عمرى فى ردهات المدارس و الجامعة و الحصول على ليسانس حقوق لايسمن ولا يغنى من جوع بدلا من تعلم شىء مفيد
محبط بشدة من سوق العمل الذى لا ملامح له ولا مستقبل بمرتبات متدنية تثير ضحك اصدقائى الاوروبيين .
نفسى ابقى حاجة نفسى ادرس حاجة مطلوبة حاجة الاقى شغل بيها فى اى مكان براتب لايثير الضحك وبدون مايقولى منقدرش نشغلك لانك معندكش خبرة
ياترى هل فى كورسات معينة فى مصر ممكن الواحد ياخدها تخليه مؤهل للعمل مبتكلمش على كورسات وهمية تسويق الفنكوش - كمبيوتر - الخ
بتكلم عن كورس لشغلة بحق وحقيقى حاجة بعد مااخدها اشتغل بيها بمرتب كويس حاجة تكون مطلوبة ومرتبها كويس سواء فى مصر او برة مصر وظيفة بجد لان من الواضح ان بعد سنين التعليم دى كلها لابد انى اتعلم من تانى لان التعليم الاولانى لم يجعلنى مؤهل الا للكول سنتر وحارس امن (بمؤهلات عليا لو سكيورتى مش مؤهل عالى مينفعش :( ) وخلافه :(( . فهل من مغيث؟

**بحار** · 18-03-2015 08:43 PM

اللهم يسر لك باب الرزق الحلال ..

**prof2013** · 18-03-2015 08:45 PM

ربنا يفك كربك ياغالي انت وكل شباب المسلمين
استنه باسم يوسف هيدلك ع الطريق الصحيح

**mohamed2002** · 18-03-2015 08:47 PM

ربنا معاك ويوفقك ودة مش حالك لوحدة دة حال نسبة كبيرة من الشباب اللي حظه موفقوش في شغل حكومي او استثماري كويس
بس خد بالك لو فضلت تبكي علي حالك حتبقي بتضيع مستقبلك
عليك انك تبدء اشتغل في مجال المبيعات او تاجر في اي شئ او افتح محل
المهم اشتغل لان الشغل بيجيب شغل
ابدا دلوقت مش بكرة

**أبو آسر** · 18-03-2015 09:42 PM

أنا ليسانس حقوق زيك بس طبعا دخلت الكلية علشان التنسيق وخرجت منها بكرهها أكتر ما دخلتها وهتتعجب لما تعرف إني قعدت فيها 10 سنين !! بس ده لأني كنت معتبرها مجرد ورقة هاخدها كده كده وبدأت حياتي العملية بدري واشتغلت واتمرمطت واتقلبت في كذا مجال لحد ما استقريت حاليا على تصميم المواقع والتسويق الإلكتروني والحمد لله رب العالمين مكفي نفسي وبيتي بفضل ربنا وكرمه
أنا أخدت كورسات في مراكز معروفة ونزلت كورسات من على النت وبدأت أخبط هنا وهنا وأطبق اللي اتعلمته وأترجمه في صورة شغل لحد ما اكتسبت خبرة لا بأس بها خاصة إني حابب المجال ده ، فانت لو ليك في الكمبيوتر والإنترنت ممكن تنزل كورسات ببلاش من على النت وتتخصص في حاجة معينة تكون حاببها وواحدة واحدة هتشتغل وبمرتبات عالية لأن مجال الكمبيوتر عموما مطلوب في كل مكان فشوف انت حابب إيه وذاكر وطبق اللي بتذاكره لحد ما تكتسب خبرة وهتلاقي الشغل جه لوحده
ربنا يرزقنا وإياك من فضله

**J A G U A R** · 18-03-2015 09:56 PM

مارس المحاماه على ما تفرج

**amr011111** · 19-03-2015 08:03 AM

فيه كذا حاجه للمجال ده
اول حاجه ممكن تفتح مكتب محاماه وتبدأ فى منطقه شعبيه
هتاخد شقه بايجار 600 جنيه وتفرشها بـ 3000 الاف جنيه
وساعتها هيجلك ان شاء الله شغل كتير من الحاجات اللى زى صحة وقيع وقضايا برضه

تانى حاجه ممكن تتعلم فوتوشوب وتشتغل فى مراكز الدعايا لحد ما تعرف كل خبايا الموضوع وبعد كده تفتح برضه شركة دعايا
بتلف على المحلات وتسيب كروت ليك وتعرض عليهم تعمل يافطات والموضوع ناس كتير عملاها وماشى الحمدلله

الحاجه التالته لو انت فعلا عاوز تشتغل تفتح لك اى محل اكل
لو معاك مبلغ تقدر تدفعه مقدمة عربيه وتشتغل عليها
وبالتوفيق

**Abo_Mazen** · 19-03-2015 08:23 AM

مفيش حاجه إسمها شغل بس ..كان ليا واحد صاحبي يقولي ..هل تعتقد إن اللي شغال في جوجل مثلا أو في شركة ياهوو..معندوش طموح إنه يترقى ..فأنا كنت بضحك وأقوله ..وده هيترقى هيروح فين تاني ..وفعلا ..كنت بقول لنفسي وده هيترقى هيروح فين تاني ..ده شغال في شركه هي منتهى حلم أي حد ..هو فيه أكتر من كده ..فكان صاحبي ده يقولي ..آه ..فيه أكبر من كده ..إنه يمتلك الشركه دي أو يمتلك شركه مماثله ليها ..وكان بيقولي ..خلي بالك ..اللي شغالين في شركات زي جوجل مثلا لو معندهومش طموح ..مكانوش إستمروا في شغلهم ..الجميل بقى إن صاحبي ده شغال حاليا في شركة إتصالات الإماراتيه ..والأجمل إنه بيدور على شغل تاني في شركه أكبر ..بعد ما كان حتة موظف في شركه هبله بمرتب 1000 جنيه في الشهر

اللي عايز أقوله إن الوظيفه مش هدف ..تؤتؤتؤ..الوظيفه وسيله ..وسيله للإنتقال ما بين مراحل الحياه ..إنت ممكن تشتغل أي حاجه بأي مرتب مؤقتا كمرحله إنتقاليه لحاجه تانيه إنت بتكون بتأهل نفسك ليها ..إشتغل أمن ..إشتغل كاتب في مكتب محامي ..بس في نفس الوقت بتكون بتعد نفسك للمرحله اللي جايه..تكون في نفس ذات الوقت بتاخد كورسات تصميم مواقع ..بتاخد كورسات لغه ..بتاخد كورسات علاقات عامه ..شوف تخصص تكون حاسس إنك بتلاقي نفسك فيه ..بس أهم حاجه تشتغل ..مش عشان الفلوس..لا..عشان تخرح كل يوم البيت في ميعاد وترجع في ميعاد ..عشان يبقى في نظام في حياتك ..بدل ما يومك متلخبط وبتنام متأخر وبتصحى متأخر ..إنزل ..شوف الناس ..إتعامل ..خلي ليك علاقات مع رؤساءك في العمل وزمايلك..شوف المقرف وشوف الطيب ...بس أهم حاجه ..إوعى تخلي الوظيفه غايه ...الوظيفه وسيله لمرحله قادمه ..إفتكر الكلام ده كويس

-

-

الموضوع: محبط ومكتئب بشدة- محتاج مساعدة لايجاد عمل

LinkBack

أدوات الموضوع

عرض

-

-

-

-

المواضيع المتشابهه

استفسار ضروري جدا .. محتاج رأيكم بشدة

ارجو المساعده لايجاد خبير ساعات

مطلوب ورشة عمل لايجاد حل لخفض استهلاك اللانوس

طريقة مضمونة لايجاد سيارتك المسروقة او لمنع السرقة

محتاج تعاونكم بشدة معايا فى موضوع استهلاك البنزين

الكلمات الدلالية لهذا الموضوع

المفضلات

المفضلات

ضوابط المشاركة