عربية فى حدود 32 الى 35 الف

**ابن الحتة** · 19-03-2015 07:53 PM

السلام عليكم
اخواتى انا عايز ترشحولى عربية فى حدود 35 الف بالكتير جدا
انا كان معايا 94 عربية حلوة وشبابية
بس الاوبشن قليل
انا عايز تكييف، باور، مرايات كهربا، ازاز كهربا

فمحتار بين ابيزا 98 او سينا 2003

ياترى انة افضل بين الاتنين

**demonarundo** · 19-03-2015 09:40 PM

فيه فرق 5 سنين , فأظن السيينا 2003 حتكون افضل

**mohammad isdf** · 20-03-2015 04:48 PM

طالما دخلت فى ال 2003 يبقى وانت مغمض

**ابن الحتة** · 20-03-2015 05:04 PM

تسلم ياغالى

**Ahmed_Gallant** · 23-03-2015 11:28 AM

السلام عليكم
بالنسبه للاختيار انا هديك مقارنه سريعه بين الاتنين
بالنسبه للمساحه السيينا اكبر واوسع
بالنسبه للموديل الابيزا ال98 هى هى ال94 فرق الكماليات والسيينا هى هى ال2000 يعنى المقارنه موديل 94 وموديل 2000
بالنسبه لقطع الغيار الابيزا قطع غيارها موجوده اكتر جديد واستيراد لكن السيينا الاستيراد فيها قليل شويه وغالى والجديد مبالغ فيه مثال البوابه للابيزا الانجكشن 1.4 فى حدود 280 فى المتوسط بوابه السيينا ال1.6 600 جنيه احسن سعر ده
بالنسبه للاستيراد وبالنسبه للجديد حساس الشكمان فى الابيزا ب120 تقريبا فى السيينا ب400 جنيه
الابيزا والسيينا نازلين بانجكشن وبهاف انجكشن رشاش واحد ده للاستوك
بالنسبه للمكنه المكن المميز فى الابيزا هو الانجكشن واعطاله اقل وصيانته اسهل وقطع غياره موجوده كتير جدا بعكس الكربراتير (هاف انجكشن) صيانته ارخم شويه واعطاله رخمه بالنسبه للسيينا المكنه الكربراتير(هاف انجكشن) هى الافضل وقطع غيارها متوفره واسعارها افضل من ال1.6
الفرامل فى الاتنين متقاربه وسعر التيل متقارب
الدبرياج فى الاتنين واير بس بتاع الابيزا اخف بكتير جدا جدا جدا لكن السيينا تقيل وملوش حل دائم لخفيفه
الدواخل الابيزا دواخلها حساسه للزيوت وممكن تتبهدل لو ماخدت بالك كويس من نضافه الشنطه خصوصا بعكس السيينا دواخلها معمره بس نقطه ضعفها البارومه ممكن تبهدلك الكرتيرات فى لحظه
الشكل العام انا شايف السيينا شكلها افضل من الابيزا خارجيا وداخليا ويعاب على الابيزا فريم التابلوه بيتكسر بسهوله وسعره 250 جنيه وهيتكسر تانى لان نقطه ارتكاز التابلوه فى النص وملهاش حل
العربيه السيينا جرايه بضمير والايروديناميك بتاعها ممتاز ميحسسكشى بالهوا وبسهوله ممكن تجيب 160 لل 1.4 و180 لل1.6 ومبتكونشى دايس على العربيه ولا مزعلها فى حاجه بس فى الغرز الابيزا تكسب والمنحنيات على سرعه وكمان الابيزا ملمومه وشبابيه اكتر
بالنسبه للصاج والابواب الابيزا تكسب بجداره باب تقيل ومفصله محترمه والزجاج قوى وممكن يكون الخلفى ملون وصوت قفله الباب ممتعه للودان بالنسبه للسيينا الباب مقارب ل اللانوس وصوته مش حلو فى القفل
بالنسبه لوضعيه القياده الابيزا تكسب لكونها وضعيه رياضيه وممتعه فى السواقه بعكس السيينا نقدر نقول قعدتها حلوه
بالنسبه لاستهلاك البنزين الابيزا ال 1.4 انجكشن موفره جدا نقول متوسط 7 لتر لكل 100 كم فى الطريق المفتوح لكن السيينا ال1.4 هاف انجكشن لو عملت 9 لتر لكل 100 كم يبقى كويس ونادرا ما تعمل اقل من كده
العربيتين ماشيين بنزين 92 واقل من كده يبقى انت بتهينهم
مشاكل السخونه الابيزا تكسب لان موتورها فيه تشتيت حرارى ملوش حل وبتمسك حراره فتره طويله قبل ما المروحه تشتغل ونادرا لما بقابل حد بيشتكى من دوره التبريد بعكس السيينا معرضه اكتر للسخونه بس مش معنى كده انها فيها عيب بالعكس العربيه طول ما دوره التبريد بتاعتها مظبوطه شغاله حلاوه بس الاهمال فيها بيعمل مشكله
الابيزا عربيه اعتماديه وحماله ومعاك فى اى ستين كلب بس يعيبها انها فقايرى شويه وتحس انها قديمه اما السيينا فرفوره ودلوعه واموره وتحسسك بالتكنولوجيا وانت جواها مقارنه بالابيزا
يارب اكون افدت
دمتم بود
احمد عبد السلام