المشكلة الأزلية فى صعوبة تدوير العربية .. !!

يا جماعة أرجو الإفادة فى هذه المشكلة التى أرقتنى .. العربية سوزوكى ماروتى موديل 94 ..
أنا لعبتها كل الألعاب ومفيش فايدة ..

وطبعا زهقت من إفتاءات الميكانيكية والكهربائية والنقاشين والسباكين وجميع أنواع الحرف ..

المارش كان باظ خالص .. قطع .. رحت لكهربائى صلحه غيرله طقم شربون وطقم جلب .. حسيت انها بقت كويسة كام يوم وبعدين رجعت تانى .. رجعتله قالى غير بوجيهات .. غيرتها وحسيت أنها بقت كويسة كام يوم .. ورجعت تانى .. رجعتله .. قالى غير بطارية .. غيرتها .. ونفس الكلام .. قبل كده رحت لميكانيكى قالى مفيهاش حاجة روح لكهربائى ..

هى الصبح أو لما أركنها شوية وآجى أدور بتعمل كده ..فى مارش كويس وطبعا قبل تغيير البطارية كان مرتين كده وبعدين يبدأ ينام .. دلوقتى بيفضل شغال كويس بس مش بتلقط .. وبعدين تبدأ بتعمل صوت اللى هو بتاع بداية اللقط وكأنها خلاص حتدور وبعدين تغير رأيها وترجع تانى .. بعد محاولات كتيرة بتدور ..

أنا بجد زهقت من الموضوع ده ومش عارف أعمل ايه .. أروح لميكانيكى ولا لكهربائى .. ؟؟ حد يعرف حد كويس بيفهم فى الماروتى ؟؟
حد عنده احتمالات تانية أبص عليها ؟؟

بليييييييييييييز هييييييييييييييلب .. !!!!

بص يا باشا
الاول جرب تكارك بنزين قبل ما تدور ممكن لو لسة المشكلة موجودة خلي المكانيكي يشفلك كابلات البوجيهات ممكن تكون عوزة تتغير او البوجيهات نفسها تكون غبرتها بنوع رديئ او وخدة رطوبة .

شكرا يا أستاذ رامى ..
انا جربت فعلا أكارك بنزين بالراحة مرة وبقوة مرة .. مفيش برضه ..

طيب حروح لميكانيكى وربنا يسهل ..
بس لو السبب من سلوك البوجيهات أو البوجيهات تعمل كده ساعات وساعات ؟؟

أنا جبت بطارية جديدة 40 أمبير والمفروض انها دى المناسبة للعربية .. يعنى أنا سألت هنا فى المنتدى والأستاذ سبعاوى قالى ان بطاريتها الأصلية 38 أمبير .. أنا كنت بقول يمكن البطارية ضعيفة وكنت جبت بطارية أكبر من كده .. بس البطارية بتدى مارش كويس .. !!

لو فيها مارش و مش عاوزه تلقط روح لكهربائى كويس خليه يبصلك على المشت الالكترونى ممكن يكون هو اللى عامل القلق دا او خليه يبص على الموبينه وممكن تكون سلك بوجيهات خليه يبصلك على الحاجات دى ان شاء الله يكون حلها بسيط

طالما المشكله الصبح بس و العربيه بارده و المارش بيدور عادى يبقى ضبط كاربراتير ........... يعنى خليط الهواء و البزين فقير

كمان فى الشتا دوس دوستين بنزين و شد الفاط قبل ما تدور

شكرا على الردود يا جماعة ..

أنا فعلا جربت إنى أشد الشفاط الأول وأدوس بنزين .. بس برضه منفعتش .. يمكن لقطت بسرعة شوية عن الأول بس محلتش المشكلة تماما ..

حروح لميكانيكى إن شاء الله وربنا يسهل ..

أنا بس كنت عايز أتأكد ده عيب كهربا (وخاصة البطارية .. لانها لسه جديدة) .. ولا ميكانيكا ..

بص يااخى انا نفس المشكله بتحصل معايا مع 128 فى الصبح

لكن انا جربت الاتى وبتدور بعد مرات قليله وممكن تدور من اول او ثانى مره

اولا دوس بنزين عده مرات متتاليه (حضر لها يعنى)
ثانيا شغل الشفاط للاخر او دوس برجلك بنزين للاخر وانت بتضغط على مفتاح المارش علشان تلقط

ان شاء الله هتدور معاك

كلما حضرت بنزين كويس وضغطت عليه اثناء فتح المارش كلما لقطت بسرعه

بص يا سيدى عن تجربة فى عربية مراتى الماروتى 98 و كان بيحصل كده برضه و طلع السبب من المارش و فضلت اصلح فيه و صرفت عليه كتيير (يمكن ثمن واحد جديد) و برضه كان اخروا اسبوعين ثلاثة و يقطع تانى و فى الاخر رحت جبت واحد استعمال نضيف ب 320 ملطوش مصرى و ما شاء الله شغال تمام و خد بالك ان الماروتى من العربيات الحساسة فى نقطة الدوارة دى و لازم تكون الكهربا مظبوطة كويس علشان تدور من أول مرة

شكرا أستاذ إبراهيم .. أنا فعلا بعمل كده وبتدور بس عدة مرات .. بس انا عارف اتقالى إن ده ممكن مع الوقت يبوظ المارش ..

شكرا أستاذ gemino .. طيب أنا لسه مصلح المارش .. كان قطع خالص .. دلوقتى هو شغال كويس مش بيقطع .. هل قصد حضرتك إن المارش عندك كان كل شوية يقطع وتصلحه ؟؟ ولا كان شغال بس فيه عيب بيعمل موضوع التأخير ده ؟؟

اقتباس:

---

المشاركة الأصلية كتبت بواسطة Ahmed Hamdy

شكرا أستاذ إبراهيم .. أنا فعلا بعمل كده وبتدور بس عدة مرات .. بس انا عارف اتقالى إن ده ممكن مع الوقت يبوظ المارش ..

شكرا أستاذ gemino .. طيب أنا لسه مصلح المارش .. كان قطع خالص .. دلوقتى هو شغال كويس مش بيقطع .. هل قصد حضرتك إن المارش عندك كان كل شوية يقطع وتصلحه ؟؟ ولا كان شغال بس فيه عيب بيعمل موضوع التأخير ده ؟؟

---

العفو يا أ/أحمد
موضوع المارش بدأ بتقل فى الدوارة و صعوبة فى اللقط رحت للكهربائى فكه و قالى دى الجلب اتكلت و غيرهم و بعد كده بكام يوم حصل نفس الموضوع و المرة دى طلع الكابل اللى طالع من البطارية للمارش تعبان و مش بيوصل كهربة قوية علشان المارش يقوم صح و غيرته برضوا و فضل شغال كويس اسبوعين لحد ما بدأ يعمل صوت خشانة جامدة فى الدوارة و بعد كده قطع و روحت لواحد علشان يصلح الموبينة بتاعت المارش و يملى النحاس اللى اتاكل و برضه بعديها باسبوعين قطع و لقيت نفسى صارف كتيير على الفاضى رحت فكه و رميه و جبت واحد استعمال نضييف، و هى دى قصة المارش بالتفاصيل المملة يا ريت تقوللى انت صلحت ايه فيه بالظبط

اقترح عليك تراجع وش الاسبراتير، هلى بيسرب رطوبة، جرب اشترى وش اسبراتير جديد(الجزء البلاستيك) وطقم سلك بوجيهات وشوف هتحل المشكلة وللا لأ

برضه سوال تانى، هل العربية بتطلع دخان ابيض لحظة الدوارة الصبح؟

اقتباس:

---

المشاركة الأصلية كتبت بواسطة gemino

العفو يا أ/أحمد
موضوع المارش بدأ بتقل فى الدوارة و صعوبة فى اللقط رحت للكهربائى فكه و قالى دى الجلب اتكلت و غيرهم و بعد كده بكام يوم حصل نفس الموضوع و المرة دى طلع الكابل اللى طالع من البطارية للمارش تعبان و مش بيوصل كهربة قوية علشان المارش يقوم صح و غيرته برضوا و فضل شغال كويس اسبوعين لحد ما بدأ يعمل صوت خشانة جامدة فى الدوارة و بعد كده قطع و روحت لواحد علشان يصلح الموبينة بتاعت المارش و يملى النحاس اللى اتاكل و برضه بعديها باسبوعين قطع و لقيت نفسى صارف كتيير على الفاضى رحت فكه و رميه و جبت واحد استعمال نضييف، و هى دى قصة المارش بالتفاصيل المملة يا ريت تقوللى انت صلحت ايه فيه بالظبط

---

اللى حصل معايا فى المارش انه فى يوم كده بدور لقيته قطع خالص مفيش أى صوت .. بس حاولت كام مرة .. اشتغل .. وقعد على كده كام يوم وكل ما أروح لحد من الكهربائية الكفتجية يقولى بطارية من غير ما يكلف نفسه ويقوم يبص على العربية.. أروح لمحل بطاريات وأسأل على البطاريات بس أقوله عايز أتأكد إن العيب من البطارية .. يجيب جهاز قياس الشحن ويقيس يقولى البطارية كويسة .. أروح لكهربائى أحكيله الحكاية (أكتر من كهربائى) يقولى دى البطارية بتشحن من الدينامو بس الشحن بيفضى .. لحد ما المارش قطع خالص ومبقاش يدور خالص .. بس العربية كانت بتدور بالزق .. قلت ماشى بطارية .. رحت لمحل بطاريات وجابلى بطارية وركبهالى .. ومفيش مارش برضه يا معلم .. قالى روح لكهربائى يشوفلك المارش .. !!!!!! والكلام ده كان فى رمضان بالنهار .. وأحاول أدورها بالزق مفييييييش .. قعدت أزقها لحد ما ركنتها فى حتة كده وروحت مشى .. ورجعت بعد الفطار جبتها ..

رحت لكهربائى تانى .. قالى ده المارش حفكه وأقولك فى ايه .. ماشى .. فكه وقالى محتاج طقم جلب وطقم شربون .. طبعان أنا مش فاهم يعنى ايه بس ماشى .. غيرهم وبعدها المارش بأه كويس والعربية كانت بتدور كويس ..

قعدت بتاع أسبوعين ورجعت تانى تدور بصعوبة .. بس المارش لسه كويس .. رجعتله قالى غير بوجيهات .. غيرتها .. قعدت برضه شوية كويسة ورجعت تانى .. رجعتله .. قالى لأ كده بأه بطارية .. هى فعلا البطارية كانت ضعيفة "كلورايد سايلة بقالها أكتر من سنة ونص وكانت برضه من ضمن المحاولات عند أحد الكهربائية انه غيرلها ميه وشحنها" فقلت خلاص بأه مش فاضل غير البطارية .. جبت بطارية جديدة جافة 40 أمبير كورى .. ونفس الكلاااااااااااااااااااام ..... مع ملاحظة إن المارش شغال كويس مش بيقطع ومش بينام ..

ودى حكايتى مع العربية والدوارة .. !!

اقتباس:

---

المشاركة الأصلية كتبت بواسطة sab3aawy

اقترح عليك تراجع وش الاسبراتير، هلى بيسرب رطوبة، جرب اشترى وش اسبراتير جديد(الجزء البلاستيك) وطقم سلك بوجيهات وشوف هتحل المشكلة وللا لأ

برضه سوال تانى، هل العربية بتطلع دخان ابيض لحظة الدوارة الصبح؟

---

سعيد بحضورك جدا سبعاوى باشا ..

العربية فعلا بتطلع دخان أبيض لحظة الدوارة الصبح ... ده معناه ايييييييييييه ؟؟؟

انا كان عندى نفس مشكلة وعملت كل الى حضراتكم قلتم عليه والى االميكانيكية افتوا به وفى الاخر انا اكتشفتها جلدة الرداخ الى فى الكربراتير كانت بتسرب بنزين من غرفة العوامة وده الى كان بيأخر الدوارة بعد حل المشكله من اول تكه بتدور وربنا معاك
م / اشرف محمد

حضرتك كده خليت مشاكل المارش الحمد لله بس لو قطع منك تانى نصيحة هات واحد تانى و وفر فلوس التصليح

نيجى بقى لتأخر الدوارة ايه حالة الموتور ؟؟ و ايه حالة البوجيهات ؟؟ شكلها عامل ازاى ؟؟؟ عليها أبيض و لا عليها هباب اسود و لا عليها زيت ؟

رحت لميكانيكى أول امبارح ... قالى مش حعرف العيب دلوقتى لانها بتدور عادى .. هاتها بيتها جنب الورشة ونشوف الصبح بتعمل ايه .. !!

امبارح متحركتش بالعربية .. النهاردة مرضياش تدور خالص غير بالزق .. !!

اقتباس:

---

المشاركة الأصلية كتبت بواسطة Ahmed Hamdy

سعيد بحضورك جدا سبعاوى باشا ..

العربية فعلا بتطلع دخان أبيض لحظة الدوارة الصبح ... ده معناه ايييييييييييه ؟؟؟

---

لو الدخان ده دخان زيت وليس بخار ماء، تعرفها من الريحة، يبقى غالبا العربية فيها كاوتش الصباب مهترئ، وكاوتش الصباب هو اللى بيمنع الزيت انه يدخل من وش السلندر الى غرف الاحتراق، فانت لما بتسيب العربية لفترة الزيت اللى مخزن فى وش السلندر بينقط ويدخل الى البساتم من الصبابات المفتوحة او يركن على الصبابات المغلقة ويدخل البساتم بمجرد حركة الصبابات عند التدوير، والزيت ده طبعا بيدهور خواص الوقود ويعيق احتراقه مما لا يؤدى الى استطاعة المحرك الاستفادة بطاقة حرق الوقود لتكوين حركة ذاتية، فتفضل انت تحرق فى قلب المارش لحد ما الموتور يحرق كل الزيت وميدورش غير لما يشوف دفعة بنزين نضيفة من غير زيت ، والزيت نصف المحترق ده بيركن فى الشكمان واول ما يدور الموتور حرارة العادم تحرق الزيت ده ويطلع لك فى شكل دخنة بيضاء، لذلك لو الدخنة دى دخنة زيت اعمل طقم كاوتش صباب للعربية، طقم الكاوتش عادة بيكون فى حدود عشرات (يعنى 40-50-60 جنيه) حاجة كدة، والمصنعيات من 60 الى 100 جنيه ، بس ممكن تاخد لها يوم كامل او يومين لأن الأمر يستلزم فك وش السلندر وارساله لمتخصص الصبابات، وبالمرة بص على الصبابات وقواعدها ودلايلها، لو كويسين اعمل لهم روديه وخلاص، لو مش كويسين غيرهم علشان متفكش تانى

شكرا جدا يا باشمهندس سبعاوى على الرد الجميل ..

أعتقد الدخان ده دخان زيت لانه بيكون كتير وله ريحة .. بس هو ساعات بيحصل وساعات لأ .. مش دايما يعنى .. !!!

هل ده برضه ليه معنى ؟؟