اقتباس المشاركة الأصلية كتبت بواسطة ahmedmiy مشاهدة المشاركة
بسم الله الرحمن الرحيم

الحمد لله والصلاة والسلام على رسول الله نبينا محمد خير خلق الله

بصراحة يا جماعة أنتوا جرتوا رجلى فى الموضوع ده بس هو الموضوع كلوا جميل جدا من الاول ويمكن من أحسن المواضيع فى الاجتماعي الفترة الاخيرة بالمشاركات المميزة جدا من الاعضاء الكرام الافاضل بأخلاقهم العاليه وطرح الافكار المفيده.

ومن وحى المشاركة الرائعة جدا من العضو engmody32

خلينا نقول مثلا واحد دلوقتى غنى ومعاه فلوس كتير جه يطلب ايد بنتك أو اختك وانت طلبت منه فيلا مثلا 20 مليون وشبكة ومجوهرات ب 10 مليون وعربيه مرسيدس بنص مليون وشهر العسل فى 3 دول من 3 قارات لمده 3 شهور واخيرا عبد الحليم يرقص فى الفرح ... وكل ده العريس وافق عليه وزياده خلاص وكمان قرر يجبلك أنت وام العروسة وأخواتها كلهم هدية لكل واحد بنص مليون .. اظن كده تمام جدا .. تمام وده مقابل أنك حتوافق تجوزه من العروسة الى هو اختارها .

المهم هنا بعد الجواز طلع العريس مختل عقليا وسادى أو مجنون وكل ده كان مش باين وانت كنت مهتم بالهدايا والاتفاق وبعد الجواز على طول بدا العريس يعذب العروسة .. بجد مش بهزر ويعمل فيها كل ما يريد .. بالله عليكم الموقف كده ايه وممكن يحصل ايه ومين يعمل ايه

يبقى الى نطلع بيه من كده اذا كان أهل العروسة حيقبلوا العريس علشان الفلوس يبقوا هما بيعتبروا ان العروسة قطعة لحمة وبالتالى اى راجل عاقل محترم لن يقبل بهذا من الاساس


وتعليقا على مشاركة العضوة الفاضلة lena jo

اذا كان ده وضع الشغل يبقى ديه نعمة عظيمة جدا والحمد لله إن لسه فيه أماكن الاغلبية فيها ناس محترمة ومتربية

اما بالنسبة ان الكفاءة مش حكر على الرجل .. خالص بالعكس غالبا بتكون الانثى متفوقة فى التحصيل العلمي بس الحقيقة أن ممارسة الشغل هيا الى فعلا المفروض حكر على الرجل .
وخصوصا حاولنا نوضح دور المراة الحقيقي ... وفى وظائف المفروض ما يكونش فيها عمل غير ليها هى بس زى فروع من الطب أو التمريض أو اى عمل يقتضى ان تشغله الانثى علشان تحافظ على حرمة انثى اخرى زيها .. بس كمان فى حالات بتكون خارج كده يعنى مثلا واحدة متفوقة جدا فى مجال نادر ومفيد لبلدها أو للبشرية كلها طبعا يبقى الشغل وقتها فى محله يعنى مثلا عالمة فضاء أو عالمة فى علم نادر

لكن لما ما نعترفش بالدور الحقيقي لها خلاص مفيش داعى نتكلم لو سلمنا ان لازم الست تشتغل خلاص
والموضع لازم يكون من قناعة حقيقة لها لما حتكون عارفة ان الى هى حتعملوا فى البيت مع زوجها وأولادها هو أصعب بكثير وأرفع قيمة وقامة من وجودها فى الشوارع كل يوم مواصلات وتعامل مع كل المستويات ووقت المفروض ملك للبيت ومن فيه بيتم هدره فى مقابل ان يكون دخل الاسرة كبير وتكون هى مبسوطة بالنزول كل يوم وتكدب على نفسها وتقول انا بفيد المجتمع فى حين ان الحقيقة انها بتضر المجتمع لما أولادها أو جوزها ما يخدوش حقهم من الرعاية يبقي الزوج لما يعامل الناس معاملة زفت او ينحرف والاولاد يكونوا هما كمان كده
وفى المقابل لازم الزوج يعرف كويس جدا قيمة الزوجة ويقوم هو كمان بالدور المفروض عليه بالكامل والراجل مش دورة انوا يجيب فلوس والا زى الفقرة السابقة
وجود الفلوس مش هو الهدف

واذا كان هناك نماذج نسائية قدرت توفق بين العمل والبيت وديه الاجابة دائما الحاضرة فمن المستحيل مهما كان ان يقوم الانسان بعملين مهمين جدا وكل واحد منهم محتاج تركيز شديد منه ان تكون النتيجة النجاح فى الاتنين بنسبة حتى 50 % والنسبة ديه كمان الى حتقدر تحققها لازم تكون لها صفات خاصة جدا بيها ومش بتكون عند كل الناس بطبيعة الحال ،، أنها تكون سيدة شديدة الذكاء والتنظيم والحكمة والقدرة العقلية والبدنية الفائقة وأظن ان ده مش موجود.

ولو حد مثلا عنده سلسلة محلات ينفع يدرها هو لوحده مع وجود العاملين فيها ولا لازم يكون معاه فريق ادارى بيساعد فى الإدارة ، ومثلا حد مشرف فى عمله ينفع يشرف على قسم معين فى شركته ونفس القسم فى شركة تانية لوحده يبقى الطبيعى التخصص والتركيز على عمل واحد وكل ده الحقيقة ارهاق فى التفكير لان الفطرة موجوده وواضحة بس الواقع هو الى فرض نفسه فاحنا افتراضنا انه ده عادى

على كل حال الاهم دائما ان اى مناقشة نفكر فيها علشان نطلع بافضل طريقة وافضل نتائج صادقة

أشكركم جدا وان شاء الله يكون الدكتور صاحب الموضوع مستفيد منه ، وبجد الموضوع كله جميل ومميز جدا



سبحان الله وبحمده سبحان الله العظيم

سبحان الله والحمد لله ولا إله إلا الله والله أكبر
اولا اشكرك يا استاذ احمد علي وصف مشاركتي بالرائعه هي و لا رائعه و لا حاجه هي واقعيه و بناء علي تجارب شخصيه او تجارب من الاصدقاء
فعلا الموضوع عامل زي عرض السلعه و لكن لما فكرت بعمق اكتشفت ان اهل العروسه بيكون ليهم وجهه نظر
في دنيا اصبحت ماديه جدا و بلد علشان تقدر تعيش عيشه ادميه فيه محتاج فلوس كتير
يعني علشان تسكن في مكان نضيف ( كومباوند مثلا )ليه مواصلات او طرق كويسه و تودي ولادك مدارس كويسه و تاكل كويس و كده و تجيب مولد لزوم انقطاع الكهربا
محتاج فلوس كتير جدا
طيب هل الناس للي معاها الفلوس دي مش موجوده لا موجوده
يبقي انا ليه ابص للشاب المكافح اللي هيقول لبنتي الميزانيه بتاعتنا و دي منقدرش عليها و دي متنفعش و دي مش عارف ايه و الشاب ده علي الحسن الظروف هيبقي اكبر من بنتي ب 7 سنين او اكثر
و لا ابص للشاب اللي اتخرج و بقي جاهز نتيجه انه اهله ميسورين سواء من السفر لخارج مصر او انهم ربنا كارمهم جوه مصر و هيجيي لبنتي يجيب شقه في برج ايه و لا كومباوند ايه و يجيب عربيه صغيره ليها زي عربيته و يعيشها عيشه تمام التمام و نضيفه و كمان احتمال كبير يبقي في نفس عمرها فمتحسش هي انه اكبر منها
ده بالنسبه للأهل اللي نفسهم بنتهم تعيش احسن عيشه ممكنه
بالنسبه للشباب لا الشاب المرتاح شرير و مش راجل و عيل طري
و لا الشاب المتكرحت فقري و ميستاهلش انه يتجوز و لا انه يخش دنيا
من الاخر هو واحد كان رزقه انه يلاقي كل حاجه متيسره بزياده و انه يتولد بأمكانيات عاليه
و التاني مشكلته انه رزقه محدود و ان اهله ناس علي قدهم
اللي اوجد المشكله دي في العصر الحديث
هو ظهور الطبقه المرتاحه من الشباب بكثره بتفوات نسبه ارتياحهم المهادي
يعني زمان كنت تلاقي من كل 1000 واحد واحد بس ظروفه احسن من اللي في سنه
فبالتالي مكنش عامل خلل و الناس بتختار من العرسان ال 999 اللي ظروفهم شبه بعض فتبدء تبص علي الدين و الاخلاق و العيله بزياده شويه
لما الطبقه المرتاحه زادت و نسبه اعتماد الابناء علي الاهل زادت في التجهيز و المساعده في الجواز بقي الناس تحب تناسب الناس المرتاحه حتي لو اقل تدينا و خلقا من الناس المتكرحته
اصل البنت مش هتاكل دين و لا هتشرب اخلاق و لا لما هتطلب حاجه هتشتريها بطيبه جوزها
المشكله الاساسيه ظهرت في عدم التكافؤ يا استاذي تخيل كده انك اديت واحد في سباق جري فرصه انه يسبق زمايله ب بدقيقه قبل ما تضرب صفاره بدء السباق اكيد هيتغلب عليهم و هيكسب
اللي يخلي الواحد يستغرب فعلا هو كميه الناس اللي اعرفها اللي عماله تفكر و عيالها لسه في ابتدائي ازاي هيجيب لأبنه شقه علشان يجوزه فيها و هيحوش ليه اد ايه علشان مصاريف الجواز
متخيل حضرتك الفكر بقي عامل ازاي
في الاخر انا شايف ان كله رزق و زي ما كلنا عارفين و مؤمنين لا حيله في الرزق و لا شفاعه في الموت