ايهم افضل سوزوكى التو ولا دايو ماتيز ولا هيوانداى اتوس ولا اوبل كورسا هاتشباك

**البحار مندى** · 21-03-2015 05:47 AM

السلام عليكم ورحمة الله وبركاته
منورين المنتدى اخوانى الاحباب
العبد لله عضو جديد وبتشرف بوجودى معاكم فى اقوى منتدى للسيارات
عايز افادتكم ليا لانى ان شاء الله هشترى عربية استعمال (اهم حاجة يكون فيها تكييف شرط اساسى) فى حدود من 30000 -35000ج ومحتار بين سوزوكى التو والهيونداى اتوس والدايو ماتيز واوبل كورسا هاتشباك ؟
ايهم افضل بالنسبة للمبلغ اللى معايا ومن حيث الكفاءة ومن حيث توافر قطع الغيار خصوصا انى من محافظة قنا يعنى مش كل قطع غيار العربيات متوفرة فى قنا
ارجو الافادة

**ahmed_moeaz** · 21-03-2015 09:58 AM

دور ف رنج الفلوس اللى معاك وحالة العربية نفسها اللى هتحكم ايهما احسن بالنسبة ليك وربنا يوفقك

**Adel90** · 21-03-2015 01:18 PM

نفس الحيرة يا إخواننا .. أول عربية و نفس الرينج .. حد يفيدنا نختار العربية الصح

**bluemail** · 21-03-2015 02:25 PM

عليكم السلام ورحمة الله وبركاته
اولا نورت المنتدي يا عم القناوي, احسن ناس :d
ثانيا بخصوص العربيه انت بتقول محتاج مكيف اساسي
العربيات الصغيره المكيف بياثر جدا على المتور ولازم تطفيه في اوقات كتير علشا العربيه تقول معاك
رينج السعر اللى انت بتتكلم فيه ممكن تجيب هيونداي اكسيل 97 حاله نظيفه
ميزتها انت قطع غيارها منتشره ورخيصه وهتلاقيها بسهوله ان شاء الله في قنا
لو الصيني منتشر عندك كنت قلتلك هات حاجه صيني, اسئل الاول على حد بيبيع قطع غيار صيني عندك وهل في صنايعي شغال فيها اولا
وبالتوفيق ان شاء الله

**Abo_Mazen** · 21-03-2015 03:04 PM

أنا برضه كنت هقول إكسيل ..من ضمن العربيات اللي حاجتها موجوده في اي حته ..أصل هتركب ماتيز ولا التو ولا اتوس ..طيب كل ما تحب تجيب قطعه هتنزل القاهرة ..وخصوصا إن العربيات دي كلها إنجيكشن ..يعني الكلام على حساسات وحوارات ..هي الإكسيل بصراحه حلوة

**البحار مندى** · 21-03-2015 03:25 PM

الف شكر لردودكم جميعا ربنا يكرمكم

**البحار مندى** · 27-03-2015 04:40 PM

ياريت نسمع راى باقى الاعضاء
واستفسار تانى
حاليا كل السوزوكى التو اللى بتنزل بتبقى 800 سى سى وبتكييف
هل الموتور هيستحمل خصوصا انه 800 والتكيف هيعمل بكفاءة ولا هيبقى مالهوش لازمة خصوصا ان شغلى داخل البلد يعنى مش كل يوم سفر

**D . a .\ AYMAN** · 28-03-2015 12:54 AM

الألتو 800 بالتكييف ... تكييفها ممتاز وبيؤثر على السحب بدرجة ملحوظة لكنه مش بيخليها بطة ولا حاجة
قعدت بيها سنة وشوية رايح جاي من القاهرة لأسيوط ومافيش أي مشاكل سواء من التكييف أو سخونية أو أي أعطال