اقتباس المشاركة الأصلية كتبت بواسطة tza مشاهدة المشاركة
بس ازاى حضرتك بتغسل الوحدة الخارجية علشان احنا عندنا واحد كاريير
تفصل الكهربا تماما عن التكييف من لوحة المفاتيح بعدها تفك الغطاء العلوي للوحدة الخارجية هتلاقيها متقسمة جزئينـ جزء فيه المروحة وجزء فيه الكباس

هتجيب خرطوم مياه وتبدا تغسل الجزء الي فيه المروحة بس حاول متجيبش المياه على موتور المروحة نفسه، وتغسل مواسير التبريد الي في الشبك خلف المروحة والسربنتينة هتلاقي التراب والطين بدا ينزل فتستمر في الغسل لحد ما المياه تنزل صافية، تجنب طبعا تغسل الكباس لأنه مش بيحتاج لغسل

بس عموما اهم جزء يتغسل هي المواسير الي خلف المروحة، صفي المياه الي اتجمعت في حوض الوحدة الخارجية على قد ما تقدر واقفل الغطاء تاني وشغل التكييف وهتحس بفرق شاسع في البرودة

الموضوع ده اعمله مرة او مرتين بالكتير على مدار اشهر الحر والصيف ومواسم التراب وغيره، اما بقية السنة فانصح انك تجيب غطاء للوحدة الخارجية عشان تحافظ عليها على مدار السنة لحد ما الصيف يجي وتشيل الغطاء وتستخدم التكييف عادي، موضوع الغسيل ده طبعا مع اي نوع تكييف حتى تكييف الشباك غسيل المواسير الامامية والخارجية بتاعته بينعش المكيف وبيخلي دورة الهواء اسهل وافضل فبيديك اداء اعلى في البرودة