الموضوع: Adk ولا dfa لتعلم الألمانية ؟

المشاركة الأصلية كتبت بواسطة sherif1988

أستاذ أبو آسر

اية اخبار الكورس معا حضرتك
انا حليا غيرت رائى من تعليم الانجليزى ل تعليم الالمانى
اية رئ حضرتك فى المركز وياترا تنصحنى بية ولا لا
و اسلوبة معتمد على اية الشرح والفهم والتجربة ولا حفظ فقط

المركز كويس جدا وطريقة الشرح ممتعة وكويسة
بس اكتشفت إني كواحد ميعرفش أي حاجة عن الألماني كان لازم أمهد لنفسي كويس قبل ما أروح يعني كان مفروض أتابع شوية شروحات من عالنت وعن طريق البرامج والتطبيقات زي Duolingo أو Rosetta Stone قبل ما أبدأ لأن الكتاب مش سهل على مبتدئ ميعرفش أي حاجة عن الألماني
فنصيحة لو حضرتك عايز تروح ادي لنفسك مهلة شهر مثلا وحمل تطبيق Duolingo عالموبايل أو التابلت أو سجل في الويب سايت وابدأ افهم أساسيات اللغة وبعض الكلمات علشان ده هينفعك جدا لما تبدأ في المنهج اللي بيدرسوه
ملحوظة: كلما كان مستواك في الإنجليزي كويس كلما أفادك الموضوع ده في تعلم الألماني لأن الاتنين متقاربين وفيهم حاجات متشابهة كتير فحاول تهتم بالإنجليزي برده ولو من خلال كورسات من الإنترنت لأن الإنجليزي لا غنى عنه وهو مفتاح كل العلوم والوظائف دلوقتي

المشاركة الأصلية كتبت بواسطة sherif1988

الف شكر لحضرتك
بس هما مش المفترض يبدوا معنا من الصفر ولا اية
يعنى انا واحد هروح اتعلم لغة جديدة ومش متداولة كتير يعنى زى الانجليزى
فا اظن المفترض انهم يبداو من الصفر صح ولا اية
ولو عند حضرتك معلومة عن معهد جوتة هل بردك نفس النظام ولا بيبدو من الصفر
؟؟؟؟؟؟؟؟؟؟؟؟؟؟

هما كده يعتبر بيبدأوا من الصفر برده وبيبدأوا بالحروف والأرقام بس أنا من واقع تجربتي حسيت بضغط وتراكم معلومات ولقيت نفسي مشتت وده مكنش شعوري لوحدي ده كان شعور كل اللي في المجموعة معايا تقريبا علشان كده لو مهدت لنفسك زي ما قلتلك هتلاقي الدنيا بقت أسهل زي ما واحد بيحضر الدرس قبل ما بيروح بتلاقيه بيستوعب أكتر من اللي مش محضر
جوتة بيدرس نفس المنهج ونفس الكتاب بس بيطول فيه شوية لأن الليفل الواحد جوتة بيديه في 3 مستويات لكن dfa بيشرحه في مستويين اتنين بس فممكن تلاقي العملية أفضل في جوتة بس جوتة غالي الليفل ب1100 ومكتوب على موقعهم ب1400 مش متأكد مين صح بس في كلا الحالتين أغلى من dfa والطلب عليه أكبر ويا تلحق يا متلحقش