الموضوع: محتاج اعرف امكانيات القشقاي 2015 ا

السلام عليكم
انا من كام يوم كنت في معرض السبع اوتوموتيف بالمعادي و اتفرجت علي القشقاي الجديده واللي معروضه عنده هي اعلي فئه.
السعر الرسمي للثلاث فئات 205 ، 215 ، 235 الف بس للاسف الشديد مفيش حد بيبيع بالسعر الرسمي و سألت علي الحجز
قالولي مفيش حجر ، كلمت التوكيل نفسه قالي مفيش حجز علشان الناس حاجزه لسنه قادمه ولسه ما استلموش .
السبع قالي التسليم فوري بس بأسعار تانيه خالص .... خد عندك الثلاث فئات 225، 238، 258 الف جنيه .
ولا تعليق علي اخر سطر كتبته .....
بالنسبه للسياره عجبتني جدا جدا جدا من جوا .. خامات محترمه جدا جدا .زينون عالي و واطي وليدات اماميه بتنور مع تشغيل الموتور وليدات خلفيه في الهاي لاين فقط.زر استارت انجن من الفئه الثانيه والثالثه.فرامل زي الحجر. تقفيل جميل و محترم جداا جداا .. التابلوه شكله جميل..حساس مطر و مرايات تعتيم في الهاي لاين فقط..زجاج فاميه بدايه من الفئه الثانيه مثبوت علي الرخصه ..
خامات الجلد المستخدم حلوه اوي .. الدركسيون شكله حلو والزراير اللي فيه شيااااكه جدا...
العربيه واسعه اوي عن اللي فاتت .. كرسي السواق كهربا حلو جدا .. الشاشه اللي في نص العدادات حلوه اوي ديجيتال و 3D
الشنطه حلوه و كويسه . اعتراضي علي كام حاجه بسيطه
اولا السقف البانوراما مابيفتحش منظر فقط .. كان نفسي يكون فتحه سقف بتفتح و تقفل
وبعدين انا عندي عقده من السقف البانوراما علشان مصر المحروسه بتنزل حاجات غربيه من السماء بتاعتها غير المطر
تاني حاجه الجنط بتاع الهاي لاين مقاس 19 .. يعني بلالين في الكاوتش للصبح .. مع ان شكل الجنط تحفه والكاوتش عريض اوي علي هذا الجنط.. الخزان بتاعها بيشيل 65 لتر يعني مع موتور صغير زي ده يمشيك في حدود ال800كم..و الوزن فارغه 1331كج يعني ثبات علي السرعات بالاضافه الي اجهزه الثبات الالكترونيه اللي فيها ... نيجي لاخر حاجه مخوفاني من العربيه موضوع الموتور 1200cc . مش مقتنع 100% منه
مع ان في اخ محترم اشتري العربيه دي وبيقول ان التربو مع الموتور ده عامل شغل عالي اوي و تسارع ممتاز مع بنزين 92 والشركه كاتبه الكلام ده في البورشور بتاع العربيه ..
بس ثقافه دماغي مخوفاني و خصوصا ان مفيش تست درايف علي العربيه يعني اشتري ولو معجبنيش الاداء البس في الحيط وش .
عموما برضه في المجمل العربيه داخله دماغي بنسبه 90% واعاده البيع ليها حلوه اوي وعربيه مطلوبه وتقفيل انجليزي .
وان شاء الله علي شهر 8 الجاي احتمال اشتريها لانها عاليه عن الارض زي 4*4 وشكلي هجازف لاني بأذن الله عندي ثقه في الله اولا
واخرا و في شركه نيسان موتورز . ولو هاشتريها هجيب ان شاء الله الهاي لاين مع اعتراضي علي الجنط ال19 بس شكله خرافه والواحد سايبها علي الله وخلاص .. وارجو اني اكون قد افدت حضرتك

نسيت اضيف ان فيها مثبت سرعه و بلوتوث بتحكم من الطاره و تكييف ياباني حلو و فتيس من غير مشاكل بس مجربتهوش الهاي لاين فيها فرامل يد كهرباء بزرار فقط

يا جماعة عن تجربة ممكن اجاوب علي أي سؤال العربية مشية معاية 2000 ك

المشاركة الأصلية كتبت بواسطة Eyadm7mad44

يا جماعة عن تجربة ممكن اجاوب علي أي سؤال العربية مشية معاية 2000 ك

السلام عليكم
اولا الف مبروك علي القشقاي الجديده وربنا يباركلك فيها ويكفيك شرها .
ثانيا عايز اسألك كام سؤال
1 الموتور ال 1200cc كويس مع العربيه ولا العربيه تقيله عليه والتسارع عامل ايه واخر سرعه كام؟

2 العفشه مالتي لينك ولا تورشن بيم؟
3 بنزين 92 ماشي مع التربو ولا 95؟
4 استهلاك البنزين عامل ايه؟
5 التكييف بتاعها عامل ايه؟
6 حضرتك معاك انهي فئه؟ علشان نفسي في الهاي لاين وخايف من الجنط ال19
واسف لو كنت طولت علي حضرتك وفي انتظار الرد .... وشكرا

شكرا اللة يبارك فيك

انا معاية الهاي لاين جنط 17 الجنط 19 التب لاين بيقولو في مشاكل بالنسبة جنط 19.

الموتور ممتاز انا مكنتش متوقع الأداء دة الأداء كمان بيكون واضح جدا مع التحويل الي الاكسترونك .

بنزين 92 ممتازة في الأداء اذا محصلش مشاكل بعدين.

موضوع العفشة انا مش عارف الفرق.

استهلاك البنزين جيد جدا حدود 320 في الصفيحة التكيف جيد مع الملاحظة لم ندخل في الصيف.

ملحوظة أخيرة
أهم شئ تكون مدرك موضوع ال cvt
عموما العربية تحفة و تساوي اكتر من ثمنها و دة شئ مهم
و كمان مريحة بالنسبة لراحة الجسم

انا اسمع أن المالتي لنك أفضل بس مش عارف اية الفرق