سؤال بخصوص اول عربيه اشتريها. . . لوجان غالبا
السلام عليكم
في البدايه بشكر الناس الموجوده في المنتدى على التقارير والاراء اللي محتاج كتير اوي عشان تعرفها لو انت مش هنا :hornytoro:واتمنى اقدر اضيف اي حاجه بس للاسف مش هعرف على الاقل دلوقت لعدم وجود خبره
المهم انا نويت اشتري عربيه ظروفي :
لسا بتعلم سواقه ، العربيه تكون اتوماتيك، هسافر كتير ، هشتري تقسيط ودي هتكون اول عربيه ليا وخبرتي بالسيارات معظمها من المواضيع اللي قريتها هنا فقط
باختصار بالنسبه ليا اللوجان اتوماتيك شكل وسعر كويسين وان كنت هضغط على نفسي كمان في السعر لاني كنت ناوي اجيب اقل من كده
الناس كلها هنا بتشكر في اللوجان لكن بره المنتدى الوضع مختلف كله قالي ابعد عنها ومنهم ناس مهندسين سيارات ..السبب ان التقفيل وحش ، قطع غيار غاليه ،هخسر لو بعتها....على حسب كلامهم
هنا الناس بعد ماجربت الشكل الجديد بيقولو في مشاكل ثبات (انا مش ناوي اجري بيها لاني لسا بتعلم بس معرفش بعد ما اتعلم كويس هعمل ايه )
في ناس قالتلي هات افيو ، وناس قالتلي هات جين 2 وناس قالتلي هات صني الشكل القديم (لو اغلى من 110 مش هجيبهم )
وبرضه من التدوير في المنتدى شوفت السوفت ديزاير الناس مبسوطه منها
السؤال بقى عشان طولت عليكم ، اجيب عربيه ايه؟ تكون اتوماتيك وسعرها ميعديش 100 او 110 الف بالكتير
واالوجان فعلا تقفيلها وحش والثبات هيعملي مشكله ولا عادي ؟ والسانديرو فيها نفس مشاكل اللوجان ولا لا
شكرا مقدما
