طارة الدركسيون بتحدف يمين

**m_aash** · 26-07-2007 02:54 PM

معايا لانوس 2007 منذ فترة لاحظت إنى لما بسيب طارة الدركسيون , بتبتدى تلف سنة بسيطة ناحية اليمين , ومعدل الحدفة بيزيد كل ما كانت السرعة أكبر بمعنى فى السرعة الأولى أو التانية مش ملحوظة بس لو الرابع أو الخامس بتبقى الحدفة ملحوظة جدا والعبية بترمى يمين.المهم أنا ظبطت زوايا و ترصيص للأربع عجلات والمشكلة زى ماهى, لو ممكن حد يعرف السبب ممكن يكون إيه؟ قبل ما أروح للتوكيل و يدخلنى فى موضوع ظبط زوايا و ترصيص و نضيع وقت على الفاضى
و شكرا للمهتمين[/b][/b]

**معاذ الشرباصى** · 26-07-2007 02:56 PM

متفكر تروح لدرش

100% دى زوايا, و اللى عملها لك معرفش يظبطها

او ممكن يكزن الكاوتش زى ما كان مع محمود حفناوى

**m_aash** · 26-07-2007 03:14 PM

أنا رحت عند هنتر اللى فى كوبرى القبة و ده ناس كتير بتشكر فيه , هو فعلا لقى العجل المامى محتاج ظبط , ظبطههم و بعدين عملت ترصيص للأربع عجلات و بعدين غيرتهم مقص (يمين أمامى مكان شمال خلفى و ....) بس مفيش فرق حصل نفس الحدفة.
هل المشكلة ممكن تكون من علبة الدركسيون أو العفشة؟

**Migo123** · 26-07-2007 04:30 PM

دي مشكله زوايا ... راجع مع فني الزوايا تاني ... واطلب منه انه يظبط الطاره بعد ما يخلص عشان كتير منهم بيكبر دماغه وبيسييب الطاره على وضعها وما يظبطهاش بعد ما يخلص شغل .
أهم حاجه تجرب في طريق مظبوط (مش مايل) ويكون ضغط الهوا مظبوط في الاربع فرد زي بعض ..

**hazem_khidr** · 26-07-2007 05:29 PM

اول حاجه ضبط ضغط الهوا ولو لسه بتحدف يبقي كده الزوايا عندك عاوزه تنضبط..
ممكن تكون و انت بتركن مثلا حكيت في رصيف او ما شابه ذلك و الحركه دي بتلخبط الزوايا

**درش** · 26-07-2007 08:32 PM

استاذى العزيز
راجع على الزويا وشكرا
دى موديل السنه
وبسيطه انشاء الله

**Nader** · 26-07-2007 08:35 PM

اول حاجه ضبط ضغط الهوا ولو لسه بتحدف يبقي كده الزوايا عندك عاوزه تنضبط..

زي ما حازم قال وخد بالك إذا كان فية نتوئات في اجناب الكاوتش ولا لأ، لو مفيش يبقي اغلب الظن الزوايا عاوزة تتظبط.

**m_aash** · 29-07-2007 08:04 AM

أنا الأول رحت ظبطت زوايا و الفنى ظبط طارة الدركسيون و جربت العربية لقيتها برده بتحدف ( الحدفة بتبان لما أسيب الطارة و انا ماشى أما لو أنا ما سك الطارة العربية بتمشى مظبوط), قمت بدلت العجل ( الأربع عجلات بدلتهم مقص) و رصصت و ظبطت الهواء على 30 , والمشكلة زى ما هى .
أنا فى مرة كلت مطب و أنا ماشى على الغيار التانى و نزلت بصيت على العربية بس ما كانش فيه حاجه ظاهرة ...... هل ممكن يكون حاجه حصلت فى المساعدين أو العفشة؟