اتعرفنا على ناس حلوة ومحترمة كتير صعب تلاقيهم مجتمعين في مكان تاني أيوة في الوحش زي أي مكان بس الحلو يغلب على عكس الأماكن التانية
استفدنا معلومات وخبرات في حاجات كتير جدا جدا جدا غير العربيات كمان
وفرنا فلوس كتير بسبب نصيحة أو مساعدة أو كرم أخلاق وأبرزها إني كنت عايز أشتري موبايل حديث وغالي وكتبت تعليق من ضمن التعليقات على موضوع بيتكلم عن الموبايل ده إن سعره في مصر غالي ومستني لما يرخص علشان هموت وأجيبه ، يقوم يكلمني أخ فاضل وحبيب مكنتش أعرفه شخصيا قبل كده لكن كان يعرفني من مشاركاتي في المنتدى ويعرض عليا يجيبهولي من دولة عربية بيسافرلها علطول بسعر أرخص من هنا لله بدون أي مقابل :) والحمد لله وفى بوعده وجاب الموبايل معاه ومرضيش حتى ياخد الفلوس مقدما وقابلته اديتله الفلوس اللي كانت أرخص من تمن الموبايل هنا بأكتر من ألف جنيه ! وبعد كده يشاء ربنا الموبايل ياخد عين مؤذية ويبوظ ولازم أرجعه للبلد اللي جه منها فيقوم الأخ ده ياخده تاني ويحاول يرجعه بس للأسف معرفش فيقوم أخ تاني فاضل ومحترم معرفوش برده شخصيا يعرض عليا إنه يرجعهولي ويستبدله في الضمان من التوكيل نفسه وفعلا حصل ورجعه والموبايل معايا دلوقتي سليم وزي الفل الحمد لله بفضل ربنا وبفضل إخوة أفاضل بيخدموا الناس لله في لله ، ولولا إني خايف الناس دي تزعل لو قلت أسماءها كنت ذكرتها وعملتلهم لوحة شرف كمان بس يكفيهم دعوة بظهر الغيب إن ربنا يجعل ما فعلوه ويفعلوه في ميزان حسناتهم ويجزيهم كل خير
نايل موتورز مش أي منتدى .. نايل موتورز بيتنا التاني وأسلوب حياة
وبالرغم من إني لسة راجع من وقف أسبوع ^ـ^ إلا أني بحبه ومش هزعل طالما القوانين بتتطبق على الكل بدون أي محاباة
وطبعا منساش أهم حاجة حببتني في المنتدى ده لما اتوقفت لأول مرة من فترة طويلة وقررت عدم المشاركة تاني ولقيت كريم بك البيج بوس بذات نفسه بيتصل بيا علشان يشوفني زعلان ليه ويراضيني ولا كان يعرفني ولا عمره شافني قبل كده :) ولا تفرق معاه أصلا واحد ميشاركش أو يشارك لكن بصراحة كانت لفتة جميلة جدا منه حسستني أد إيه الناس دي محترمة وبتخاف على اخواتها وتسأل عليهم وتهتم بيهم
أخيرا ليا عتاب صغير للمشرفين: بالراحة شوية علينا ايديكو تقيلة :) مش لازم وقف جماعي بالأسبوع ، ممكن وقف يومين مثلا ممكن تقفلوا الموضوع بس بدون وقف أو تحذفوا المشاركات لكن أسبوع كتير بصراحة الواحد بيحش باستوحاش فبلاش العقوبة الشديدة دي خلوها لما تكون حاجة جامدة أوي تستدعي كده فعلا لكن مش عشان واحد سخن شوية واتكلم في السياسة يبقى ياخد وقف أسبوع
إلى الأمام نايل موتورز .. ثورة ثورة :) :) :)
المفضلات