طلب نصيحة: شغال في السعودية وعايز عربية انزلها
انا شغال في السعودية وعايز اجيب عربية انزلها مصر بعد سنة او اتنين
طبعا بدور على عربية تكون عملية وقطع غيارها متوفرة في مصر والسعودية لاني هستعملها في السعودية فترة بعد كده هنزلها مصر
انا بفضل العربيات الصغيرة زي الاكسنت واليارس والريو ودول اللي بفاضل بينهم
انا ميال للريو المكنة ال1400 لكن للاسف قطع الغيار والصيانة للكيا بوجه عام سيئة في السعودية كمان اسمع ان شكلها هيتغير قريب
الاكسنت بتنزل مكنتين في السعودية 1400 و 1600 انا شايفها عربية حلوة لكن برضه اسمع ان شكلها خلاص هيتغير واعتقد ان مصر المكنة 1600 اوتو بس اللي بتنزل
اليارس حلوة ضعيفة شوية لكن عملية ومنتشرة وشكلها مقبول بس ايه ظروف الصيانة في مصر انا معرفش حد يفيدني, وايه المكنة اللي موجودة في مصر هنا موجودة السيدان مكنة 1300 و 1500 والهاتش باك مش موجودة اصلا في التوكيل نادر لما بتيجي والهاتش باك مكنة 1300 بس
في كمان الكورولا والالنترا هما اختيار افضل بس انا مش ميال ليهم بسبب حجم العربية والزحمة والركنة وخاصة ان انا بتنرفز كمان بسرعه وبتقلب معايا النرفزة بغرز علطول وبعدين ممكن نتعور ومش عاوز حاجة تقيله في التصليح
وفي السيراتو والفلونس والبيجو 301 واللانسر الشكل القديم بس الكيا والريو والبيجو والميتسوبيشي خدماتهم وصيانتهم تعبانة جدا في السعودية
ممكن الصني برضه لكن الناس خوفتني منها وبالنسبة للصيانة هنا متوسطة مش حلوة ومش وحشه
الشارك المكنة 1600 مش موجودة موجود في السعودية مكنة 2000 بس عشان كده مستبعدة
رايكم تنصحوني بايه؟