الموضوع: استشارة بخصوص الحياه في الكويت

400 دينار تجيب شقة كويسة وغرفتين وصالة.
العربيات الجديدة هنا ارخص من مصر بكتييييير يعني دودج شارجر ب حوالي 9,000 دينار جديدة والتقسيط طالما هيشتغل ف بنك هيبقي سهل جداااااااا
الحياة هنا ابسط من مصر خصوصا ان حاجات كتير ممكن تتعمل اونلاين دا غير ان البلد صغيرة ف هتلاقي السكن جمب المول يدوب كلها ربعاية ..
اسعار المدارس معنديش فكرة عنها..
التأمين الصحي الحكومي دا اجباري عشان تعملي الاقامة ولازم منه عشان تقدري تروحي مستوصف حكومي هنا لان المستشفيات الخاصة غالية بغباء وياريت بفايدة!
التامين الصحي الخاص ممتاز نسبيا ولكن بيعتمد علي شركة التامين
نصيحة, الغربة ليها تمن ولازم يبقالكو هدف منها ,,يعني لو عايشين ف مصر مستريحين وقادرين تحوشوا اي مبلغ للزمن خليكو ف مصر لان "ايه اللي بعد السفر؟!!" لازم هترجعوا تاني..هل هيرجع ع نفس الشغل و اسئلة كتير لازم تحسبوها صح
هتيجوا هنا عشان تتفسحوا وتغيروا وكدا يبقي مش هتحوشوا حاجه واصلا البلد صغيره يعني كلها شهرين هتبقي حفظتيها دي اطول مشوار فيها مبياخدش ساعة ونص لو الطريق ماشي :@ :@
اتمني اكون افدتك :)

انا ليا خمس اصحاب مقربين جدا عايشين هناك من سنين بصراحة عيشة محترمة وادمية ورفاهية عالية
ماتقلقيش المصريين كتير في الكويت غير انهم بيحبوا المصرين وليهم معاملة خاصة هناك
اتكلي علي اللة وروحي طالما الاسرة كلها مع بعض
انا مابعتبرهاش غربة انا حاليا بشتغل في دولة ما ومش عارف اخد اولادي معايا لدواعي امنية وحاجات تانية
ولو اعرف الاقي شغل مناسب في الخليج يتناسب مع خبرتي وطبيعة عملي مش هاتردد نهائي خصوصا بعد الثورات والانحراف الاخلاقي والفوضي اللي بقينا فيها دية
استخيري ربنا الاول اهم حاجة

المشاركة الأصلية كتبت بواسطة hh

اولا شكرا لردك. بالنسبة لينا احنا الحمد لله دخلنا في مصر كويس و مستريحين. بس الحياه في مصر بقت متعبة و كلها قرف و عدم استقرار في الشغل و في كل حاجة و احنا نفسنا نمشي. الغربة طبعا ليها تمن إنما احنا مش عايزين التمن يبقى على حساب راحتنا و راحة ولادنا خصوصا اننا الحمدلله مستوانا في مصر حلو زي ما قلت. احنا هدفنا مستوى حياه أعلى و في نفس الوقت لازم طبعا نبقى بنشيل مبلغ كويس متبقاش غربة عالفاضي.

انت مقلتليش تكاليف الحياه في الكويت عاملة ازاي. و بالنسبة لأن البلد بتقول صغيرة قوي، دي ميزة و لا انت تقصد انها ممكن تكون مملة و تزهق بسرعة؟ البلد جميلة و فيها أماكن ترفيه و لا مقفلة؟ و التعامل مع المصريين عامل ازاي؟ و بالنسبة للمرتب انت شايف واحد بالمؤهلات اللي قلتها ياخد كام؟ هو معروض عليه رقم طبعا بس عايزة اعرف بالنسبة للبلد يعتبر كويس و لا لأ.

معلش بقى حاتقل عليك بالأسئلة بما انك الوحيد اللي رديت :-)

تحت امرك يا فندم,, الوضع مختلف طبعا بالنسبة للاشخاص يعني هنا ناس راتبهم 200 د.ك وبيعيشوا ومستورة وناس راتبهم 2,500 ويدوب وكل دا نسبي من شخص لاخر.
-من ناحية الراحة ف الحياة هنا مريحة جدا وكل حاجة هتلاقيها قريبة منك.
-الاكل عموما اسعارة كويسة ومش غالي.
-البنزين حدث ولا حرج سعر بنزين 95 حوالي 1.75 بالجنية.
-مشكلة البلد هنا صراحة انهم بالليل بقرار والصبح بقرار مختلف ودايما بيهوشوا الوافدين بالابعاد الاداري اللي هو تسفير قهري بسبب كسر اشارة مثلا او اي خطأ جسيم -في امثلة عن شرطيين يتبلو ع اشخاص ويعملولهم قضايا ويسفروهم بس دا قلييييل بصراحة- و نظرا لان تعداد الوافدين هنا اكتر من اهل البلد ف أهل البلد ليهم معاملة خاصة ف اي مكان بتروحية من اول المطار لحد مخفر الشرطة.
-تعداد المصريين هنا حوالي 500,000 ولذلك مش هتحسي بغربة اوي لان هتلاقي جيرانك كتير مصريين وشاميين ومن كل الجنسيات ودي الميزة عشان تشوفوا ناس مختلفة وثقافات مختلفة
-البلد صغيرة فعلا بس فيها مناطق ترفيهيه مش اللي هي واو يعني بس شغالة والبحر قريب جدا هتلاقيكم كل يوم اجازة بتقضوه ع البحر وبتشوا فراخ :@
-الراتب صراحة مش متاكد بس معتقدش يقل عن 1,500-2,000 والله أعلم برده دي علي حسب

اي استفسار تاني انا حاضر

اعتذر عن تدخلي بس عايز اسئل السفر بيتم ازاى للكويت انا قدمت لشركات سفريات كتير ومفيش فايدة
انا معايا ماستر فالقانون وشغال محامى باحدى المصالح الحكومية وخبرة 4 سنوات
اعمل ايه عشان اسافر للكويت او الامارات بحيث اجيب عقد عمل عشان احتفظ بوظيفتى

المشاركة الأصلية كتبت بواسطة moody_687

اعتذر عن تدخلي بس عايز اسئل السفر بيتم ازاى للكويت انا قدمت لشركات سفريات كتير ومفيش فايدة
انا معايا ماستر فالقانون وشغال محامى باحدى المصالح الحكومية وخبرة 4 سنوات
اعمل ايه عشان اسافر للكويت او الامارات بحيث اجيب عقد عمل عشان احتفظ بوظيفتى

جرب تبعت السي في بتاعك لشركات ف الكويت او االامارات او اي دولة تحت وجايز ربنا يكرم..بس ظبط السي في بتاعك وخلية بالانجليزي كمان وربنا يوفقك