الموضوع: العودة الى مودرن موتورز ، وانطباعات غير جيدة

بعد ان تركت مودرن موتورز منذ فترة-(كنت بعمل عندهم صيانة النيسان ولكنى تركتهم الى السبع التلات صيانات الأخيرة) لم اجد امامى مناصا من العودة اليهم بعد شراء الماروتى

1-انا حجزت الصيانة من 3 اسابيع ورغم ذلك مقدرتش آخد ميعاد الصبح بدرى، فتاه الحجز ادتنى معاد الساعة 11، يعنى اليوم باظ

2-رحت مركز الصيانة 10.45 ، واقف على الديسك نص ساعة لحد 11 وربع على ما احد الباشوات ظهر علشان يكلمنى ،

3- الباشا متجهم جدا وكأنى جاى اشحت منه وبيتعامل باسلوب مش عارف ايه لزومه، ياريت واحد من الباشوات دول يروح يعمل صيانه عربيته النيسان فى مركز السبع ويشوف ابتسامة مهندس الاستقبال اللى من الودن للودن

4- قاللى هنغير زيت وفلتر، ليه يا عم دى صيانة 1000، قاللى هو كدة، صيانة ال 1000 زيت وفلتر ، هتحط زيت موبيل وان وللا زيت 5000 آلاف كيلو، قلت له موبيل وان، قاللى 3 كيلو ب 185 جنيه و فلتر ب 60 جنيه(60 جنيه فلتر زيت الماروتى تخيلوا، انا بجيب فلتر الصنى من السبع ب 45 جنيه)،

6- لقيت عربية شانا واقفة تعمل صيانة هناك بسأله هى العربيات دى تبعكم، قال كلمة واحدة: "آه" ، طب يا عم دى فرصة تبيعلى كلمتين عن المنتج بتاعكم، ولا الهوا

7- العربية دخلت الورشة 11:45 ، وخرجت الساعة 12، يعنى غابت جوة ربع ساعة بالظبط، فضلت مرمية من 12 لحد 1 ، ساعة كامةل بره ، على ما البهوات تذكروا ان فيه فاتورة وان فيه زبون ممكن يدفع ويمشى ويفضى لهم مكان

8- المكان زحمة جدا ومافيش كراسى والناس بتتخانق على الكراسى واللى يتنحنح من على كرسيه يلاقى واحد اتزحلق وحشر نفسه بينه وبين الكرسى زى اللى بيحصل فى الفود كورنر فى كارفور فى وقت الغداء فى اول جمعة فى الشهر

9- محاسبينى على مصنعية تغيير زيت وفلتر حاجة وتلاتين جنيه (لأن المفروض ان صيانة الألف مجانية، مافيهاش فلوس مصنعيات، فدى فلوس تغيير الزيت والفلتر غير الضريبة)

من الآخر ، الوجه الكويس من مودرن موتورز اللى شفته فى المعرض، شفت غيره خالص فى مركز الصيانة ، وبحمد ربنا انى اشتريت عربية سهل تتصلح ويتجاب لها قطع غيار من برة التوكيل علشان متحوجلهمش