المشاركة الأصلية كتبت بواسطة hanyyacot
بص يا فندم انا هاكلمك عن تجربتى, اولا انا كان معايا فلوانس فيس ليفت 2014 جبتها زيرو و قعدت معايا سنة وبعتها لظروف خاصة , وقبل ما اجيبها كان معايا لانسر بومة وبعتها وكنت ناوى على الشارك , طبعا الشارك حلوة ومحترمة لكن حقيقى لا تقارن مع الفلوانس , من حيث اعتمادية الفلوانس العربية هاتسد معاك فى اى حاجة وكنت باعمل فيها اللى باعمله فى اللانسر وماكنتش بتشتكى ولا اى حاجة , كمان العربية صاجها اتقل و امتن من الشارك , الشارك تحس انك راكب عربية بتصميم و امكانيات 10 سنين فاتوا . عموما الفلوانس هاقولك مالها وما عليها , هابدأ بالعيوب : 1- تكيفها مش مرضى ( انا باحب احس بالسقعة) بالنسبالى اديله 6 / 10 . قطمة الدريكسيون حصلت معايا وهى عبارة عن انك بتسمع صوت تكة وانت بتلف الدريكسيون للاخر ناحية الشمال , حاجة مش مؤثرة ولا ليها اى لازمة بس سمعت انها بتتغير و روحت للتوكيل وقلتلهم وبعتوا جابوها واتغيرت طبعا من غير اى فلوس لانى فى الضمان ومن غير اى احتجاج او خناق , يعنى توكيل محترم فعلا والموضوع اصلا مالوش لازمة بس هى هواجس . كده العيوب خلصت , المميزات بقى , عربية فيها عناصر امان ممتازة غير الاير باجز و ال abs هتلاقى الابواب فيها قوايم للحماية من الخبطات و الموتور معزول من تحت . العربية ثباتها اكتر من ممتاز على السرعات , العربية واسعة اوى و شنطتها كبيرة . سحبها ممتاز بس بعد اول 3000 كم , موفرة فى البنزين جدا , العربية فراملها تحفة اوى اوى وتديلك احساس عالى بالثقة , فتيس ستيبترونيك 6 سرعات فيه مانيوال كمان لو حبيت تشد . اوبشنز محترمة ومن اول فئة اللى بيقولوا انها فاضية اللى فيها مثبت و محدد سرعة , طارة مالتى و بلوتوث وكاسيت محترم فيه usb , كمبيوتر معلومات عن العربية بيديلك كل المعلومات اللى انت عايزها , وحدات رفع الزجاج كهربا لل 4 ابواب , ستارة خلفية , غلق الانوار اوتوماتيك مع غلق السيارة , ايبموليزر ( مانع سرقة ) .
معلش طولت عليك بس حبيت اقولك كل حاجة فيها عشان الصورة تبقى واضحة ليك , وفى الاخر اللى يناسبنى ممكن مايناسبكش , والعكس صحيح . وربنا يوفقك للى فيه الخير ليك
