العربية بحسها فايقة ببنزين كالتكس الكيلو 21 و مش مرة واحدة حسيت بكدة
عرض للطباعة
شوف الموضوع بيكون لعب فى العيار بتاع العداد يعنى بيلعبو فيه يطلع 8 ليتر ويكتب 10 طبعا فى مباحث وناس بتراجع العيار وفى رشاوى كل ممكن فى مصر
اول مره عرفنا الموضوع ده فى بنزينه كان التنك فاضى والتانك 45 ليتر وفولنا لاقينا الراجل بيقول 50 ازاى والتانك 45 وفهمنا اللعبه
كلام حضرتك صح 100% , ده خبر لسه نازل فى اليوم السابع من 5 دقائق و يبدو انه زى ما بنقول من محاسن الصدف الخبر " سوهاج- عمرو خلف
قال شمس الدين محمد يوسف، وكيل وزارة التموين بسوهاج، إن المديرية شنت حملة على محطات البنزين بمركز جهينة، وتمكنت من ضبط صاحب محطة بنزين لتلاعبه فى عدادات المحطة وبيعه صفائح البنزين ناقصة الكيل للمواطنين، وتم التحفظ على الطلمبة وتحرر محضر بالواقعة رقم 20405 جنح مركز جهينة. وده يأكد كلام حضرتك و يفسر ما عجزنا عن تفسيره و الامور بتضح شوية بشوية .
بس لسه برضه ما عرفناش السبب ؟؟
ممكن لعب فى العداد .. ممكن خلط بنزين 80 او 90 على ال 92 .. ممكن ميه فى قاع خزان المحطه .. ممكن خلط سولار مع مذيبات ( ما اعرفشى هل ده ممكن ؟ ) .. و ممكن اسباب ثانيه ؟؟؟؟؟؟
عايزين نفهم بيعملوا ايه بالظبط
اقرأ الموضوع ده ( موضوع روعه )
http://www.nilemotors.net/Nile/425614-a.html (مذكرات مدير محطة بنزين)
.. بلاش تعبى للزور .. كفايه لغايه ما الطلمبه تفصل علشان تسيب نفس فى التانك
أنا قريت قبل كده المشاركه اللي حضرتك حاطط اللينك بتاعها ..اللي هي مذكرات مدير محطة بنزين ....وخدت بالي من حاجه ..إن ممكن يكون نسبة الرطوبه في البنزين عاليه ..أو نقدر نقول نسبة البخار في البنزين كبيره ..وده اللي بيخلي البنزين بلغة عاميه كده ..زي ما تقول نافش ..أو هايش على الفاضي ..مش عارف حاسس إني بقول كلام ممكن مايكونش علمي ..بس هو ده اللي بيحصل ..إن فعلا البنزين بيكون نافش على الفاضي ..زي الأيس كريم كده ..بييقى فيه غازات هي اللي بتديله الشكل و الرسمه بتاعته اللي بنشوفها قدامنا ..عشان كده لو جيت بططت الآيس كريم ده بمعلقه ..مش هتعرف تخليه ياخد الشكل العالي المرسوم بتاعه تاني ..متهيألي في حاجه مختلطه بالبنزين كثافتها أقل من البنزين نفسه ..بتتبخر أسرع من البنزين نفسه ..بس إيه هي ..؟؟؟؟...ممكن يكون بخار مياه مثلا؟؟؟
انا كنت ملاحظ ان البنزين اليومين دول نسبه الاوكتين قليله وبتعمل كركه فى عربيتى واعتقد فيه نسبه ميه كبيرة وده بيلخبط الاشعال وللاسف ده بقى فى معضم البنزينات فاعتقد ان جوده البنزين ومعايية اتغيرت من المورد نفسه والله اعلم ؟؟؟؟
لأ ياباشا ..هي مش قصة مورد بس ..القصة داخل فيها الموزع كمان ..والدليل على كده إن في بنزينات كويسه أو على الأقل إحنا حاسينها كويسه ..يبقى هي قصة موزع أكبر منها مورد ..المورد إحنا عارفين إنه حرامي وإن نسبة الأوكتان اللي بيبيع على أساسها مش حقيقية ..وكفاية موضوع شركة مرسيدس والتحاليل اللي إتعملت .لكن اللي بيعمل مشاكل معانا ويخليها تظهر كده الموزع
نشكر اولا زملينا المحترم اللة آثار قضية البنزين , حقيقى الواحد كان حاسس بيها بس بيخدها بشكل سطحى و بدون تفسير الأن الامور اتضحت و لا مجال للالتباس هناك قضية دخلت المحاكم و تم التحفظ على طرمبة بنزين تم التلاعب بعدادها لزيادة اللترات على الفاضى ( موضوع حسم الان ) , و الشق التانى التلاعب بنسبة الاوكتين و خلط البنزين ( حاجة زى غش اللبن) ....طب و الحل :
أولا: حاول بقدر الامكان تحط بنزين من محطة انت ترتاح لها ( زى الزميل العزيز اللى لاحظ ان العربية بتتحسن كفائتها من بنزين محطة معينة ).
ثانيا : لازم يبقى لنا موقف من المحطات الغير امينة زى محطة سوهاج اللى اتحكم فيها بقضية غش و ده هيكون رادع لمن يحاول الغش .
يتبقى موضوع أخير ....اللى أثير فى هذا الموضوع يثير الشكوك فى امكانية استمرار نجاح محركات التربو ( ذات الانضغاط العالى) المحتاجة لبنزين 95 او عبارة 95 ويمكن استخدام 92 لأن من الواضح ممكن ال92 اللى بنستخدمه يكون ميوصلش 90 و كارثة محركات المرسيدس الاخيرة خير بيان عملى ....و الظاهر ان الموضوع ده هيكون له تداعيات فى المستقبل على انواع المحركات فى مصر .
هنا فيه بند بيتكلم على البخر و اضافه خزان للبخر فى تانكات محطه البنزين .. ( ما عنديش فكره دقيقه عن نظام عمله ) .. لكن اعتقد حتكون نفس فكره عمله فى دوره خزان الوقود فى السياره
- و لاحظ فى دوره البنزين فى السيارات الحديثه .. فيه خزان بخار بنزين و هو ده اللى الموتور بيسحب منه البنزين ( موش من التانك نفسه )
- لاحظ عندما يقوم العامل بالضغط الضعيف جدا ( اثناء التعبئه للزور ) العداد حيقرأ فلوس و ليترات و لكن الحقيقه ان البنزين لا يضخ فى السياره لضعف الضغط
- و كمان فى بعض الطلمبات لما بيصفر العداد .. و يبدأ يعبى العداد بينط و بيقرأ جزء من لتر ( فى اول تحركه ) و بعدين يتحرك طبيعى
- و تحاليل شركه مرسيدس لو كانت صادقه بتبين ان فيه اضافه 10% ماء على بنزين 95
اقتباس:
نصائح لتجنب غش البنزين لا تشتر من محطات لا تشهد زحامًا.. وافحص سيارتك بشكل دورى لاكتشاف الغش مبكرًاوضع المهندس مدحت يوسف، الخبير البترولى ونائب رئيس الهيئة العامة للبترول سابقا، روشتة لأصحاب السيارات والجهات المسئولة لتجنب غش البنزين، متمثلة فى عشر نصائح جاءت على النحو التالى:
• عدم شراء بنزين 95 من المحطات التى فيها ركود وانخفاض فى المبيعات، حيث يؤدى طول التخزين إلى تدهور خواصه المرتبطة بكفاءة المحرك عند بداية التشغيل، وتمثل عيبا مؤثرا على كفاءة السيارات الحديثة نظرا لنوعية السبائك الحديثة المستخدمة حاليا.
• أن يعتمد أصحاب السيارات على بنزين 92 مع تحسين رقم الأوكتين حتى يصل إلى درجة بنزين 95، حيث يؤدى السحب الدورى لبنزين 92 إلى احتفاظه بخواصه الجيدة.
• أن يعرض صاحب السيارة سيارته للفحص الفورى إذا لاحظ بطئا وعدم مرونة فى تشغيل المحرك عقب تعبئة السيارة بالبنزين.
• أن تفعل الأجهزة الرقابية دورها بشكل أكبر فى مسألة غش البنزين وعدم السماح لبنزين 95 بالمكوث أكثر من خمسة أيام داخل التنكات تحت الأرض.
• أن تستخدم محطات البنزين وحدات استرجاع الأبخرة لضمان حفاظ بنزين 95 على نفس رقم الأوكتين.
• على الحكومة خفض سعر بنزين 95، لأن نتيجة التباين السعرى الكبير بين البنزين ٩٥ وبين البنزين ٨٠ بفرق سعر يبلغ 4 جنيهات و65 قرشا، يجعل بعض أصحاب المحطات يخلط البنزين ٨٠ على تنكات البنزين ٩٥ لتعويض عجز البخر بعد فلترة البنزين ٨٠ لإزالة الصبغة الحمراء المستخدمة فى تلوين البنزين ٨٠.
• ضرورة أخذ عينات دورية من محطات التموين واجراء التحاليل المعيارية عليها بمصلحة الكيمياء التابعة لوزارة الصناعة والتجارة.
• ملاحظة طريقة ضغط الهواء عند تعبئة عامل المحطة بمسدس البنزين تنك السيارة، حيث يؤدى أحيانا التدافع السريع للهواء وكثرة الضغط إلى فصل بين المادة البترولية وبعضها ويعد هذا نوعا من السرقة فى عدد ليترات البنزين.
• التأكد من مطابقة عداد السيارة مع عداد محطة البنزين لتلاشى التلاعب فى العدادات وسرعة إبلاغ الجهات الرقابية عن المحطات المخالفة.
• التأكد من أن زيت السيارة المراد شراؤه مغلق جيدا، حيث إن بعض الزيوت يعاد استخدامها وتعبأ فى عبوات جديدة.
كلام حضرتك علمي 100%..حضرتك جاوبت على تساؤلاتي ..واضح إن المحطات اللي فيها المشكلة اللي أنا بتكلم عليها ..فيها مشكلة في تانكات البخر ..وممكن تكون تانكات البخر دي غير مستعملة أصلا أو ملغية ..عشان كده بيبقى التانك اللي متخزن في البنزين واللي العامل بيعبي منه البنزين في عربية حضرتك كله بخار بنزين مش بنزين ..وطبعا البخار دي لما بيتجمع وينزل من الطرمبه بيعد معاك في العداد بتاع الطرمبة ..ويسمع معاك في مؤشرة البنزين بتاع السيارة ..لكنه في الحقيقة لا هو بنزين ..ولا له كثافة البنزين ..ده كل ما هنالك بنزين متكثف ..إممممم...كده حضرتك حطيت إيدك على المشكلة فعلا ..يبقى انا بحط من المحطه دي بخار بنزين مش بنزين ..أو على الأقل نسبة كبيره من اللي مكتوب على العداد بخار مش بنزين حقيقي :plusone2::plusone2::plusone2::plusone2::plusone2: :plusone2::plusone2::plusone2:...