الموضوع: تجارب شخصية

هذه دعوة الى الاخوة الاعضاء لافادة الجميع من تجاربهم الشخصية اليومية الحياتية فى شتى فروع الحياة وبالطبع سأبدء بنفسى واروى لكم موقف حصل معى بالامس القريب...

الكومبيوتر جاتله سكتة !!!!!
كنت بعمله عملية تنظيف وتطهير وجيت اشغله لقيته حالف يمين ما يشتغل ابدا, بما انى خبير فى الكلام دة ففكيته قطعة قطعة وعملت كل الى جه فى بالى حتى اصبح عندى شبه يقين ان ال " power supply " باظ:(

ففكرت انزل اشترى واحد وقلت فى بالى , لاء انا اخد الجهاز عنده وهو يركبه علشان لو طلع بايظ يبقى يتغير فى ساعتها ومرجعش المشوار دة تانى وبالفعل هذا ما حدث...

المهم فنى الصيانة غير الباور وجربلى الجهاز وتمام واخدته ومشيت ورجعت البيت اجرب انزل ويندوز لقيت ان الدى فى دى رايتر مش واصله كهرباء, حطيت ايدى على قلبى وببص لقيت الباشا موصل الكابل غلط يعنى بالمقلوب!!!!! :@
وطبعا بما انى عملت الموضوع دة قبل كدة وعارف انه كارثة لبست ونزلتله تانى وعفاريت الدنيا بتتنطط قدام عينى لان ال دى فى دى بقاله 6 شهور بالظبط وكدة طبعا اكيد فى حاجة اتحرقت جواه, المهم رحت وانا بستعد للخناقة الحامية وقابلت الفنى الى ركبلى القطعة ( كان ملتحى ) وطبعا قلتله انت ركبت كابل الباور غلط وحرقت الدى فى دى, وطبعا اخد الجهاز وفتحة وجرب الدى فى دى وسألنى هوا بقاله قد ايه, قلتله 6 شهور , رد على قائلا انا متأسف جدا ومستعد لاى ترضية حضرتك تطلبها....
طبعا انا ذهلت لانى كنت متوقع خناقة وزعيق وعلو صوت وكدة ولكن الراجل افحمنى باسلوبه الهادى المتزن وقلتله طالما بوظته صلحه, فقالى للاسف مليش خبرة فيه ولكن تقدر حضرتك تبعته الضمان بتاعه وانا متكفل بقيمة التصليح وكدة, قلتله طيب انا عايز انزل ويندوز ومعنديش سى دى تانى, قالى هجيبب لحضرتك السى دى رايتر بتاعى تشتغل عليه لحد ما بتاعك يتصلح ...
طبعا قمة الاحترام فى التعامل لدرجة انى اصبحت مستعد ادفع حق الدى فى دى من جيبى وانا مبسوط وراضى ويا ريت كلنا نتعلم الدرس ان الهدوء والصدق منجيين.

ملحوظة : وانت بتركب كابل الباور خلى السلك الاصفر دايما ناحية برة يعنى ناحية الطرف ميبقاش ناحية كابل الداتا والا هيحرق القطعة خاصة لو كانت هارد دسك.