الموضوع: لماذا ننصح بعض بالسياز على حساب نيسان صنى وعربيات اخرى؟

المشاركة الأصلية كتبت بواسطة amrseif

هل معقول ان اى حد هيشترى عربية لازم يقعد سنة يستنى تجارب الناس ويشوف المميزات والعيوب وتوفر قطع الغيار وجودة التوكيل ... الخ
لو كل الناس فكرت بالشكل ده يبقى مفيش حد هيشترى اى عربية وكل العربيات مش هتتباع اصلا .....

شكرا لكل من شارك او قراء الموضوع
فى انواع كتير من المشتريين للسيارات:
فى نوع ممكن يشترى عربيه لسه سامعين عنها وهو ممكن يكون اول واحد يسقها فى مصر, وله اسبابه للشراء, ممكن يكون مستعجل- ممكن يكون معندوش خبره كافيه- ممكن يكون مقتنع بيها لاسباب معينه- ممكن يكون حد شار عليه بالعربيه (مسؤل المبيعات مثلا)- ممكن يكون متوقع نجاحها- ........................الخ

فى نوع تانى بيقف على كتاف اللى قبله, بيبنى قرار الشراء على انطباعات النوع الاول من المشتريين وخبرتهم مع العربيه وقادر يقرا السوق
النوعين صح . اى سوق لازم يكون فيه النوعين عشان العجله تمشى

انا بهاجم اللى بينصح بالسياز بدون ادله كافيه عن العربيه ولست بهاجم العربيه

حضرتكم اثبتم وجه نظر فئه كبيره من المشترين وهى صحيحه
ملخص لردود حضراتكم عنالاقبال على شراء السياز:
· موديلات تانية فى نفس الماركة اثبتت نجاح كبير ) الناس تشترى وهى مغمضة معتمدة على الشكل والكماليات وسمعة العربية اللى قبلها(
· الماركة ديه ليها سمعة كويسة فى السوق ) سوزوكى سمعتها كويسة(
· سمعة التوكيل
· سعر العربية مقارنة بامكانياتها
· الشكل اجمل
· المساحه الداخلية اكبر
· الشنطة اكبر
· سياز طبعا هندي و دي افضل في الجودة من المصري (التقفيل)

هل الاجابات والمعلومات ديه كفايه انى احكم على السياز انها عربيه كويسه وناجحه؟

احنا عندنا معلومات عن التوكيل والماركه والكماليات والتقفيل لكن نسينا اهم حاجه..............العربيه نفسها ايه اخبارها؟
هل الشكل والشنطه والكماليات والتقفيل كفايه انى اشترى العربيه؟

عيوب العربيه لسه متعرفتش عشان لسه متجربتش بما فيه الكفايه
محدش يقول السياز مفيهاش عيوب, اى عربيه فيها عيوب ومميزات

ملخص:
اولا: اى حد من حقه يشترى عربيه زيرو لسه متجربتش لسه جديده فى السوق المصرى بالمعلومات اللى عندنا ديه
المهم انه لما يشتريها يحط فى باله انها لسه متجربتش.
اى عربيه وهي جديده بتبقا رائعه وجميله وبتلمع, فاكيد محدش هيشتكى منها
بلاش ننصح بعض ونقول العربيه صفقه رائعه ورابحه/ عربيه محترمه / دا محدش بيشتكى منها. دا طبيعى مهى عربيه جديده ياجماعه

ثانيا: لما ننصح بعض بيها نذكر المعلومه ديه "انها لسه متجربتش" نكمل بقيه المعلومه.

متفق مع الاعضاء الكرام ان اللى ينصح بعربية لازم يقول انها لسة ماتجربتش بما فيه الكفاية ...

لكن بردة فى نسبة مخاطرة فى شراء العربية حتى لو متجربة على فكرة ... ازاى ؟.. هو مش ممكن العربية يطلع فيها عيب صناعة يطلع عين المشترى ومايكونش ظهر قبل كدة ... طبعا حد هيقوللى ماهو التوكيل هيصلح العربية او يبدلها او يغير قطعة الغيار المعيبة ... لكن بعد اد ايه هل انت ضامن انك مشكلتك تتحل فى نفس اليوم وخللى بالك انك ممكن تستلم العربية وماتلاقيش فيها اى حاجة وبعد كام يوم وممكن يكون فترة ال 14 يوم الاولى تكون فاتت ... خش بقى فى متاهات .. التوكيل ممكن يقولك احجز قطعة الغيار البايظة وممكن يقولك ان مافيهاش عيب اصلا .. تقعد تناهد وتجادل معاه .. تفتكر بعد كدة انت هتحب العربية ... اكيد تختلف من شخص لاخر ... لكن اللى عايز اقوله ان لازم يكون فيه نسبة مخاطرة ( يعنى محدش يفتكر ان تجربة السيارة من ملاكها هى كل حاجة - بس اكيد هيا بتديك فكرة وخلفية عن السيارة طبعا )
فى حاجة كمان افرض السيارة مافيهاش تست درايف يبقى هتجربها ازاى ؟.. لازم يكون حد صاحبك او قريبك معاه العربية عشان تاخدها منه وتسوقها واحيانا بيكون ده مش متوفر .. يبقى فى النهاية لازم تسمع من ملاكها ... والناس ارائها مختلفة .. تلاقى واحد بيشكر فى العربية جدا وواحد تانى بيقول ديه اسوأ سيارة ... ساعتها هتسمع كلام مين ؟؟ لازم تجرب بنفسك .........

فيه عربيات بتبان من وقفتها كده وما بالك باة لما تكون سوزوكى

السلام عليكم

انا مع الرأى اللى بيقول استنى شويه لحد ما تتعرف عيوب السيارة وعندنا أمثلة كتير زي مثلا التويوتا الكورولا الجنوب أفريقى نزلت فيها أوبشنز كتير جدا وكانت عاملة نسبة مبيعات عالية فى الأول لأنها كانت بناء على ثقة من الموديل اللي قبلها اللي هو لحد 2007 ونجح كتير - وكمان ثقة الناس في تويوتا كماركة - وبعدين اكتشفوا الفتيس ال mmt اللي فيها زبالة وبيهنج وبيسخن ويفصل وكانت حوسة كبيرة ولا أعرف شخصا يمتلكها الا ويريد بيعها ولكن طبعا السمعة سبقت والسعر نزل كتير

ايضا مشكلة الفتيس ال dsg فى جميع موديلات فولكس ولكن فولكس لحقت نفسها وعملت ضمان مدى الحياة للفتيس

لو انت فاهم قوي في الميكانيكا والعفشة والمواتير والجيربوكس ممكن تبحث فى النت وتعرف التفاصيل وتقدر تطمئن بنفسك - أو أسأل خبير يطمنك لو أنت حاسس أن السيارة لقطة وهيزيد سعرها - لكن لو مش قادر تعرف حاجة أستنى لما تتباع وشوف حد جابها وسوقها بنفسك - لأن طبعا التوكيلات الغير محترمة مبتعملش سيارة تست درايف الا ما رحم ربي

الخلاصة فى الكلمتين دول ولكم السلام