نبأ عاجل....زيادة جميع أسعار سيارات رينو

**ehabomar1987** · 08-05-2015 11:37 AM

هو الكلام ده اكيد ولا لسة هايغلوا الاسعار اصلي كنت ناوي احجز اللوجان الاوتو الفئة اللي ب 108 يعني غليت 4000 جنيه وكمان العربية مش متوفرة الا باوفر 7000 برة التوكيل يعني الفئة اللي ب 112,000 بقت ب 119,000 برة التوكيل يااااه ديه غليت اوي طيب لو انا وصلت ل 120,000 يبقي اكيد هايبقي عندي اختيارات تانية غيرها في نفس مستوي الشريحة السعرية وده مجرد راي ياريت حد يقولي رايه في الكلام ايه اغير الفئة والماركة تماما ولا اجيبها وشكرا

**Hany Saad** · 08-05-2015 12:00 PM

للأسف اللى حصل فى الرينو زمانه حصل او بيحصل فى باقى الماركات، المستوردين بيجدوا صعوبة رهيبة فى توفير الدولار و فتح الاعتمادات ده غير ان سعر الدولار نفسه زاد رسمياً و كمان الموردين متعودين يرفعوا الأسعار كل اول سنة من 3 إلى 5% تقريباً.... و هى دى النتيجة للأسف.
نفس الشىء هيحصل فى كل المنتجات المستوردة دون استثناء و ربنا يتولانا برحمته.
تحياتى

**ahmed eltaib** · 08-05-2015 12:24 PM

الحمد لله لحقتها قبل الزيادة

**Hamada Basha** · 08-05-2015 01:08 PM

كنت عاوز اجيب قاشكاي ٢٠١٥
اختفت من السوق بشكل شبه نهائي
و اللي عنده بيحط الفئة الأولى ب ٢٢٥ الف ........ !!!! تخيلو ا
و مفيش دفعات نازلة منها الا بعد شهر ٨
يقال ان الوكيل او المستورد عليه فلوس للمصنع
و هما رافضين يبعتوا دفعات الا لما يخلص اللي عليه
دي عالم شغالة فحت الله ينور فينا احنا من جوة
و ف المصنع اللي برة كمان .... !!!
بفكر استنى كادجار شقيقة القاشكاي من رينو
حد يعرف ح تنزل امتى و بكام يا شباب ؟؟؟
و كمان بفكر اجيب القاشكاي من الخليج
بس شايل هم رقم اوكتان البنزين و المواتير اللي هناك
بتمشي ع ٩٥ ع الاقل ، لكن هنا المفروض معمول حسابهم
انهم ح يشتغلوا ع ٩٢ ( مش مغشوش )
افيدوني يا شباب و ربنا يسهلها معانا كلنا

**YahiaAshraf** · 08-05-2015 02:29 PM

وبالنسبة للوجان حط حوالى 5000 جنيه كمان زيادة اوفر برايس علشان تستلم فورى
شعب استغلالى مفيش فايده فيه ........ يعنى المفروض اللوجان لمصر بدون جمارك حسبى الله ونعم الوكيل

**volociximab** · 08-05-2015 06:02 PM

فى السعودية لوجان 38 الف ريال الفلوينس 53 الف ريال داستر 53 الف ريال و الاسعار فى المعرض ارخص
احسبوا الجمارك و شوفوا الوكيل واخد كام

**ahmed eltaib** · 08-05-2015 06:02 PM

انا فاكر لما الدولار عوموه و بقى ب 7 و نص بعد ما كان ب 4 جنيه تقريبا ، ساعتها كل مستوردين السيارات في مصر غلوا تمن العربيات الضعف تقريبا و اتحججوا بالدولار ، بعد كده لما الدولار نزل العربيات فضلت اسعارها ثابتة و اتحججوا بثبات سعر اليورو و الين الياباني .
الخلاصه ان الشركات عندنا مفيش حد بيحاسبهم .

**mabdelrahim** · 08-05-2015 06:29 PM

1) اللوجان مفروض ليس عليها جمارك لانها تخضع لاتفاقية أغادير
2) مع كمية الطلب على اللوجان المفروض ان سعرها ينزل مش يطلع
3) في حملة مقاطعة و سحب مقدمات الحجز حاليا على جروبات رينو على الفيسبوك
4) حسبي الله و نعم الوكيل