الموضوع: سؤال للنقاش ايه مفهوم الشخصية؟

ان يكون متواضع بيشتغل بنفسه فى اى حاجه وبايده ومش بيتحرج من ملابس شغله ويكون دائما عنده احساس بالشبع والاحساس ده ما ينفعش الواحد يقلده لكن الواحد بيتولد بيه بطبيعة الحال مما يترتب عليه عدم طمع وجشع وحقد وحسد مهما كان من حوله فى ازدهار ودايما الشبعان مش بيبص على غيرة الاعلى منه ماديا او مش بيشوفه اصلا ٠٠٠٠٠٠٠٠٠٠٠٠٠٠٠٠ انت عايزلك ييجى منتدى كامل علشان اجاوب على سؤالك وانا بكتب من الموبايل بس كل اللى اقدر اقوله لك فى اخر المشاركه ان الشخصيه اللى بتعجبنى هى اللى بتكون راضيه عن نفسها فى الحياه

طبعا انت بتسأل سؤال اجابته محتاجه كتب علشان تفسرها بس ممكن نختصر الموضوع فى شويه نقط
*مبدأيا الشخصيه هى الشكل العام للشخص بمعنى مفيش حد ممكن تقول عنه معندوش شخصيه "تعبير مش صح" لان ممكن حد تكون شخصيته قياديه كاريزميه انطوائيه اداريه وهكذا ولكن انسان بدون شخصيه يبقى انت بتتكلم عن شخص بلا وصف وبالتالى هو كائن غير حى

*ايه بقى تركيبه الشخصيه اقولك ان كل شخص بيكون ليه بعض الصفات "جيده وسيئه" بتكون صفاته او الشكل العام ليه ولكن بتكون فى صفه معينه طاغيه على الباقيين فبالتالى بيتعرف بيها بس غالبا الناس بتغلط وتفتكر ان الصفه دى هى بس الموجوده وتنسي انه انسان واكيد فى صفات تانيه ممكن نكتشفها فيه ودى بتتسبب فى ظلم للشخص ده فمبدأيا ونصيحه متاخدش انطباع ان كل انسان له شخصيه متمثله فى صفه ما ولكن اعرف ان كل واحد له صفات كتير هى دى كتالوج شخصيته اذا عرفتها تبقى عرفت شخصيه اللى انت بتتعامل معاه

*ايه بقى اللى بيكون الصفات دى اقولك ان الموضوع نسبي بحت ففى صفات بتكون وراثيه وفى صفات بتكتسبها من البيئه المحيطه بيك وفى صفات ممكن انت تختارها وتكتسبها بنفسك وغالبا كل ده بيكون فى فتره ما قبل الشباب لانك بعد المرحله دى بيكون موضوع انك تكتسب صفات جديده او تتخلى عن قديمه بيكون صعب جدا بمعنى بتكون الشخصيه تحولت من صفات لطباع وتكونت بشكل شبه كامل ولذلك لوحبيت تغير شخصيه طفل ما تقدر تعمل كده بسهوله انما مجرد متتكون شخصيته فى مرحله ما بعد الشباب بيكون الموضوع صعب ان لم يكن مستحيل

*موضوع انطباع المجتمع عن الشخصيات ده موضوع ممكن نختلف فيه كتيير جدا بمعنى ان اغلب الناس بيكون عندها انطباع ان بعض الشخصيات افضل من غيرها "بمعنى الشخصيه القياديه افضل من الشخصيه الغير قياديه والشخصيه المنفتحه افضل من الشخصيه الانطوائيه وهكذا" وده انطباع غلط جدا لانه مش مقياس فالتطرف فى اى من الصفات اللى فاتت بيكون قاتل لصاحبه والمحيطين بيه وبرضه كل صفه من دول بتتبعها صفات تانيه فممكن حكمك على الصفه الطاغيه "وممكن تكون كويسه" تخليك تغفل عن الصفات التابعه اللى ممكن تكون سيئه جدا فمثلا بعض الشخصيات القياديه بتكون قيادتها تابع ليها غرور او قسوه او تجاهل اراء الاخرين وهكذا فدى مش شخصيه كويسه بالعكس
وبنفس القياس شخصيه غير قياديه "صفه ممكن تشوفها غير مرغوبه" ولكن الشخصيه دى متسامحه او محبه للعمل او عندها قدره على التحمل فدى تعتبر شخصيه كويسه وهكذا

*الفكره العامه ان كل شخصيه ليها دور فى المجتمع لو قدرت تستفيد بيها حيبقى المجتمع راقى بمعنى انت لو عندك شركه ما و عندك كل الموظفين شخصيات قياديه استحاله تقدر تشغلهم مع بعض وبنفس الطريقه لو كل الشخصيات اللى عندك انطوائيه ولكن لو عندك حد قيادى ومحتاج مساعد ليه فافضل اختيار تحط حد شخصيته تتحمل ضغط الشخص القيادى وبالتالى مفيش شخصيه سيئه طالما حطيتها فى المكان الصح .

*اللى حابب اقوله بلاش ياخدك المظهر العام "او الصفه الطاغيه" وتخليك تنسي وجود صفات تانيه ممكن تكون هى الافضل ولكنها مش ظاهره والموضوع ده بيظهر دايما فى قعدات الجواز فتلاقى البنت مجرد متشوف الشاب المتقدم تقول ده شخصيته وحشه ويبدأ الانطباع ده يخليها تاخد موقف من الانسان ده بدون متعرف باقى جوانب شخصيته اللى ممكن تكون افضل من ناس كتير وبالعكس عند الشباب
بالرغم ان ممكن الصفه دى يكون الطرف التانى بيرسمها لهدف ما .


*اخيرا ظهرت مؤخرا بعض الصفات فى الاشخاص فى مجتمعنا صفاتها السيئه الطاغيه على شخصياتها لا تطاق ولا اجد لها مبرر ولذلك اتمنى من جيل الازواج فى مرحله تربيه اولادهم الحاليه انهم يحاولوا يلغوا عند اولادهم الصفات دى ويبطلوا يشجعوا وجودها داخل اولادهم "سواء عن وعى او عدم وعى" لان الصفات دى لو استمر المجتمع يفرز اشخاص يحملوها حيكون الضرر من اولادهم قبل اى حد تانى و لعل واحد من الاولاد دول هو اللى يغيرلنا البلد ويقضيلنا على الفئه اللى شبت على الصفات دى .

وطبعا الموضوع اكبر من كده وفى كلام اكتر بس دى النقط اللى جت فى دماغى حاليا وطبعا رأيي يحتمل الصواب والخطأ .
تحياتى.