استفسار عاجل وضرورى جدا ياريت تطولوا بالكم ومتزهقوش من كتر كلامى

**أسامة777** · 08-05-2015 06:27 PM

السلام عليكم ،،،
إخوانى بالمنتدى عندى استفسار عاجل جدا
ياريت تطولوا بالكم ومتزهقوش من كتر كلامى
دلوقتى انا شوفت عربية مستعملة عالنت صاحبها عاوز يبيعها عشان مسافر المهم اخدت ميكانيكى وشافها وقال كويسة واتفقنا على تمنها وكتبنا عقد ابتدائى اديته جزء قليل من الفلوس(750) جنيه لغاية ما يجيبلى شهادة المخالفات والرخصة والعربية والعقد المسجل فى الشهر العقارى باسمى ، واسلمه باقى المبلغ واستلم العربية لــكــــــــن المشكلة ان البابع ده كان معموله توكيل من ورثة يــعـــنــى العربية كان ليها مالك الرخصة باسمه والمالك ده مات واتعمل اعلام وراثة فىه 3 اشخاص بس هما ورثة المالك ده اللى الرخصة باسمه ، الورثة التلاتة دول بقى عملوا توكيل (بيع للنفس وللغير والتعامل مع المور وتوكيل الغير) لصاحب العربية اللى انا بشترى منه ، وانا كنت اتفقت معاه انه يعمللى عقد مسجل فى الشهر العقارى مش توكيل ومش حمضى مشترى عشان الرخصة لسة فيها سنة وعاوز استفاد بيها (خصوصا ان العربية فيها حبة تظبيط مش عاوز اعملها دلوقتى لانى لسة بتعلم سواقة وخايف بعد ما اصرف عليها ابهدلها) لكن لما راح الشهر العقارى الموظف طلب منه اعلام الوراثة وشافه واتاكد ان اللى فى التوكيل دول هما بس ورثة مالك العربية اللى الرخصة باسمه لكن الموظف قالله لا مينفعش المشترى ميمضيش مشترى لازم ييجى يمضى مشترى لان انت (الموظف بيكلم البايع) تعتبر مش موجود وكأن الورثة ـ بتوع مالك العربية اللى مات والرخصة باسمه ـ هما اللى بيبيعوا للمشترى
وسؤالى أعمل ايه دلوقتى
ــ هل أخللى البايع يعمللى توكيل بيع للنفس وللغير والتعامل مع المرور ... وكده ونكتب عقد ابتدائى عادى ولما الرخصة تقرب تخلص ـ لسة فيها حوالى سنة ـ اروح ابيع لنفسى فى الشهر العقارى بعقد مسجل وامضى بايع ومشترى وبعدين اروح المرور أكمل الإجراءات [وطبعا ده عشان عاوز استفاد بالسنة اللى لسة فى الرخصة ومعييش فلوس اروح أظبط العربية عشان انقل مكلكيتها دلوقتى فى المرور خصوصا انى لسة بتعلم السواقة)
ــ ولا أخليه يعمللى عقد مسجل فى الشهر العقارى بس ساعتها حضطر امضى مشترى ، وفى الحالة دى يبقى لازم انقل ملكية فى المرور خلال 30 يوم ، وحضطر أصلح العربية وأظبطها وكده قبل ما اروج افحص عشان انقل ملكية .

أرجو تنصحونى نصيحة وافية وشاملة عشان انا محتار جدا وخايف اعمل اجراءات غلط ، خصوصا ان البايع حيسافر ومش حعرف اجيبه وانا مليش تعامل مع ورثة مالك العربية الاصلى اللى مات والرخصة لسة باسمه
واسف على الإطالة وشكرا مقدما

**Abo_Mazen** · 09-05-2015 12:13 PM

قدامك حلين لا ثالث لهم ..
إما إنك تشتري بتوكيل ..وتصور إعلام الوراثه وتخليه معاك إذ ربما يكون موظف الشهر العقاري غتيت ويطلبه منك لما تيجي تعمل لنفسك عقد مسجل بعد كده
أو تروح يتعملك عقد وتمضي مشتري وتقضي السنة اللي باقيه في الرخصه عادي جدا خالص ولما تروح تنقل ملكية تروح الشهر العقاري تعمل حاجه إسمها تجديد تاريخ ..يقال إن تجديد التاريخ ده بيتعمل بعشرة جنيه بس ..وبيقال إنه بيتعمل بتلت القيمة اللي إتدفعت في الأول عشان تنقل الملكية ..ممكن تروح الشهر العقاري تسأل على تجديد التاريخ بكام عشان تكون المعلومة موثقه معاك ..الخيار معاك

**أسامة777** · 09-05-2015 03:08 PM

شكرا لإخوانى على الردود
بس طب انا روحت شهر عقارى تانى مع البايع وولا طلبوا توقيع المشترى ولا حاجة واطلعوا على صورة اعلام الوراثة وعمللى عقد بيع مسجل ووثقه وصوره ميكروفيلم وخلص الموضوع واستلمته من البايع ومن غير ما امضى مشترى
كده المفروض اعمل ايه بقى اروح انقل ملكية فى المرور خلال 30 يوم ولا استنى السنة دى لغاية ما ييجى معاد تجديد الرخصة وانقل ساعتها بالمرة وهل ساعتها لازم اروح الشهر العقارى أمضى مشترى فى العقد الأول قبل ما أروح انقل ملكية وأجدد فى المرور ولا أروح المرور على طول من غير ما اروح الشهر العقارى