قدامى لانوس 2 ومحتاج رايكم بأسرع وقت

السلام عليكم ورحمة الله وبركاتة
اعزائى اعضاء نايل موتورز وقسم دايو الكرام
اخوكم هيشتري عربية دايو لانوس ومحتاج رايكم قبل التسرع او الوقوع فى الخطأ
قدامى عربية بتاعة واحد صاحبي لانوس موديل 2002
بيقول انه عملها عمرة موتور بس انا بصيت ع الموتور لقيته جايب زيت مش عارف هل فعلاً هو بيقول الحقيقة ولا بيشتغلني لان الموتور بتاعه كان مفوت وكان هيغيرلها شورت بلوك بس قالى انه عملها عمره كاملة بس اما بصيت ع الموتور ولقيته جايب زيت شكيت ف كلامه ومش عارف هل لازم تتغسل عشان نعرف نكشف عليها ولا لا انا نويت والنية لله لو هكشف عليها هوديها بنزينة توتال اللى ف اول الهرم
حالة العربية العفشه كويسة الى حدا ما
الطارة فيها قطعه عايزه تتغير
البربريز اللى قدام فيه شرخ وعايز يتغير
المرايا اليمين فيها شرخ برضو وعايزه تتغير
الاكصدامين قدام وورا
ورفرفين
وفانوسين ورا
والكبوت مبيقفلش قالى انه عايز سمكري مع اني حاسس انها عايزه بتاع كوالين
وقالى انه راشش الصدر اللى ف وش العربية جزء صغير منه اللى قدام الشبكه تقريبا ومش عارف ده يعيب العربية اوى ولا ممكن تعدي
العربية لونها اسود
سحبها حلو بس بدال الدبرياج حاسسه تقيل شوية مش عارف ليه علاج ولا لا
العربية كاملة ازاز كهربه بس الفرش جلد مش عاجبني ولو اخدتها هحتاج اركبلها القماش بتاع الفبريكة مش عارف هينفع ولا لا وهيتكلف اد ايه
وطبعاً الرفارف والاكصدامات عايز اجيبهم اصلي
هو طالب 43
هل السعر مناسب ولا لا ولو غيرت الحاجات دي هتكلفني اد ايه مع رش العربية بالكامل بالمرة
واسف على الاطالة وفى انتظار اهتمامكم باسرع وقت
لانى لسه مقابله من شوية وهرجع اقابله تاني بليل عشان نكشف عليها
او اقولو انى مش هاخدها وربنا يوفقه ف بيعها

ياباشا إنت بتهرج دا في مشاكل كتير أوي
_ الموتور كان مفوت وإنت مش عارف هو عمل فيه إيه ...
_ موضوع إنه راشش الصدر ده لازم حد يبص عليه كويس لتكون كانت عاملة حادثة جامدة ..
_ لسه هتغير إكصدامين ورفارف وفانوس ورا وزجاج أمامي ومرايه والكبوت مابيقفلش .

وبعد كل الحاجات دي طالب فيها 43 ؟

إنت إزاي بتفكر تشتري أصلا !!!!... إنت متأكد أن هو صاحبك ؟:011:

المشكلة ان كل اللى على النت مغليين جداً فى الاسعار وحالات برضو مش اللى هي اقل حاجه بيتكلمو ف 50 مقفولة ومش ضامنها برضو دي ع الاقل بتاعة والدة صاحبي من الزيرو ومضمونة الى حداً ما

ابعد هات حاجه نظيفه يا بلاش
كل يوم هتلاقى مشكلة تنكد عليك ولا صاحبى ولا صاحبك

فيه مثل بيقولك الى يصعب عليك يفقرك
بس انا عارف انك اتخنقت من التدوير و عايز تخلص
بس انت فى نفس الوقت تعبان فى الفلوس دى
ده اقل واجب هيتصرف على العربيه بالوضع ده 7 الاف جنيه
و برضه هتتعب لان عندنا ميكانيكيه عسل
و استحاله تاخدها زى الاول
اما لو مصمم و كلامنا كلنا مدخلش دماغك هاتها
و لما تزهق بيعهالى ب30 لان وقتها مش هتسوى اكتر من كدة

انا فكرت اغير رفرفين واكصدامين والمراية اليمين بس وامشى بيها كدة قولت هتتكلف لو جيبتهم اصليين هيعملو حوالي الفين جنية وباقى الشغل اللى فيها كنت هسيبه المهم الموتور والعفشه كويسين ده لو كشفت عليها ف بنزينة توتال وقالولي كدة يعني .. ايه رايكم

اقتباس:

---

المشاركة الأصلية كتبت بواسطة egyarmy

فيه مثل بيقولك الى يصعب عليك يفقرك
بس انا عارف انك اتخنقت من التدوير و عايز تخلص
بس انت فى نفس الوقت تعبان فى الفلوس دى
ده اقل واجب هيتصرف على العربيه بالوضع ده 7 الاف جنيه
و برضه هتتعب لان عندنا ميكانيكيه عسل
و استحاله تاخدها زى الاول
اما لو مصمم و كلامنا كلنا مدخلش دماغك هاتها
و لما تزهق بيعهالى ب30 لان وقتها مش هتسوى اكتر من كدة

---

ليه مش هتجيبلي 30 مش المهم فيها ان دواخلها فبريكة ولا موضوع اللحام ع البارد اللى ف وش العربية من جوه هينزل سعرها ؟؟

ما قلتلك ما تاخدهاشى !!!!!

اقتباس:

---

المشاركة الأصلية كتبت بواسطة eisaa100

ما قلتلك ما تاخدهاشى !!!!!

---

المشكلة انى مش لاقى حالة نضيفة ولما بلاقى بيبقى اصحابها مأفوريين ف السعر جداً دي وصلت انهم بيطلبو 60 الف

لو زهقت من اللف و التدوير
مابالك لو تعرف انا بقالى كام سنه حالى واقف بسبب العربيات و مش عارف اجيب حاجه و بدور و مش حاسس بيأس لان كل عربيه شوفتها كان فيها مشكلة مالهاش حل

اقتباس:

---

المشاركة الأصلية كتبت بواسطة egyarmy

لو زهقت من اللف و التدوير
مابالك لو تعرف انا بقالى كام سنه حالى واقف بسبب العربيات و مش عارف اجيب حاجه و بدور و مش حاسس بيأس لان كل عربيه شوفتها كان فيها مشكلة مالهاش حل

---

ياااه ده صبر ايوب
انا بقالى حوالى تلت شهور وبرضو كل عربية لازم تكون ناقصة حاجه ياما تكون كويسة
بس صاحبها قافش فيها ومعلي ف السعر
ربنا يعترنا ف حاجه نضيفه

العربية المستعملة حالة... و لو العربية حالتها كويسة المشترى هو اللى كسبان حتى لو غالية سيكة

العربية اللى بتتكلم عليها تبقى حلوة بالسعر دة لو عامل حسابك انك هتصرف 7 الاف جنية عليها عشان تقف على حيلها و تبقى زى ام 50 الف... بالتالى الاسهل انك تشترى ام50 الف طالما مش محتاجة مصاريف و تشترى دماغك من وجع القلب

MMamdouh

السلام عليكم
انا رأي بلاش العربية دي لانها هتحتاج مصاريف كتيير وكمان العربية غاليه
انا جبت لانوي 2002 ب 43 برده بس مكانش فيها كل المصاريف دي
وكمان العربية كانت موتورها مفوت يبقى ازاي مضمونة

اقتباس:

---

المشاركة الأصلية كتبت بواسطة محمود فرنسا

المشكلة انى مش لاقى حالة نضيفة ولما بلاقى بيبقى اصحابها مأفوريين ف السعر جداً دي وصلت انهم بيطلبو 60 الف

---

بس السعر ده هتبقى احدث بكتير من 2002

معلش سورى يعنى انت بتشتغل نفسك ولو جبتها هتندم ندم السنين

نصيحه مع اسعار قطع الغيار الغريبه دلوقتي وقرف الصنايعيه اوعي تشتري الا عربيه سليمه لو فيها مصاريف تبقي مصاريف سرفيس بس وبعدين لانوس حالتها حلوه تبقي فوق ال 50 اكيد انا لسه بايع واحده ب 54 لكن تجيب عربيه تبقي صديقه الصنايعيه وتصرف عليها وفي الاخر عمرها ما هتبقي زي السليمه

هو صحيح الاسعار غاليه شويتين بقالها فتره
والعربيه اللي حضرتك بتتكلم عليها دي بالمشاكل اللي فيها (وما خفي كان أعظم) ممكن تنزل سعرها شويه
وعلشان متخسرش صديقك نصيحه بلاش . لان شكلك مقلق منها

لأ لأ لأ
يا اللى ناوى تبعلى لأ لألأ
لأ لأ

https://egypt.dubizzle.com/ar/cars/d...AwJnBhZ2U9NQ==

دى لانوس 2 موديل 2004 بسعر 33 الف جنيه و صاحبها عنده قابليه للتفاوض كمان
فابريكة دواخل و كامله فيها كل الكماليات
و سعر مقنع جدا لانها عربيه بقالها 21 سنه فى الشارع
الى عايز يبيع بيبيع لكن الى عاسز يشترى و يكسب حتى لو مستهلك عادى فده فاكر نفسه تاجر
عشان تصدقونى بس لما اقولكم ان فيه ناس بتطلب اسعار تدخل العقل

اقتباس:

---

المشاركة الأصلية كتبت بواسطة egyarmy

https://egypt.dubizzle.com/ar/cars/d...awjnbhz2u9nq==

دى لانوس 2 موديل 2004 بسعر 33 الف جنيه و صاحبها عنده قابليه للتفاوض كمان
فابريكة دواخل و كامله فيها كل الكماليات
و سعر مقنع جدا لانها عربيه بقالها 21 سنه فى الشارع
الى عايز يبيع بيبيع لكن الى عاسز يشترى و يكسب حتى لو مستهلك عادى فده فاكر نفسه تاجر
عشان تصدقونى بس لما اقولكم ان فيه ناس بتطلب اسعار تدخل العقل

---

لا تحدثني بعد سماع أذنك .... ولكن حدثني بعد رؤيت عينيك ..
روح افحص العربيه الاول وبعد كده اتكلم في السعر العربيه ممكن يكون مغير نص عادي .
اللي عايز يكتب حاجه في الاعلان يكتب وانت روح شوف العربيه الاول وبعدين أتكلم .
الناس بتكتب مواصفات اعلان ولما تروح تلاقي حاجة تانية خالص يعني ممكن تلاقيها فيها عيوب تانيه لم يذكرها في الاعلان ..أسئل مجرب ؟؟؟
ولما حضرتك تلاقي السوق بسعر متفاوت ويجي حد يضرب سعر بعيد عن السوق يبقى لازم تسأل العربيه دي فيها أيه ؟؟؟؟؟هو في حد ميحبش يكسب خصوصاً في عربيه بياعه زي معشوقة الجماهير لانــــــــــــــــــــــ ــــــــــــــــــــوس

اقتباس:

---

المشاركة الأصلية كتبت بواسطة riri4

لا تحدثني بعد سماع أذنك .... ولكن حدثني بعد رؤيت عينيك ..
روح افحص العربيه الاول وبعد كده اتكلم في السعر العربيه ممكن يكون مغير نص عادي .
اللي عايز يكتب حاجه في الاعلان يكتب وانت روح شوف العربيه الاول وبعدين أتكلم .
الناس بتكتب مواصفات اعلان ولما تروح تلاقي حاجة تانية خالص يعني ممكن تلاقيها فيها عيوب تانيه لم يذكرها في الاعلان ..أسئل مجرب ؟؟؟
ولما حضرتك تلاقي السوق بسعر متفاوت ويجي حد يضرب سعر بعيد عن السوق يبقى لازم تسأل العربيه دي فيها أيه ؟؟؟؟؟هو في حد ميحبش يكسب خصوصاً في عربيه بياعه زي معشوقة الجماهير لانــــــــــــــــــــــ ــــــــــــــــــــوس

---

يكسب !!!
هوا حضرتك تاجر ؟

ولا عايز تجيب حاجه ب40 و تستخدمها و تبيعها بنفس السعر أو بعد كلمه تكسب دى كمان انك تبيعها بسعر اعلى فتفكر نفسك وقتها هتفتح معرض عربيات

بص الى اعرفه ان الى بيجيب حاجه ب100 جنيه لو استعملها و باعها بأكتر مثلا من 70 جنيه يبقى حرامى ما بالك لو باعها ب150 بقى

و بما ان دى عربيات عديت العشرين سنه فى الشارع فحضرتك منتظر ايه تانى ؟

غير كدة الاعلان بيقول انه مستعجل للسفر طيب لو فيه توكيل لدايو فى مصر او شيفروليه ممكن تاخد العربيه و تكشف هناك

اهم نقطه عايزك تفتكرها ان بيع و شرا العربيات مش تجارة و العربيات دى لو بما يرضى الله كانت هتقل الفين او تلاته ما بين كل واحد اشتراها كان زمانا بقينا زى الدول المحترمه الى فيها السانتافى 2006 ب700 دولار كندى يعنى كان زمان حضرتك راكبها بسعر حوالى 5500 ده ممكن يكون فى مصر تمن جنوط ليها طول ما الوضع كدة لان الى بيحدد سعر المستعمل اكيد سعر العربيات الجديده و ثقافه الشعب و احنا شعب فهلوى فمكانش زمانك راكب لانوس 2004 زى ماحضرتك كاتب و عشان كدة اتضايقت اوى اول ماعرفت انك مش هتقدر تكسب من معشوقه الجماهير

متشكر جداً ياجماعة على ردودكم الموضوع قديم اوى
انا خلاص صرفت نظر عنها واشتريت اختها بس مفيهاش شغل سمكرة او دوكو
وفريقه دواخل بالكامل بـ 46 ونص
ياريت الموضوع يتقفل وشكراً

اقتباس:

---

المشاركة الأصلية كتبت بواسطة egyarmy

يكسب !!!
هوا حضرتك تاجر ؟

ولا عايز تجيب حاجه ب40 و تستخدمها و تبيعها بنفس السعر أو بعد كلمه تكسب دى كمان انك تبيعها بسعر اعلى فتفكر نفسك وقتها هتفتح معرض عربيات

بص الى اعرفه ان الى بيجيب حاجه ب100 جنيه لو استعملها و باعها بأكتر مثلا من 70 جنيه يبقى حرامى ما بالك لو باعها ب150 بقى

و بما ان دى عربيات عديت العشرين سنه فى الشارع فحضرتك منتظر ايه تانى ؟

غير كدة الاعلان بيقول انه مستعجل للسفر طيب لو فيه توكيل لدايو فى مصر او شيفروليه ممكن تاخد العربيه و تكشف هناك

اهم نقطه عايزك تفتكرها ان بيع و شرا العربيات مش تجارة و العربيات دى لو بما يرضى الله كانت هتقل الفين او تلاته ما بين كل واحد اشتراها كان زمانا بقينا زى الدول المحترمه الى فيها السانتافى 2006 ب700 دولار كندى يعنى كان زمان حضرتك راكبها بسعر حوالى 5500 ده ممكن يكون فى مصر تمن جنوط ليها طول ما الوضع كدة لان الى بيحدد سعر المستعمل اكيد سعر العربيات الجديده و ثقافه الشعب و احنا شعب فهلوى فمكانش زمانك راكب لانوس 2004 زى ماحضرتك كاتب و عشان كدة اتضايقت اوى اول ماعرفت انك مش هتقدر تكسب من معشوقه الجماهير

---

بدء ذي بدء دي أراء لازم الواحد يحترمها كل واحد حر يبيع زي ماهو عايز .
للعلم أنا مش تاجر .. وحضرتك جاوبت بدون ما تشعر علي السؤال اللي سائلته ان اللي بيحدد سعر المستعمل عندنا في مصر هو سعر الجديد واللي بيساهم فيه سعر الدولار مثال علي ذلك أنا لما اشريت كان سعر الدولار ب x والنهارده ب 2x .. وكمان الجمارك ده الفرق بين عندنا والدول التانيه لان احنا مستوردين يعني ممكن في السعوديه مثلاً تركب مرسيدس شبح ب 10 الاف ريال هنا بقا تركب شبح بكام ......
ده هو اللي خلي سعرها محفوظ بجانب عوامل اخري تخص معشوقة الجماهير قطع غيارها الرخيصه والمتنوعه يعني من الاصلي للكوري والتيواني والالماني وحتي الصيني بجانب توافراها الي صنيعيتها المتوفريين .. ده سبب تاني مخليها محافظه علي سعرها .
للعلم أنا لما ربنا كرمني واشترتها مكنتش هي اللي عليها العين والنيه وكنت مش قابل اشوفها بس الفلوس هي اللي رمتها في طريقي ..
حضرتك ممكن تجيب بنفس السعر ميجان مثلاً بس صعب تلاقي قطع الغيار وغاليه ومفيش ليها صنعييه كتير يبقي لازم تتعامل مع التوكيل اللي هينحل وبرك وتتعطل كام يوم .
لاكن عشقتي عمرها ماخذلتني لو عطلت اطبطب عليها تمشي مش ابيت جمبها .
أكتر عربيه موجوده في مصر دي الناس مسميها 128 .
عرفت بقي ليها مسميها معشوقه الجماهير .

اختلاف الرأى لا يفسد للود قضيه
أحييك يا استاذ riri4 على ردك و نقاشك معايا بس دى كانت وجهت نظرك و دى كانت وجهه نظرى و انا محترم وجهه نظرك زى مانت متقبل وجهه نظرى تماما و ربنا يكرمك و تحافظ عليها لان كل واحد صاين عربيته بتصونه لذلك بيحبها لانها مقصرتش معاه
و مبروك لصاحب الموضوع على العربيه الجديده

اقتباس:

---

المشاركة الأصلية كتبت بواسطة egyarmy

اختلاف الرأى لا يفسد للود قضيه
أحييك يا استاذ riri4 على ردك و نقاشك معايا بس دى كانت وجهت نظرك و دى كانت وجهه نظرى و انا محترم وجهه نظرك زى مانت متقبل وجهه نظرى تماما و ربنا يكرمك و تحافظ عليها لان كل واحد صاين عربيته بتصونه لذلك بيحبها لانها مقصرتش معاه
و مبروك لصاحب الموضوع على العربيه الجديده

---

ومبروك لروح الموده الموجوده بينا وربنا يدمها دايماً علينا ..

الف مبروك وربينا يباركلك فيها ويديك خيرها ويكفيك شرها