مطب بيأثر على الموتور ؟ مش العفشة ؟ برجاء المساعدة

**CraZyDoT** · 12-05-2015 05:45 PM

السلام عليكم و رحمة الله و بركاته

الموضوع اني من فترة ماشي على طريق حافظة اكتر من بيتي ،، و انا ماشي جيت اطلع من العربية اللي قدامي لقيت نفسي هلبس ف حفرة عاملينها الناس الحلوين اللي بيقشرو الاسفلت علشان يسفلتوه من جديد ،، المهم على قد ما اقدر حاولت افادي بس الحفرة خدة الفردتين الشمال ... الحمد لله ... الغريب بقى ان بعد الحفرة حسيت صوت العربية بقى عالي و في رجة او رعشة او خشونة ف الطلعة او ما بين النقلات ف السرعات القليلة

اللي خلاني اقول انه اثر ع الموتور مش العفشة كام حاجة هوضحها بالتفصيل:

1- رجة او خشونة زي ما قولت ف الطلعة
2- صوت الموتور بقى عالي ( دا بس لو العربية واخده غيار و ماشية)
3- الصوت بيبقى هادي و ناعم ع السلانسية او لو كنت على سرعة و ممور او حتى لو العربية ماشيه على سرعة و ممور و دايس بنزين ،، يعني المشكلة ف الصوت العالي و الرجة و كل دا مبتظهرش غير لما العربية تبقى واخده غيار و ماشية
4- استبعدت ان يكون في بلية او اي حاجة من دي علشان لو ماشي على سرعة و مورت مبيبقاش في صوت زي ما قولت

اسف ع الاطالة ،، و مستني ارائكم

**محمود فرنسا** · 12-05-2015 06:25 PM

اعتقد الاعراض دي بتبقى من الشكمان ممكن تروح لبتاع شكمانات وان شاء الله خير

**shake** · 12-05-2015 06:51 PM

متا بع

**Abo_Mazen** · 12-05-2015 07:07 PM

إكشف على قواعد المكنه ..وقواعد الفتيس ..فيه ناس بتقول إن قواعد المكنه والفتيس هي نفس الحاجه ..مش مهم ..المهم إكشف قواعد بس وإتأكد إن هي كويسه ومفيهاش حاجه

**zendo** · 12-05-2015 11:52 PM

فية مشكلة فى القواعد

**hema111** · 13-05-2015 12:37 AM

ممكن تكون المشكلة بسيطة جدا ... من وجهة نظرى هأعرض عليك تحليلى للموقف وممكن يكون صح وممكن يكون خطأ
العربية وهى ممورة لا توجد بها مشكلة .. اذن الموتور تمام
العربية وهى واخدة غيار تظهر مشكلة الصوت ..أذن يحتمل ان الفتيس وضعه مع الموتور ليس سليما بنسبة 100% بمعنى انه ربما نتيجة هذه الحفرة والسرعة العالية حدث قطع صغير فى قاعدة الفتيس أو تحركت هذه القاعدة من مكانها ولو بكسر من المليمتر
الحل : يكون بفك قاعدة الفتيس والتأكد من أنها سليمة ولا يوجد بها اى قطع ثم عند تركيبها مرة أخرى أنصح بعدم التأريط على المسامير وكذلك يجب ترييح مسامير القاعدة الاخرى (قاعدة الموتور) ثم ادارة الموتور وتزود بنزين مرتين تلاتة ويتم ربط المسامير والموتور شغال بقصد ضمان الحصول على الوضع الامثل والمريح للموتور مع الفتيس ... واتمنى لك التوفيق فى الاصلاح ان شاء الله

**hon** · 13-05-2015 03:42 AM

قواعد الماتور الجلد انقطعت من الحفرة وبقى فى خشونة وصوت مسموع مع الطلعة ودا التفسير المنطقى للمشكلة
تحياتى

**swimmer25** · 13-05-2015 10:33 AM

أعتقد إنك محتاج بس تربط عفشة والدنيا هتظبط..الحفرة ممكن تأثر في المقص فصواميل تثبيته بتهوي وبالتالى بتكون العجلة بتلعب وتعمل الرجة دي في الطلعة

**m_k_elhosiny** · 13-05-2015 02:15 PM

معاذ الله ... ممكن يكون عامود الكوبلن الشمال اتلوح و لو بقدر بسيط فيعمل الرجة و زنة خصوصا مع الطلعة أو بداية الدوس على الغيار ... حصلت معايا في لانسر بومة قبل كده