سخونه المحرك من الالف الى الياء
السخونه مشكله تواجه الكثير فى فصل الصيف
من خبرتى الشخصيه المتواضعه وخبرتى المكتسبه من نايل موتور ححاول القى الضوء باستفاضه عن السخونه
تنقسم السخونه الى قسمين مباشره وغير مباشره
نبدء بالاسباب المباشره دوره التبريد نفسها ودى تنهى الشك فيها بعمل سيرفس كامل متكامل للوصول بالدوره لحاله الزيرو حتى اذا لم تواجهك مشكله مباشره وحتفك دماغك من اى مشكله مباشره فى الدوره
لو انت بتحب تفك وتشتغل بايدك زىى يكون افضل لو متعرفش اتجهه للصنيعيه
صيانه دوره التبريد اولا حنعمل غسيل مبدئى نفتح الدوره من طبه بالرداتير او نفك افيز وندور والعربيه بارده ونحط خرطوم ميه فى القربه ونعمل كده 10 دقايق بعد كده نغلق الدوره تانى ونجيب ملح لمون ب3 جنيه وندوبه فى لتر ميه ونفضيه فى الدوره ونجيب زجاجه خل ونفضيها فى الدوره وندور تانى دوره مغلقه 20 دقيقه ونسيب العربيه تبرد ونفتح الدوره ونحط خرطوم ميه وندور لازاله اثار الملح والخل ونحط قليل من زيت الصبون واحنا شغالين حتى نتاكد من ازاله جميع المواد المضافه ونغلق الدوره ونتاكد ان طرمبه المياه تعمل جيدا وتقلب المياه(تتغير لو مش كويسه) تمام كده خلصنا الغسيل المبدئى نفك الرداتير ونغسله عند بتاع الرداتير ونفك خزنه وننظفها كويس جدا وجميع المواسير لو لم نحصل على نتيجه مرضيه يتغير
بالنسبه للعربيات القديمه تسعينيات فيما تحت حنغير كل المواسير الكاوتش بتاعت الميه(لها عمر افتراضى)
نبدء ننضف المروحه او المروحتان ونتاكد انهم ناعمين (مش عايزين تغير وشغالين كويس)
نشوف ترموستات تشغيل المراوح والاسلاك والكتاوت والفيوزومقاومات السرعه الاولى ان وجدت(نراجع على كهربه المراوح بالكامل)فى زياده انا بدور على لمبه مش شغاله فى التبلوه واعملها تنور مع المروحه عشان اكون عارف ايه اللى بيحصل وانا سايق مع عمل مفتاح طوارء لتشغيل مروحه الرداتير مباشر احطياطيا(لو حدث مشكله لترموستات التشغيل بينقذ الزرار الاحتياطى)
نبدء نركب المواسير الجلد الجديده والرداتير على قواعده الجلد ولو مش موجوده نجبله قواعده الجلد ونركب المروحه ونتاكد انها قاعده صح على قواعدها ومبتتهزش ومربوطه كويس (عشان ميكونش فى اى اثار اهتزازات من المروحه لنعومه التشغيل)
طبعا ترموستات الكوعه لو متشال يتركب جديد
نحط ميه ونجيبها من تكييف (مقطره) او نشتريها وندور ونتاكد ان المراوح شغاله وان الحراره فى الوضع الطبيعى ومفيش تسريبات كله تمام نبدء نمشى مشوار بسيط كده عندنا اعتماد مبدئى للدوره فاضل الاعتماد الكلى وده بعد 1000 كيلو لو الميه نقصت كحد اقصى كوبايه كده الدوره اعتمدت وحنجيب ميه خضرا مبدئيا ايادا اسبانى لانها اخف من الموبيل كمرحله اولى لمده سنه وعند عمل غسله بعد سنه نحط الموبيل(لو الميه بتنقص جامد واتاكدنا ان مفيش اى تسريبات باينه راجع جزئ وش السلندر)
كده احنا انتهينا من دوره التبريد الاساسيه كده لو مفيش مشاكل مباشره عربيتك دوره التبريد فيها زى الساعه ومهما كان الجو انت فى امان باذن الله
سخونه من مشاكل غير مباشره
ودى لها قصصها وعشتها كلها وحلتها باذن الله
1-الشكمان
ده ممكن يسخنلك العربيه لو مسدود لان العادم مش عارف يطلع بكثافه +تاثيرات على السحب والتجميع والعلاج بتراجع دوره الشكمان بالكامل
2-الفرامل
ودى فنيه جدا وواجهتها وحليتها لاكن لففتنى حوالين نفسى حتى فهمتها
العربيات المستعمله تعانى اهمال السنين وجدت مره خرطوم فرامل (اللى بيتوصل بجهاز الفرامل)مسدود وعامل زى السكس فالف بيمرر الباكم من نحيه ويرده ببطئ شديد وده بيخلى الفرامل بعد ما تسيب الدوسه تفضل ماسكه وكله من عزم الموتور ويؤدى الى سخونه الموتور والاجهزه
وطبعا سيرفس وقايه تغير الاربع خراطيم وكل زيت الباكم مش حيزعلك وحيخلى دوره الفرامل مظبوطه اكتر
3- وش السلندر
وش السلندر فى الوضع غير الطبيعى كشط وتزويد وجوانين والعك ده يؤدى الى سخونه السياره(ويؤدى الى تسريب لو فاتح مع دوره التبريد ونقص كتير للميه) وعلاجه يتغير
4- سيارات دوره تبريدها غير ملائمه للاجواء الحاره
زى السكودا ومشاكل سخونتها
دى علاجها تعديل دوره التبريد نفسها برداتير اكبر (انا بعتبره اهم من المروحه الاكبر لانه هو المسؤل عن قدره التبريد)وتغيير المروحه باكبر
5- حراره طبيعيه فى السرعات البطيئه وحراره عاليه فى السرعات الكبيره
ده معناه ان قدره التبديد الحرارى للدوره اقل من ناتج الحراره للمحرك وببساطه كمثال ان الرداتير فبريكا يقدر يبرد 2000 واط والمكنه تنتج حراره 1800 واط وحصل انسداد فى الرداتير للمواسير فاصبحت قدره تبديده الحرارى 1000 واط فعند المشى بالسياره بسرعات متوسطه يكون ناتج المحرك الحرارى اقل من 1000 واط فيستطيع الرداتير تبريده ولا يحدث مشكله وعند السرعات ينتج المحرك قدره اعلى من قدره تبريد الرداتير فيحدث مشكله السخونه عند السرعات والعلاج السيرفس فى اول المشاركه
6- العربيه بتسخن عند تشغيل التكييف
العيب مشابه لرقم 5 والعلاج السيرفس فى اول المشاركه
اتمنى انى اكون وضعت كل مشاكل التبريد وحلولها ولو نسيت حاجه وافتكرتها حضيفها باذن الله وطبعا لانى بشتغل بايدى معظم الشغل مبعرفش اصور