الموضوع: إصنع بنفسك-بالصور تغيير ليدات تابلوه الماتريكس وتنظيف العدادات

ندخل فى الموضوع على طول
بإستخدام طرف مفك عاده رفيع إرفع طرف كنترول الساعه الموجود بالتابلوه برفق الى اعلى من الجانب الايسر ثم الايمن كما بالصوره

إرفع كنترول الساعه لتجد فيشة الكهرباء ,إضغط على الكلبس الابيض ثم إجذب الفيشه لأسفل لفصل الكنترولر




فك المسمار الصليبه اسفل الكنترولر كما بالصوره



الان اصبح الغطاء الاسود للعدادات ماسك فقط بكلبسات حول العدادات, أدخل طرف المفك العاده فى زاوية الغطاء مع الدفع فى اتجاه السهم وبيدك إجذب الغطاء الاسود من مكان كنترولر الساعه فى اتجاهك ولأعلى كما بالصوره



استخدم كلا من طرفى الغطاء الاسود الايسر والايمن ليخرج معك كما بالشكل



الان امامك العدادات مكشوفه , قم بفك الثلاثة مسامير الصليبه على جانبى العدادات




يفضل تكون العربيه مبطله - إرفع العدادات لأعلى وفك فيشة الكهرباء بنفس الطريقه السابقه (كنترولر الساعه)




خد معاك العدادات فى البيت كده براحه وشوية شاى بالنعناع علشان نبتدى الترويق
ده ضهر العدادات



بطرف المفك العاده ادفع الكلبسات المؤشره بالاسهم الى اعلى









بعد فك الضهر البلاستيك الابيض ستظهر لك بوردة العدادات كما بالصوره
الليدات موجوده تحت الكلبسات السوداء المؤشره بالاحمر



قم بلف الكلبس الاسود عكس إتجاه عقارب الساعه وشد الليد للخارج ليظهر لك كما بالصوره



برفق اجذب الغلاف الازرق للخارج ثم الليد من الكلبس الاسود وقم بتغييره بجديد ثم اعد تركيب الليد والغطاء الازرق - اظن انه من الممكن تغيير لون الليد لكنى لم ابحث عن الوان لليد التابلوه غير الاصفر العادى


ودى النوعيه اللى وجدتها معروفه بالسوق




دلوقتى تكمل كباية الشاى قبل ماتبرد علشان ننضف العدادات



باستخدام المفك العاده ادفع كلبسات الوش الشفاف للتابلوه الى اعلى كما بالصوره







يمكنك غسيل الوش الشفاف بالصابون السائل والماء البارد باستخدام اسفنجه ناعمه او قماشه ناعمه (حذار من الدعك الجامد تجنبا للخدوش) أما العدادات يمكنك تنضيفها برفق باستخدام قماشه ناعمه مبلله بجلانس - التنضيف برفق جدا حفاظا على المؤشرات البلاستيك - لا تقم برش الجلانس مباشرة على العدادات ولكن بلل القماشه بالجلانس وامسح بها برفق




قم بإعادة تجميع العدادات (الوش الشفاف والضهر البلاستيك الابيض) بعكس الخطوات السابقه
والان اصبح الوضع أفضل



أرجو ان اكون وفقت فى الشرح ومعذرة على جودة صور الموبايل

المشاركة الأصلية كتبت بواسطة mhkorayem

فعلاً انت عندك حق في ان الصفحة بقت تقيله بسبب الاقتباس وانا بعتذرلك عن ده
بس انا مش عارف الغي الاقتباس ده ازاي فلو في طريقه قول لي عليها وانا هعملها فوراً
ولو مفيش فبطلب من ادرارة المنتدى تلغي الاقتباس اللي انا عملته في الرد بتاعي وده للمصلحه العامه عشان الصفحة متبقاش تقيله وابقى شاكر ليهم جداً
وياريت كمان لو يثبتوا الموضوع ده يبقى شكراً ليهم جداً
ومعلش لحضرتك مره تانيه اني تسببت في تقل الصفحة هاخد بالي من الموضوع ده بعد كده

ياباشا مش مستاهله اعتذار ولاحاجه - الموضوع بسيط
وللاسف حسب قوانين المنتدى التعديل بيكون فى خلال 20 دقيقه فقط من رفع المشاركه
انا برضه معرفتش اعدل العنوان لتغيير كلمة ليدات الى لمبات التابلوه - حسب اقتراح الصديق الفاضل rotanamasoud

المشاركة الأصلية كتبت بواسطة صياد النجوم

ربنا يكرمك انا عندى لمبه منهم محروقه ونفسى كنت اغيرها بنفسى ومكنتش عارف بس انا ناوى اجيب ليدات بيضاء بدال اللمبات الصفراء

وبالرغم من بساطة الامر إلا إن لمبات التابلوه المطفيه بتعكنن على الواحد وهو سايق بالليل جدا وخصوصا لو كانت لمبة الساعه او البنزين
يا ريت تشاركنا بتجربتك لو لقيت فى السوق ليدات بيضاء ينفع تركب بدلا من اللمبات الصفراء