في المخالفات واسطه وكمان في الطفايه واسطه .. كوسه كوسه يعني
السلام عليكم
----
بعد ما روحت جبت شهاده المخالفات من عشر ايام تقريبا ((بالواسطة))
مازالت وستزال .. الواسطه هي الحل
وطلعت عملت شغل في الموتور خلى العربيه جديده
وقولت اتوكل علي الله واخلص الرخصه
طلعت امبارح ع المرور اجيب اورنيك فحص
وسألت الموظف في ورق تاني مطلوب في الفحص (طبعا عشام الموظفيين مش طايقيين حد يتكلم معايا قالي لا )
وانهارده صحيت الساعه 6 ونص ونزلت اروح اقف في الطابور من بدري عشان اخلص والحق شغلي
روحت سألت الجماعه اللى واقفيين ايه الورق .. الصدمه قالولي لزم اورنيك الطفايه ..
سيبت العربيه وطلعت ع هناك واتبعهدلت في الشمس عشان البيه الموظف ..
المهم .. رجعت عملت الفحص والصول بيشوف الطفايه قالي دي منتهيه ..
وهات واحده ب 125 ج من جنبي !!
والراجل اللى بيبع لما صدق .. طبعا استغلال في استغلال
وقفت شويه لقيت ناس كتير تروح تمضي من الضابط انه يعدي الموضوع وكل واحد جايب واسطه معاه !
قولت هي كده كده كوسه مطبوخه ولازم الواحد يستطعم طعم الكوسه احسن ما يتعك في حوسه
كلمت والدي (عميد سابق في المخابرات الحربيه) ومكنتش عايزة يجي ولا حتي استعنت بيه في المخالفات لاني فعلا مبحبش الاسلوب ده والله ((بس لو ظلم يبقي ع الكل بقي مش معني انا اللى اشتري ))
صحي من النوم وجالي .. وبكلمه واحده الطفايه بقت حلوة وجميله ويعيني علي الناس الغلابه اللى عمالين يشتروا والراجل مهيص بيع واستغلال مواقف .
الحمد لله في النهايه خلصت كل حاجه واستلمتها 3 سنين .. بس فعلا يوم مقرف وموظفيين عايزين نظام صحي ورياضه لاحسن ايديهم بتتحرك بالعافيه !!