أنا هقولك اللي أعرفه ..وأكيد أي حد من الأعضاء عنده معلومة هيضيفها ..
المؤشر الأساسي اللي تعرف بيه إن العربية بتاكل زيت ..إنك تلاقي الزيت بينقص ..زيت المكنة بينقص ..تاني حاجه تلاقي دخان أبيض مائل للزرقه طالع من الشكمان ..وحسب بقى حالة الموتور عندك ..لو المكنة رايحه في داهية ومش راجعه تاني هتلاقي الدخان الأبيض المائل للزرقة ده بيطلع وهي العربية دايرة على السلانسيه ..لو المكنه لسه فيها الرمق وفيها الروح هتلاقي الدخان الأبيض المائل للزرقة ده بيطلع مع القرص على المحرك ..يعني تدوس بنزين جامد وهي العربية واقفه على وضع المور هتلاقي الدخنه طالعه ..لو المكنه فيها نفس وممكن تمشي حالها معاك مش هتشوف الدخان الأزرق ده غير مع القرص على المكنه جامد وتكون موجه مصدر ضوء على الشكمان ..يعني كل ما كفاءة المكنة كانت كويسة هتلاقي الدخان الأبيض المائل للزرقة ده يقل ..وكل ما كانت حالة المكنة سيئة هتلاقي الدخان الأبيض المائل للزرقة ده يزيد ..والمفروض طبعا في الحالة المثالية إن مفيش دخان أصلا يطلع من الشكمان ..لا أزرق ولا أبيض ولا إسود ولا أي لون ..فيه برضه مؤشر تاني تقدر تعرف بيه المكنة بتاكل زيت ولا لأ ..إنك تحط صباعك في الشكمان وهي العربية بارده تماما ..طبعا هتلاقي في كاربون طالع على صباعك ..لو لقيت الكاربون ده بيلمع وملزق في إيدك ..يبقى كده المكنه بتاكل زيت ..لو لقيت الكاربون طالع كده ناشف وعبارة عن لون إسود يبقى كده المكنه كويسة ..هو أساسا المفروض الشكمان ما يطلعش في إيدك كربون غير يدوب ..حاجه كده لا تذكر..يعني زي ما يكون لون بس على صباعك ..بس طبعا مع حالة البنزين ووضع العربيات من ضبطات كاربراتير وغيره هنقول إنك هتلاقي كربون في الشكمان ..
خلي بالك برضه من حاجه ..تعريق المكنه أو نزول مياه من الشكمان ..مش قصدي طبعا على مشاكل جوان وش السلندر ..أنا بتكلم عن المياه المعرقه اللي بتنزل من الشكمان ..أو اللي بيسموها الميكانيكية الشكمان بيرتل ..المياه دي مش دليل خالص على إن المكنه كويسه ..ممكن تكون المكنة خفيفة سنة ورغم كده بتعرق ..آه ..في حاجه كمان أو إختبار كمان بيعلموه عشان يعرفوا المكنة بتاكل زيت ولا لأ ..في العربيات الكاربراتير هتلاقي عندك في خرطوم طالع من البلوك ورايح على العمة اللي فيها فلتر الهوا ..فك الخرطوم ده وهي العربية على السلانسية كده ..لو لقيت في دخان أبيض برضه مائل للزرقة طالع من الخرطوم ده يبقى المكنة بتاكل زيت ..لو ملقتش خلي حد يزود بنزين وإنت ماسك الخرطوم ده في إيدك ..لو لقيت برضه دخان أبيض مائل للزرقة يبقى كده برضه المكنة دي بتاكل زيت ..
لو أي حد من الأعضاء عنده معلومات إضافية ممكن يتفضل يقولها ..على فكره فيه حاجه إسمها إختبار كبس بيتعمل في البنزينه ممكن تعرف بيه حالة المكنة والكبس بتاعها في تهريب زيت ولا لأ
خلي بالك ..لو المكنة ما بتاكلش زيت كتير ..لكن برضه بتاكل زيت ..يعني هي بتاكل زيت لكن مش كتير ..ممكن شوية زيت شنبر يدارو العيب وتعدي عليك الحكاية دي
المفضلات