الموضوع: مساعدة فى سيارة اوبل تكون محترمة

ممكن لو حد فيكم يعرف حد فى القاهرة (تاجر - هاوى سيارات - ميكانيكى - محل لبيع المستعمل ) يعطنى رقمه اهم شئ يكون أمين وعنده الخبرة فى السيارات الاوبل يشترى لى سيارة فيكترا موديل b2 1600 سي سي الموتور القديم الاسود مانيوال وتكون حالتها نظيفة
لان الشراء عن طريق المواقع او سوق السيارات يعتبر مغامرة لانعدام الضمير خاصة لمن لا يملك الخبرة فى هذه السيارة.

وجزاكم الله خير

طالما انى مش لاقى مساعدة من اعضاء المنتدى فى ترشيح شخص او معرض يكون امين
فدورت على النت ولقيت معرض عارض سيارة اوبل موديل 99 موتور 1600 سي سي كاملة مانيوال بيقولوا السيارة ب 60 الف جنية
اتصلت بيهم ومبدئيا باذن الله هتفرج على العربية وربنا يكرمنى بسيارة كويسة وميتنصبش عليا
لانى خايف اوى يتنصب عليا فى العربية وتطلع فيها مشكلة كبيرة فى الموتور او العفشة واكتشف المشكلة كالعادة بعد فترة من شراء السيارة

أستاذنا الغالى اللى حضرتك طلبته أمانه و طالما ماعرفش حد مش هاقدر اعمل حاجه تضر حضرتك .. العربيه اللى بتقول عليها غاليه جدا جدا و شايف انك بتتسرع فى الشراء

متابع

م محمد عبد السلام
كتر خيرك ان حضرتك نبهتنى على سعر هذه السيارة انه مبالغ فيه.

طب ممكن حضرتك تقولى متوسط سعر هذه السيارة فى حالة ان كانت حالتها نظيفة كما يقولون؟
على العموم انا سوف اتفرج عليها اولا ولن اتسرع فى الشراء وان احسست انها سيارة كويسة سوف اقول لهم على متوسط سعرها الذى سوف تبلغنى به.
والف شكر لك

ذهبت للمعرض لكى اتفرج على السيارة الاوبل مو99 1600 سىسى لون شامبين معروضه ب 60 الف
جيت اركن قريب من المعرض لقيت السيارة مركونة بعيده عن المعرض
دخلت المعرض السكرتيرة قالتلى السيارة ب 60 الف وهى فول اوبشن وعاملة حوالى 180 كيلومتر
المهم قلتلها عاوز اتفرج على الاوبل
من كثرة السيارات البى ام المستعملة موديلات حديثة لم يتذكروا اين هذه السيارة الاوبل
المهم انا قلتلهم انا شفت اوبل عند الكشك ده يمكن هيا
جابوا المفتاح وجاء العامل فتح السيارة
السيارة من الخارج ماشاء الله ممتازة جدا بدون خربوش الكابوت والرفارف مظبوطين على الشعرة
فقط غطاء المرايا الشمال مكسور
المهم فتح السيارة وقعدت ابص على القاوئم والتعب من واقع خبرة السمع بالموقع فلقيتهم سلام مفيهومش مشكلة
لما جلست فى السيارة ( ودى اول مرة اجلس فى سيارة اوبل)
حسيت انى اقود طائرة وليست سيارة (يمكن عشان اول مرة اركب اوبل)
المهم بصيت على الفرش حست ان العربية متبهدلة ومتهانة
الفرش وسخ وهو عبارة عن قماش وتنجيد الابواب شكلة وسخ وذراع الباب البلاستيك عند السائق مكسور
وبصيت لقيت الساعة مخرفة والزرار بتاعها مخلوع
والكاسيت تقريبا الاصلى بتاع الشرايط وفيه لمبه حمرا صغيرة بتنور كل شوية
حطينا مفتاح الكونتاكت وبدور
بسم الله ماشاء الله الموتور صوته جميل وناعم وقوى احساس متميز وصوته جبار على ال اى بى ام 3
وشغلنا التكييف وبعد شوية بدء يسقع بس صوت المروحة على السرعة الثالثة كان عالى شوية
التارة بدون اى زرارير

المهم فتحت الكابوت طلع على مساعدين زى الطيارة
صوت جميل للموتور والاهم انه مطلعش النوع اليوتيك اللى انتم قلتوا عليه فقلت كويس
الصدر بتاع السيارة شكلة كويس وطبعا الحوض لا تراه من كثرة المعدات الميكانيكية والكهربائية
بس لاحظت الموتور معرق زيت
فتحت الشنطة الساساسيات كويسة بس الباكتتات وسخة جدات ومزيته
المهم حسيت ان العربية مهانة ومتمرمطة ولن تغسل منذ زمن
على الرغم من الرخصة التى تنتهى فى 27-6-2015 ان المالك سيدة تسكن فى نفس المنطقة والمعرض قالى انهم شارين السيارة بتوكيل
وطبعا عداد الكيلو طبع فوق ال 250 الف كيلو عكس ماقالوا
المهم حسيت ان العربية قيمتها اقل من 60 الف
رحت بقى لصاحب المعرض اسئلة عن السيارة قالى هى فين؟
قلتله السيارة عند الكشك هناك
قالى تمنها (55 الف) ههه تخفيض خمس الاف مش عارف هل هو نسى ام ايه اللى حصل
المهم انا بقلب جامد قلتلة العربية تعبانة وده تمن مبالغ فيه والموتور معرق زيت وممكن تصرف كتير
قالى عاوز تشتريها بكام؟
قلتله 48 الف بعد ما اجيب ميكانيكى يبص عليها قالى من 55 الى 48 الف هزة ب 7 الاف كتير
ولمح انها ممكن تتباع على 52 الف
وشكرته واخذت الكارت تبع المعرض
ومش عارف هل هى لقطة ام لا؟
الصور ساقوم برفعها مع فيديو المعاينة
مع التحية

معلش الصور حجمها كبير انا جمعتهم فى الرابط التالى هلاقى فولد به الصور كلها

https://www.dropbox.com/sh/kvn451vow...A7a-P8mSa?dl=0