جريت وال -Great Wall - هل تكون اول شركة صينية محترمة ؟ في الامان على الاقل ؟؟ 4 نجوم

**CryptonX** · 20-05-2010 11:23 AM

شركة جريت وال الصينية الي متعتنا بنسخ اشهر سيارات يابانية و دمجها مع بعض في خلاطات صينية ظريفة ولكن بصراحة لازم تقال بجودة نهائية مش بطالة او مش سئية بالعكس جيدة الى حد ما ( طبعا لسة بدري للحكم على الاعتمادية انا بتكلم على جودة التقفيل و الخامات ).

طرحت السيارة HOVER في مصر من فترة و لكنها كانت مستبعدة علشان مستوردة و 2000 سي سي فماكنش في حد بيخاطر بيها .

انما الان السيارة تجمع بالبافارية في مصر بمحرك 2000 سي سي و تبدا من 129 الف جنيه الى 149 الف جنيه .

و في راي الشخصي قبل الخبر ده انها من افضل السيارات الصينية الموجودة و من افضل سيارات دفع الرباعي في الفئة السعرية دي .

مع احترامي الكبير للداشيا او الرينو داستر الي جاية لدول الغلابة .. ب 150 الف جنيه و هي سيارة لاتسوةى 90 الف حتى .

الهوفر تفوقت ... عالميا !

الهوفر طرحت في استراليا في اواخر 2009 .

و قامت اخيرا الهيئة المختصة باختبار امان و سلامة السيارة في استراليا , باختبار الهوفر في اختبارات التصادم الرسمية !

النتيجة ؟

4 نجوم من 5 ! و هي نفس نتيجة التويوتا كامري بالمناسبة هناك.

و النجمة الخامسة " شطبت " علشان السيارة غير مزودة بنظام ESC او ESP الي بقى شبه " STANDARD" في السيارات هناك .

و ممكن تشوفوا اللينك بنفسكم و الفيديو .

الاختباربيقام بنفس سرعة الEuroNcap و هي 65 كم.ساعة !

السيارة متعادلة في الامان مع TOYOTA CAMRY !!!!

ودي بقى لا شركة روسية تعبانة ! ولا اختار صيني مضروب !

ده اختبار استرالي ! و متسجل في الموقع الرسمي :

ANCAP :: Vehicle Crash Report

====

وياريت الناس الي فكراني بهاجم ماركة صينية او الصين او بدافع عنها او متربص و بتريق وبسخر .. تعرف اني بنقل جميع انواع الاخبار , سيئة ام جيدة .. انا مش فارق معايا حاجة شخصيا بالعكس انا معجب بالسوق الصيني للسيارات و لكن مش معنى ان بلدي مبتنتجش سيارة يبقى اي حاجة تتعمل من الصين تبقىحلوة ! او اي حاجة تبقى سيئة .

--

انا شايف بس انهم طالما وصلوا و عدوا مرحلة الامن ! يكملوا جمليهم و يبطلوا يسرقوا تصميمات علشان دي بتقلل من مصدقايتهم عالميا .

و انا شايف ان الHOVER لو اتسوقت كويس و عملوا دعاية كويسة على موضوع اختبار الامان ده . حتكون من انجح سيارات الدفع رباعي في مصر ,.. و ياريت تكون باقي سيارات جريت وال بنفس الجودة .

**M.Elsheikh** · 21-05-2010 02:17 PM

شكرا علي الخبر

**barakota** · 23-05-2010 03:38 PM

شركة سوميد للبترول

استلمت 4 سيارات هوفر من عز العرب الاسكندرية

وياريت الناس الي فكراني بهاجم ماركة صينية او الصين او بدافع عنها او متربص و بتريق وبسخر .. تعرف اني بنقل جميع انواع الاخبار , سيئة ام جيدة .. انا مش فارق معايا حاجة شخصيا بالعكس انا معجب بالسوق الصيني للسيارات و لكن مش معنى ان بلدي مبتنتجش سيارة يبقى اي حاجة تتعمل من الصين تبقىحلوة ! او اي حاجة تبقى سيئة .

متفهم رايك كويس

رغم انى كنت فاهم العكس فعلا

بس من كلامك على الجاك بى كلاس عرفت انك بتفكر بطريقة كويس

شكرا لك