السلام عليكم ذهبت أمس لتوكيل تويوتا اللى فى العباسية و شفت العربية الكورولا وهى 4 فئات من الاساسية الى الهاى لاين G61 - G71 -G 72 and G73 اللى لفت نظرى الصالون واسع من الداخل و الخامات ممتازة و التابلوه لونين ( بس الفرش مش جلد ويمكن شراء فرش جلد المانى فى حدود 600 جنية) , بس كانت من الفئة اللى اقل من الهايلاين ( الهاى مكنتش موجودة فى المعرض), سألت السيلز عن علايات للعربية ...اجاب انه تم التنسيق مع الشركة المنتجة كل العربيات الجديدة ارتفاعها 14.5 سم و ان التوكيل فعلا كان بيغير العفشة على حساب الضمان قبل كده و الخطوة دى حاليا بقت تنزل فى العربيات الجديدة. أهم الفروق بين الهاى لاين و الفئة الثانيةالتالى: عدد الايرباج 7 و فى الفئة الاقل 2 فقط , مفتاح ذكى فى الهايلاين , لايوجد فى الفئة الاقل, كاميرا خلفية طبعا فى الهاى دى اهم الفروق و يمكن اهمهم 7 ايرباج ( 2 للسائق و الجالس جانبه و 2 تحمى جانب السائق و المرافق و 2 تحمى الارجل و الركب ووحدة تحمى السائق من جهة الراس) و المفتاح الذكى و هناك فروق اقل اهمية مثل حساس للاضاءة - حساس مطر- رشاشات مصر للفوانيس الامامية-مرآة داخلية خافتة للاضاءة اوتوماتيك- راديو سى دى شاشة تاتش و الفئتين يشتركوا فى الاتى - 1600 سى سى 122 حصان ناقل حركة CVT نظام ثبات الكترونى VSC نظام فرامل EBD-BA-ABS -مثبت سرعة تكييف Dual zone تحكم بالنظام الصوتى و التليفون Bluetooth مدخل USB+AUX - سماعات6- نظام مانع للسرقة- نظام تصفيح ضد الصدأ- ضبط مستوى الاضاءة يدوى- نظام اضاءة نهارى LED - مرايا كهرباء قابلة للطى, حساسات ركن امامية و خلفية- فوانيس شابورة خلفية و امامية خاصية الركن التلقائى
Park assist + Hill assist+ Follow me
السعة اللترية 55 لتر - الكاوتش مقاس 205/55 R 16 جنوط سبور
الهايى لاين سعرها 216990 يعنى 217 الف فى التوكيل كتبينها تحت مسمى G73 و الفئة التانية تحت مسمى G72 و سعرها 189990 يعنى 190 الف و ندخل على نظام الدفع و مدة الحجز و التامين ....بتدفع 50 الف حجز للسيارة و باقى المبلغ عند الاستلام بعد حوالى شهر ما عدا الابيض هالاين ممكن تنتظر شهريين, التامين مقداره 3.75% من ثمن السيارة يعنى حوالى 7500 جنية و التوكيل متعاقد مع شركة التامين اعتقد المشرق
يتبقى الالوان ومذكور ( بالنسبة للفئتين G73 and G72) الفرش الداخلى اسود للالوان التالية ابيض-ابيض لؤلؤى - فضى- رمادى - اسود و الفرش الداخلى بيج للالوان التالية برونز - احمر- كحلى - اسود
ايه راى حضراتكم وهل فرق 26 الف يستاهل الفروق دى و اختيارتكم للالوان