الموضوع: اسعار قطع غيار استيراد (عاجل)

المشاركة الأصلية كتبت بواسطة hany121

انا متابع موضوع شراء السياره وما تم فيه وهارود علي الاساس ده..

ما تعملش عمره ولا طقم شنبر دلوقت وهات اخرة الموتور اللي معاك وبعدين غيره بواحد استيراد
اسئل علي الكاوتش عند محلات بيع الاطارات (جديد طبعا) ومتجيبش حاجه غاليه زي بريدجستون او ميشلان . هات كومهو مثلا وقبل تركيب الكاوتش لازم تظبط العفشه كويس علشان ما تبوظشي الكاوتش الجديد..
طقم الدبرياج جديد
الفلانشه جديده والكرونه استيراد
علبة دركسيون ممكن جديد او استيراد علي حسب فرق السعر..

طالما قررت تعمل الشغل اللي في العربيه يبقي لازم تنزل تلف في اماكن بيع قطع غيار استيراد ( الوكاله - عزبة شلبي- بورسعيد- الخ...) والزملاء ملاك المرسيدس برده هيدولك خبرتهم في التعامل مع افضل التجار وتختار افضلهم معامله وسعر ويبقي معاك تليفوناتهم علشان تسأل علي القطع اللي هتحتاجها.. ونفس الشيء لمحلات قطع الغيار الجديده..

رأيي تبدأ الاول بكل ما هو اسفل السياره لانهم بيأثروا علي الثبات وامان الموجودين بالسياره (العفشه والات الجر والفرامل والطنابير والتيل والكاوتش) وتغير المحتاج تغيير وياريت جديد خصوصا المساعدين امامي وخلفي + مقصات وجلب وفلنشه وكرسي نص الخ الخ والتأكد من سلامة منظومة الفرامل( تيل وطنابيروماستر وزيت باكم)

بعد كده شغل سروجي للصالون وتظبيط الكهرباء مع العلم ان شغل الكهرباء بسيط وممكن يخلص في يوم وتكلفته بسيطه جدا لكن يفضل يتعمل مع شغل التنجيد علشان الصالون يبقي فاضي قدام الكهربائي والضفيره الداخليه تبقي باينه قدامه

بعد كده وبعد ما تجيب اخرة الموتور بتاعك اللي محتاج عمره تبقي ترميه وتسقط واحد استيراد بفتيسه وخلاص..

اهم حاجه تختار صنايعيه متجربين وعندهم ضمير وده صعب شويه لكن الزملاء ملاك المريسدس هايساعدوك اكيد والاهم يكونوا متخصصين مرسيدس

وفي النهايه ربنا يقويك ويوفقك وينتقم من التاجر اللي غشك وباعلك السياره

اشكرك شكرا جزيلا علي ردك
هبتدي رحله تظبيط العربيه ان شاء الله
انا كنت مشغول كم يوم عن المنتدي كنت بجيب ورق العربيه وبكشف عليها كشف أمني عشان اطمئن انها مش مسروقة والحمد لله كشفت عليها 3 مرات في مرورها الاصلي وفي مباحث المرور وطلعت سليمة مش مسروقة
ادعيلي ربنا يلهمني القرار السليم اصلحها وامشي بيها ولا ابيعها

هو البنزينه في التقرير كتبولي محتاج طقم شنبر او عمرة علي اساس انه قاس كفاءة كل سلندر لقاها 100 من 200 بالجهاز بتاعه بس الشكمان مش بيطلع دخان ابيض ولا اسود واللي خارج منه نضيف جدا
لما سألت حد بيعرف في الميكانيكا قال لي يبقا قصد البنزينه رفع كفاءة الموتور لغايه 70 او 80%
مش قصدهم ان الموتور مفوت او كده
هل الكلام ده سليم؟