توكيل ولا معرض

**mohamedmajed** · 04-06-2015 03:41 PM

السلام عليكم ،
دلوقتي لو روحت جيبت المازدا من معرض هيبيقي فيه مشاكل في حوار الضمان بتاعها مع التوكيل ولا ايه ولا من التوكيل أفضل ولا هما ٢ زي بعض مفيش فرق وسمعت ان gps لسه ما تفعلش طيب لو جيبتها من معرض اقدر اروح التوكيل غبور يعني ويفعله ليه من غير فلوس ولا هدفع فلوس gps علشان مش جايبها من التوكيل ، وشكرا

**amr011111** · 04-06-2015 04:27 PM

الاتنين زى بعض بالنسبه لسؤالك
ولكن لو العربيه تسليم فورى متوفره فى التوكيل يبقى هاتها من التوكيل افضل لانهم بينقلوا العربيه بونش بخلاف المعارض اللى بيبعتوا سواقين يجيبوا العربيه

**mohamedmajed** · 04-06-2015 05:35 PM

شكرًا لردك طيب بخصوص موضوع gps مثلا

**madooomad** · 04-06-2015 08:28 PM

هوة انت كنت عند شيرين كار .... بص انا كنت في غبور انهاردة فيريكا اللي علي الدائري سألت علي حوار الجي بي اس قالي لسة الكارت هاينزل عندنا كمان شهرين و بفلوس مش ببلاش زي ما كان قالي واحد من المبيعات في غبور .... عمتا انا كنت رحت شيرين كار و العربية ارخص ١٠٠٠ جنيه لاكن هاتقسط معاهم و التامين معاهم لاكن الوكيل ب ٢١٠ و قالي هاتغلي بعد اخر الشهر لاكن انا فضلت غبور اكتر عشان فكرة العربية جاية من الجمارك عليك مفيش حد ركبها مع اني يردة مش ب اثق في اي وكيل في بلدك بتبقي العربية اتخبطت و بيصلحها و يبيعها علي انها جديدة بس علي الاقل اضمن شوية من المعرض و كمان التامين مع غيور منك له علي طول مش هاتدفع و تجري ورا شركة التامين عشان تاخد فلوسك و ليك ونش يجيبك في اي حتة ببلاش لو لا قدر الله العربية عطلت منك و بردة ممكن تقسط معاهم علي طول و كمان هايدوك طقم دواسات مازدا و شماسة هههههه .... انا هاحجز الفضي ان شاء الله

**mohamedmajed** · 04-06-2015 11:43 PM

المشاركة الأصلية كتبت بواسطة madooomad

هوة انت كنت عند شيرين كار .... بص انا كنت في غبور انهاردة فيريكا اللي علي الدائري سألت علي حوار الجي بي اس قالي لسة الكارت هاينزل عندنا كمان شهرين و بفلوس مش ببلاش زي ما كان قالي واحد من المبيعات في غبور .... عمتا انا كنت رحت شيرين كار و العربية ارخص ١٠٠٠ جنيه لاكن هاتقسط معاهم و التامين معاهم لاكن الوكيل ب ٢١٠ و قالي هاتغلي بعد اخر الشهر لاكن انا فضلت غبور اكتر عشان فكرة العربية جاية من الجمارك عليك مفيش حد ركبها مع اني يردة مش ب اثق في اي وكيل في بلدك بتبقي العربية اتخبطت و بيصلحها و يبيعها علي انها جديدة بس علي الاقل اضمن شوية من المعرض و كمان التامين مع غيور منك له علي طول مش هاتدفع و تجري ورا شركة التامين عشان تاخد فلوسك و ليك ونش يجيبك في اي حتة ببلاش لو لا قدر الله العربية عطلت منك و بردة ممكن تقسط معاهم علي طول و كمان هايدوك طقم دواسات مازدا و شماسة هههههه .... انا هاحجز الفضي ان شاء الله

تصدق أنا لسه راجع من عندهم الي علي الدائري بس ماروحتش شيرين كار :) وقالب نفس كلامك بس نسيت علي موضوع التأمين ده والgps هياخدوا عليه الموافقه بفلوس وقالي تقريبا ٣٠٠٠ جنيه وهتغلي اخر الشهر وكلامك صح التوكيل اضمن مني له علي طول بس هو لما اشتري ألعربيه من عندهم بدفع فلوس التأمين عندهم وبيبقي تأمين شامل والونش ده معاه علشان مسالتلش في الحوار ده، والتقسيط عندهم بفايده ٩ ونص

**madooomad** · 05-06-2015 02:22 AM

ايوة يا باشا التامين و التقسيط منك ليهم يعني لا قدر الله العربية لو فيها حاجة ياخد العربية ويصلحها و يديهالك و الفايدة عندهم ٩ ونص ... انا لسة محتار في اللون الصراحة انا قلتلة احجز الفضي لاكن الاحمر لسة مزغلل في عيني

**mohamedmajed** · 05-06-2015 09:19 PM

المشاركة الأصلية كتبت بواسطة madooomad

ايوة يا باشا التامين و التقسيط منك ليهم يعني لا قدر الله العربية لو فيها حاجة ياخد العربية ويصلحها و يديهالك و الفايدة عندهم ٩ ونص ... انا لسة محتار في اللون الصراحة انا قلتلة احجز الفضي لاكن الاحمر لسة مزغلل في عيني

هو التأمين الشامل عندهم بكام يا ريس واللون الفضي ده الي كان معروض عندهم صح هو دخل دماغي بس مش قوي والأحمر حلو بس برده يعني بفكر في الابيض وياريت يكون ابيض لؤلؤلي او اللون الكحلي او لون سيلفر فراني أنا بتكلم علي الهاتشباك شايفها احلي من السيدان ، هو كده الفايده عندهم كويسه ولا عاليه

**madooomad** · 05-06-2015 10:35 PM

التأمين عندهم ٤% من سعر العربية بيقل ١٠٪ من قيمته كل سنة و الفايد ٩.٥ من غير ضمانات دي تعتبر جيدة انا شخصيا هادفع اكتر من النصف و هاقسط علي سنة ... بالنسبة للهاتش باك حلوة طبعا بس مشكلتها انها شبابي بزيادة و انا عجزت ٣١ سنة خلاص و داخل علي جواز

**madooomad** · 05-06-2015 10:39 PM

بالنسبة للالوان الابيض تحفة عليها هوة و الكحلي بس رائي لو هاتجيب ابيض هات الؤلؤي الكحلي جميل جدا بس انا متعقد من الغوامق بيتوسخوا من الهواء عربيتي سوداء و اسأل مجرب بالنسبة للفضي مشكلتي معاه انه مضيع لون النواكل اللي في الشبكة و الزجاج حاسه عادي شوية الاحمر جميل و مميز فيها و اعتقد انه مع اضواء الليد امامي و خلفي هايبقي جميل انا تقريبا ٩٠٪ هاجيب الحمراء

**mohamedmajed** · 05-06-2015 11:06 PM

لسه شباب يا ريس أنا ٢٩ أهو عادي :) شكلها هاتشباك ابيض لؤلؤلي ده وادفع 50% وافسط علي ٤ ولا ٥ سنين بقه وربنا يسهل ولو جيبتها قابلي ابقي قول علشان أقولك مبروك بس هو فيه لون كحلي لؤلؤلي